কাচাৰৰ এটিএম সমূহত সম্প্ৰতি টকা নথকাটো এটা অলিখিত নিয়মৰ দৰে হৈ পৰিছে। আজিৰ তাৰিখত টকাৰ প্ৰয়োজনত বহু দূৰৰ পৰা বাটকুৰি বাই অহা বিভিন্নজনে এটিএমত টকা নাপাই উভতি যোৱাটো এটা স্বাভাৱিক দৃশ্য হৈ পৰিছে।
ফলত স্বাভাৱিকৰেই বৃহত্তৰ শিলচৰৰ অধিবাসীসকল বিভিন্ন লেনদেন কৰাৰ প্ৰয়োজনত সমস্যাত জৰ্জৰিত হৈ পৰিছে।
বহু মাহ ধৰি এনেদৰে থকাৰ পাছতো পৰিস্থিতিৰ কোনো পৰিৱৰ্তন নোহোৱাত অৱশেষত ৬টা সংগঠনে শিলচৰৰ উপায়ুক্তৰ ওচৰত এখন ৩দফীয়া স্মাৰকপত্ৰ জমা দি শিলচৰৰ এটিএমসমূহত টকাৰ সংকট নোহোৱা কৰাৰ বাবে ব্যৱস্থা গ্ৰহণ কৰাৰ বাবে আৱেদন জনায়।
শুকুৰবাৰে ছিনিয়ৰ চিটিজেন ফৰাম, চিটিজেনছ ৰাইটছ প্ৰটেকশ্যন ক’ৰ্ডিনেশ্যন কমিটী, মৰিনিং ক্লাব, অল আছাম হায়াৰ ছেকেণ্ডাৰী টীচাৰ্ছ এছোচিয়েশ্যন, ভাৰ্ছুৱেল মেডিয়া গ্ৰুপ, অপিনিয়ন মুভাৰছ নামৰ ৬টা সংগঠনে কাচাৰৰ উপায়ুক্ত ড০ এছ লক্ষ্মণনৰ ওচৰত এখন যুটীয়া স্মাৰকপত্ৰ জমা দিয়া দিয়ে। তেওঁলোকে কৈছে যে তেওঁলোকে স্মাৰকপত্ৰখনত তেওঁলোকৰ ৩ দফীয়া দাবী চনদ সহজবোধ্যভাৱে উত্থাপন কৰিছে।
দাবীসমূহ হৈছে শিলচৰ আৰু ইয়াৰ আশ-পাশৰ প্ৰতিটো এটিএমতে নিৰাপত্তাৰক্ষী নিয়োগ কৰা, গোটেই নিশা এটিএম খোলা ৰখা, সকলো সময়তে এটিএমত টকা মজুত ৰখা।
স্মাৰকপত্ৰ জমা দিয়া সংগঠনসমূহৰ এগৰাকী সদস্য দীপক দাসগুপ্তাই নৰ্থ-ইষ্ট নাওৰ আগত সদৰি কৰিছে, ‘‘বহু মাহ ধৰি এটিএমসমূহত টকাৰ নাটনি হোৱাটো লক্ষ্য কৰি অৱশেষত আমি বিষয়টো উপায়ুক্তৰ ওচৰলৈ লৈ গৈছোঁ। আমি আমাৰ দাবী যিমান পাৰি সোনকালে সমাধান হোৱাটো বিচাৰিছোঁ।
‘আন এগৰাকী সদস্য দিলীপ কুমাৰ দে’ই কয়, শিলচৰৰ বহুতো গুৰুত্বপূৰ্ণ এলেকাত এটিএমসমূহত টকা নাথাকে। উদাহৰণস্বৰূপে শিলচৰ চিকিৎসা মহাবিদ্যালয় চিকিৎসালয়ৰ চৌহদৰ ভিতৰত থকা ষ্টে’ট বেংকৰ এটিএমটো দুমাহ ধৰি কাৰ্যক্ষম হৈ থকা নাই আৰু কোনও এইটো মেৰামতি কৰি কাৰ্যক্ষম কৰাৰ কথা চিন্তা কৰা নাই।’’
