ক্ৰিকেট বিশ্বৰ আটাইতকৈ ধনাঢ্য তথা জনপ্ৰিয় ক্ৰিকেট লীগ ইণ্ডিয়ান প্ৰিমিয়াৰ লীগৰ ৰোমাঞ্চে সমগ্ৰ ক্ৰিকেট বিশ্বক আকর্ষণ কৰে। কিন্তু এইবাৰ এই উন্মাদনাৰ পৰা বঞ্চিত হ’ব বাংলাদেশী ক্ৰিকেটপ্ৰেমীসকল। কিয়নো বাংলাদেশ চৰকাৰে দেশখনত অইপিএলৰ সম্প্ৰচাৰৰ ওপৰত সম্পূৰ্ণ নিষেধাজ্ঞা আৰোপ কৰিছে।
বাংলাদেশ চৰকাৰে জাৰী কৰা এক বিবৃতিত কোৱা হৈছে যে এতিয়াৰে পৰা দেশখনৰ কোনো টেলিভিছন চেনেল বা ডিজিটেল প্লেটফৰ্মত আইপিএলৰ খেলসমূহ সম্প্ৰচাৰ কৰিব নোৱাৰিব।
শেহতীয়াকৈ বাংলাদেশৰ তাৰকা পেচ বলাৰ মুস্তাফিজুৰ ৰহমানক আইপিএলৰ পৰা বাদ দিয়াৰ সিদ্ধান্ত লয় ভাৰতীয় ক্ৰিকেট নিয়ন্ত্ৰণ ব’ৰ্ডে । মুস্তাফিজুৰক ক্ৰয় কৰা ফ্ৰেন্সাইজি কলকাতা নাইট ৰাইডাৰ্ছক খেলুৱৈগৰাকীক মুকলি কৰি দিবলৈ বিচিচিআইয়ে নিৰ্দেশ দিয়ে। এই সিদ্ধান্তৰ পাছতেই বাংলাদেশত তীব্ৰ প্ৰতিক্ৰিয়াৰ সৃষ্টি হয়।
ইয়াৰ পৰিপ্ৰেক্ষিততে দেশখনৰ ক্ৰীড়া মন্ত্ৰালয়ে তথ্য আৰু সম্প্ৰচাৰ মন্ত্ৰালয়ক আইপিএলৰ সম্প্ৰচাৰ বন্ধ কৰিবলৈ আনুষ্ঠানিকভাৱে অনুৰোধ জনায়। ক্ৰীড়া মন্ত্ৰালয়ৰ সৈতে জড়িত ড° আছিফ নজৰুলে সামাজিক মাধ্যমত কৰা এক পোষ্টত মুস্তাফিজুৰ ৰহমানৰ সৈতে হোৱা ব্যৱহাৰক লৈ অসন্তুষ্টি প্ৰকাশ কৰি কয় যে বাংলাদেশী ক্ৰিকেটাৰৰ অপমান কোনো কাৰণতে সহ্য কৰা নহ’ব।
কেৱল আইপিএলৰ সম্প্ৰচাৰ নিষিদ্ধ কৰাই নহয়, বাংলাদেশে ভাৰতৰ বিৰুদ্ধে আন কেইবাটাও গুৰুত্বপূৰ্ণ পদক্ষেপো গ্ৰহণ কৰিছে। মুস্তাফিজুৰক লৈ সৃষ্টি হোৱা বিতৰ্কৰ পাছতে বাংলাদেশে টি-২০ বিশ্বকাপ ২০২৬ৰ বাবে ভাৰতলৈ যাবলৈ অস্বীকাৰ কৰিছে।
এই সন্দৰ্ভত বাংলাদেশে আন্তঃৰাষ্ট্ৰীয় ক্ৰিকেট পৰিষদ (ICC)-ৰ ওচৰত আনুষ্ঠানিক আবেদন দাখিল কৰিছে। বাংলাদেশ ক্ৰিকেট ব’ৰ্ডে আগন্তুক টি-২০ বিশ্বকাপত বাংলাদেশৰ মেচসমূহ ভাৰতৰ পৰা আঁতৰাই শ্ৰীলংকাত অনুষ্ঠিত কৰাৰ বাবে আইচিচিক অনুৰোধ জনাইছে। নিৰাপত্তাৰ দোহাই দি এই আবেদন জনোৱা হৈছে।
ইয়াৰ উপৰিও মুস্তাফিজুৰ ৰহমানক আইপিএলৰ পৰা কিয় বাদ দিয়া হ’ল তাৰ স্পষ্ট ব্যাখ্যা বিচাৰি বাংলাদেশ ক্ৰিকেট ব’ৰ্ডে বিচিচিআইয়ে লৈ ই-মেইল প্ৰেৰণ কৰিছে।
