ইউনাইটেড ফ’ৰাম অৱ বেংক ইউনিয়নে ছেপ্টেম্বৰ মাহত মুঠ ৪ দিনৰ বাবে বেংক ধৰ্মঘটৰ আহ্বান জনাইছে। একাধিক দাবী তুলি বেংক ধৰ্মঘটৰ আহ্বান জনোৱা হৈছে। দাবী পূৰণ নহ’লে অক্টোবৰ মাহত পুনৰ অবিৰত ধৰ্মঘটৰ সকীয়নি দিয়া হৈছে। বেংক কৰ্মচাৰীৰ আন্দোলনত পৰিসেৱা ব্যাহত হোৱাৰ আশংকা দেখা দিছে। ফলত গ্ৰাহকে সমস্যাৰ সন্মুখীন হ’ব পাৰে।
ইউনাইটেড ফ’ৰাম অৱ বেংক ইউনিয়নৰ মূল দাবী হৈছে সপ্তাহত ৫ কৰ্মদিন আৰু ২ দিন ছুটী। দ্বিতীয়তে মাহৰ দ্বিতীয় আৰু চতুৰ্থ শনিবাৰ নহয়, বৰঞ্চ প্ৰতিটো শনিবাৰে ছুটী দিব লাগিব।
তৃতীয়টো দাবী হ’ল পাৰফৰমেন্স লিংকড ইনচেণ্টিভ বা পিএলআই আঁচনিৰ বৰ্তমানৰ গাঁথনি সলনি কৰা। কৰ্মচাৰীসকলৰ মাজত কোনো ধৰণৰ বৈষম্য হ’ব নালাগে। সকলো কৰ্মচাৰীকে তেওঁলোকৰ কৰ্মক্ষমতাৰ ওপৰত ভিত্তি কৰি সমান আৰ্থিক উদগনি (ইনচেন্টিভ) দিব লাগে।
এই সকলোবোৰ দাবীৰ বাবে পৰ্যায়ক্ৰমে ধৰ্মঘটৰ আহ্বান জনোৱা হৈছে। ১১ ছেপ্টেম্বৰ শুকুৰবাৰে বেংক ধৰ্মঘটৰ আহ্বান জনোৱা হৈছে। পিছদিনা শনিবাৰ আৰু দেওবাৰ। ১৪ ছেপ্টেম্বৰত গণেশ চতুৰ্থী।ফলত একেৰাহে চাৰিদিন বেংকিং সেৱা বন্ধ থাকিব পাৰে।
পুনৰ ২৮ ছেপ্টেম্বৰৰ পৰা ৩০ ছেপ্টেম্বৰলৈ তিনিদিনীয়া ধৰ্মঘটৰ আহ্বান জনোৱা হৈছে। যদি দাবী পূৰণ নহয় তেন্তে ২৬ অক্টোবৰৰ পৰা অনিৰ্দিষ্টকালীন ধৰ্মঘটৰ আহ্বান জনোৱা হ’ব পাৰে। বন্ধ থাকিব পাৰে এটিএম। তেনেক্ষেত্ৰত গ্ৰাহকে যথেষ্ট দুৰ্দশাৰ সন্মুখীন হ’ব পাৰে।
অৱশ্যে প্ৰথম শাৰীৰ ব্যক্তিগত বেংকসমূহ ইউনাইটেড ফ’ৰাম অৱ বেংক ইউনিয়নছ কাৰ্যসূচীৰ অন্তৰ্ভুক্ত নহয়। গতিকে সেই বেংকসমূহত গ্ৰাহক সেৱাত ব্যাঘাত জন্মাৰ কোনো সম্ভাৱনা নাই।
