ধৰ্মৰ ভিত্তিত নাগৰিকত্ব দিব পৰাকৈ ভাৰত চৰকাৰে কৰা নাগৰিকত্ব আইনখন সংশোধনত বাংলাদেশৰ ধৰ্মীয় আৰু জাতিগত সংখ্যালঘু জনগোষ্ঠী উদ্বিগ্ন বুলি মন্তব্য কৰিছে দেশখনৰ সংখ্যালঘু সম্প্ৰদায়ৰ এখন মঞ্চই।
১৪ ডিচেম্বৰত বাংলাদশ হিন্দু, বৌদ্ধ, খ্ৰীষ্টান ঐক্য পৰিষদ নামৰ মানৱ অধিকাৰৰ হকে কাম কৰা এটা সংগঠনৰ গুৰুত্বপূৰ্ণ মন্তব্য, “এই আইনখনে এহাতে দেশত থকা সংখ্যালঘুসকলক অধিক নিৰাপত্তাৰ আশাত দেশত্যাগৰ বাবে উৎসাহিত কৰিব, দ্বিতীয়তে দেশৰ ভিতৰৰ অসাম্প্ৰদায়িক গণতান্ত্ৰিক আন্দোলনত তেওঁলোকৰ অংশগ্ৰহণক নিৰুৎসাহিত কৰিব।”
সংবাদমেলৰ সময়ত ঐক্য পৰিষদে এটা লিখিত বিবৃতিও প্ৰকাশ কৰে, য’ত লগতে কোৱা হৈছে, “আনহাতে ১৯৭৫ চনত বংগবন্ধু শ্বেইখ মুজিবুৰ ৰহমানৰ হত্যাকাণ্ডৰ পিছত সংখ্যালঘুসকলৰ জীৱন, পৰিয়াল আৰু সম্পদৰ ওপৰত আক্ৰমণ কৰি তেওঁলোকক দেশত্যাগৰ বাবে যিসকলে বাধ্য কৰিছিল, এই বিধেয়কখন আইনত পৰিণত হ’লে এওঁলোকক সাম্প্ৰদায়িক নিৰ্য্যাতন, নিপীড়ন, ভূমি দখল, ধৰ্মান্তৰকৰণ অব্যাহত ৰাখি, সংখ্যালঘুসকলক দেশ ত্যাগ কৰাবলৈ অধিক উৎসাহিত কৰিব। আৰু লগতে তেওঁলোকৰ বাংলাদেশক ধৰ্মীয় ৰাষ্ট্ৰত পৰিণত কৰাৰ ৰাজনৈতিক আকাংক্ষাক অধিকতৰ উৎসাহিত কৰিব।”
ঐক্য পৰিষদৰ সাধাৰণ সম্পাদক ৰাণা দাশগুপ্তই “বাংলাদেশ বহুত্ববাদী সমাজৰ পৰা ক্ৰমে আঁতৰি আহিছে আৰু সংখ্যালঘুসকলৰ দেশত্যাগ কমবেছি পৰিমাণে অব্যাহত আছে” বুলি উল্লেখ কৰে।
তেওঁৰ মন্তব্য, “এইবোৰ সমস্যাৰ সমাধান গণতান্ত্ৰিক, অসাম্প্ৰদায়িক ৰাজনৈতিক আৰু সামাজিক আন্দোলনৰ মাজত নিহিত আছে।
সংবাদমেলত তিনিটা ধৰ্মীয় সংখ্যালঘু সম্প্ৰদায়ৰ উমৈহতীয়া মঞ্চখনে শ্বেইখ হাচিনাৰ চৰকাৰখনক দলটোৰ নিৰ্বাচনী প্ৰতিশ্ৰুতি, সাম্প্ৰদায়িকতাৰ বিৰুদ্ধে শূন্য সহনশীলতা, সংখ্যালঘুসকলৰ স্বাৰ্থ ৰক্ষাৰ হকে জাতীয় সংখ্যালঘু কমিশ্যন গঠন, সংখ্যালঘু সুৰক্ষা আইন আৰু বৈষম্য বিলোপ আইন প্ৰণয়ন, অৰ্পিত সম্পত্তি প্ৰত্যৰ্পণ আইন আৰু পাৰ্বত্য চুক্তিৰ বাস্তৱায়িত কৰাৰ বাবে দ্ৰুত পদক্ষেপ ল’বলৈ আহ্বান জনায়।
