ভাৰতীয় ঘৰুৱা ক্ৰিকেটৰ আটাইতকৈ বৃহৎ প্ৰতিযোগিতা ৰঞ্জী ট্ৰফী সমাগত। ইতিমধ্যে বিভিন্ন ৰাজ্যৰ দল সমূহে ইয়াৰ বাবে বিশেষ প্ৰস্তুতি হাতত লৈছে।
অসম ক্ৰিকেট সন্থাই অসমৰ ক্ৰিকেট দলটোৱে যাতে আগন্তুক ছিজনত ভাল ফলাফল দেখুৱাব পাৰে তাৰবাবে প্ৰস্তুতি আৰম্ভ কৰিছে।
ইতিমধ্যে অসম ক্ৰিকেট সন্থাই অসম ৰঞ্জী দলৰ মুখ্য প্ৰশিক্ষক হিচাপে নিযুক্তি দিছে ভাৰতীয় ক্ৰিকেট দলৰ প্ৰাক্তন উইকেট কীপাৰ বেটছমেন অজয় ৰাট্ৰাক।
অজয় ৰাট্ৰাৰ প্ৰশিক্ষণতে অসমে নতুন বৰ্ষৰ ৰঞ্জী ট্ৰফীৰ অভিযান আৰম্ভ কৰিব।
উল্লেখযোগ্য যে, অসম ৰঞ্জী ট্ৰফীৰ সাম্ভাব্য দলটোৰ সৈতে পাঁচ খন প্ৰস্তুতি খেলত অংশলোৱাৰ বাবে গুৱাহাটীলৈ আহিব বাংলাদেশৰ এটা আগশাৰীৰ ক্ৰিকেট দল।
১৩ দিনীয়া ভ্ৰমণসূচীলৈ আহিবলগীয়া দলটোৱে ২০ আগষ্টত গুৱাহাটীত উপস্থিত হ’ব।
ভাৰতীয় ক্ৰিকেট নিয়ন্ত্ৰণ বোৰ্ডৰ পৰা ইতিমধ্যে এই সম্পৰ্কত সেউজ সংকেত লাভ কৰা হৈছে বুলি অসম ক্ৰিকেট সন্থাৰ সাধাৰণ সম্পাদকে সংবাদ মাধ্যমৰ আগত প্ৰকাশ কৰিছে।
বাংলাদেশৰ দলটোৱে বৰ্ষাপাৰা ক্ৰিকেট ষ্টেডিয়ামত অসমৰ সৈতে পাঁচখন প্ৰস্তুতি খেলত অংশগ্ৰহণ কৰিব।
বাংলাদেশৰ পূৰ্বে অষ্ট্ৰেলিয়াৰ এডেলাইটৰ এটা ক্ৰিকেট দলকো অসমে আমন্ত্ৰণ জনাইছিল যদিও দলটো আহিব নোৱাৰাত তেওঁলোকক পৰৱৰ্তী সময়ত আমন্ত্ৰণ জনোৱা হ’ব বুলি সন্থাৰ তৰফৰ পৰা জনোৱা হয়।
বাংলাদেশৰ দলটোৰ সৈতে প্ৰস্তুতি খেলত অংশগ্ৰহণ কৰাৰ পাছতে ৰঞ্জী ট্ৰফীৰ অভিযান আৰম্ভ কৰিবলগীয়া অসম দলটোক এনেধৰণৰ বিশেষ প্ৰস্তুতিয়ে ভাল প্ৰদৰ্শন আগবঢ়োৱাত সহায় কৰিব বুলি আশা কৰা হৈছে।
