বাংলাদেশৰ ছাত্ৰ আন্দোলনৰ আঁৰত আছিল এক বৃহৎ আন্তঃৰাষ্ট্ৰীয় ষড়যন্ত্ৰ। বাংলাদেশৰ প্ৰাক্তন মন্ত্ৰী মহিবুল হাছান চৌধুৰীৰ এই বিস্ফোৰক অভিযোগে ব্যাপক প্ৰতিক্ৰিয়াৰ সৃষ্টি কৰিছে। ৰাছিয়াৰ সংবাদ গোষ্ঠী ‘Russia Today’ক দিয়া এক সাক্ষাৎকাৰত তেওঁ কয় যে ২০২৪ চনত বাংলাদেশত হোৱা হিংসাত্মক আন্দোলন কোনো স্বতঃস্ফূৰ্ত প্ৰতিবাদ নাছিল, বৰঞ্চ শ্বেইখ হাছিনা চৰকাৰক উফৰাই পেলোৱাৰ উদ্দেশ্যে এক সুপৰিকল্পিত অভিযান আছিল বুলি দাবী কৰিছে।
মহিবুলৰ ভাষ্য অনুসৰি, এই ষড়যন্ত্ৰৰ আঁৰত আছিল আমেৰিকা, তাৰ অলাভজনক সংস্থা USAID, লগতে ক্লিণ্টন পৰিয়াল। তেওঁ অভিযোগ কৰে যে, “আমেৰিকাৰ কিছুমান NGO আৰু USAIDৰ দৰে সংস্থাই ২০১৮ চনৰ পৰা আমাৰ চৰকাৰৰ বিৰুদ্ধে গোপনভাৱে প্ৰচাৰ চলাই আহিছে। তেওঁলোকে চচিয়েল মিডিয়াৰ প্ৰভাৱশালী ব্যক্তি, শিল্পী, মৌলবাদী গোট আৰু তৃতীয় লিংগৰ লোকসকলক বিপুল পৰিমাণৰ ধন দান কৰি আন্দোলনত ইন্ধন যোগাইছিল।”
তেওঁ আৰু অভিযোগ কৰে যে, অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে আমেৰিকা চৰকাৰৰ সৈতে হাত মিলাইছে। তেওঁ ইউনুছক “বিপজ্জনক ব্যক্তি” বুলি বৰ্ণনা কৰি কয়, “ইউনুছে আৰু ক্লিণ্টন পৰিয়ালে বহু বছৰ ধৰি বাংলাদেশৰ চৰকাৰ সলনি কৰিবলৈ চেষ্টা কৰি আহিছে। NGOৰ পুঁজিৰ জৰিয়তে বহু গোপন কাম চলি আছিল।”
উল্লেখযোগ্য যে, শ্বেইখ হাছিনাইও পূৰ্বে আমেৰিকাৰ ওপৰত একে ধৰণৰ অভিযোগ উত্থাপন কৰিছিল। তেওঁৰ দাবী অনুসৰি, চেইণ্ট মাৰ্টিন দ্বীপ সংযুক্ত ৰাষ্ট্ৰক বিক্ৰী নকৰাৰ কাৰণেই আমেৰিকাই ষড়যন্ত্ৰৰ জৰিয়তে তেওঁৰ চৰকাৰক উফৰাই পেলাইছিল। তেওঁ ইউনুছৰ ওপৰতো অভিযোগ উত্থাপন কৰিছে যে তেওঁ বাংলাদেশক আমেৰিকাৰ স্বাৰ্থত বলিদান দিছে।
প্ৰাক্তন মন্ত্ৰী মহিবুল হাছান চৌধুৰীয়ে সাক্ষাৎকাৰত স্পষ্টভাৱে কয় যে, “যোৱা বছৰৰ জুলাই মাহত যি আন্দোলন বাংলাদেশত সংঘটিত হৈছিল, ই সম্পূৰ্ণৰূপে পৰিকল্পিত আছিল। ক্লিণ্টন পৰিয়াল আৰু ইউনুছৰ মাজত বহুদিনৰ গোপন বুজাবুজি আছিল, যাৰ লক্ষ্য আছিল হাছিনা চৰকাৰক উফৰাই নতুন শাসন ব্যৱস্থা স্থাপন কৰা।”
তেওঁ লগতে প্ৰশ্ন উত্থাপন কৰি কয় যে, “আমেৰিকাৰ পৰা অহা এই বিপুল ধন ক’লৈ গ’ল?” মহিবুলৰ দাবী, এই ধনেই বাংলাদেশৰ চৰকাৰ সলনি কৰিবলৈ ব্যৱহাৰ কৰা হৈছিল আৰু সেই ধনৰেই জুলাই-আগষ্ট মাহৰ হিংসাত্মক সংঘাতৰ পৰিকল্পনা হৈছিল।
