বিগত ১২টা বিত্তীয় বৰ্ষত বৃহৎ কৰ্পৰেট আৰু সেৱা খণ্ডৰ প্ৰায় ১০ লাখ কোটি টকাৰ ঋণ বন্ধ কৰি দিছে বেংকে। চলিত বৰ্ষাকালীন অধিৱেশনত কেন্দ্ৰই সংসদত এই তথ্য অৱগত কৰে।
প্ৰসংগক্ৰমে নৰেন্দ্ৰ মোডী চৰকাৰে এতিয়াও বিজয় মালিয়া, নীৰৱ মোডী, মেহুল চোকছিৰ দৰে ঋণ অনাদায়কাৰীক ঘূৰাই আনিব পৰা নাই। ইফালে চৰকাৰে সংসদত স্বীকাৰ কৰিছে যে বেংকৰ হিচাপৰ পৰা বৃহৎ কৰ্প’ৰেটৰ বিপুল ঋণ মচি পেলোৱা হৈছে।
কেন্দ্ৰীয় বিত্ত ৰাজ্য মন্ত্ৰী পংকজ চৌধুৰীয়ে সংসদত লিখিত উত্তৰত কয় যে ২০২৫ বিত্তীয় বৰ্ষত বৃহৎ উদ্যোগিক আৰু সেৱা কোম্পানীসমূহৰ বাকী থকা ঋণৰ পৰিমাণ আছিল ৬৩,১৯,৫৭৭ কোটি টকা। ২০২৬ বিত্তীয় বৰ্ষত সেয়া ৬৯,২১,৭৩৪ কোটি টকালৈ বৃদ্ধি পাইছে।
ভাৰতীয় ৰিজাৰ্ভ বেংকৰ তথ্যৰ ভিত্তিত কেন্দ্ৰীয় মন্ত্ৰীগৰাকীয়ে এই কথা প্ৰকাশ কৰে। যোৱা ১২ বছৰত সৰ্বাধিক ঋণ ৰেহাই (ৰাইট অফ) হৈছে ২০১৮-১৯ বিত্তীয় বৰ্ষত। সেই বছৰত বেংকৰ হিচাপৰ পৰা ১,৪৮,৭৫৩ কোটি টকাৰ বৃহৎ কৰ্পৰেট ঋণ বন্ধ কৰি দিয়া হৈছিল।
চৌধুৰীয়ে লগতে কয় যে বাণিজ্যিক বেংকৰ বাবে আৰ বি আইৰ ‘ৰিজ’লিউচন অৱ ষ্ট্ৰেছড এচেটছ ডাইৰেকচন ২০২৫’ অনুসৰি ৰাইট অফ (যাৰ এটা ডাঙৰ অংশ কাৰিকৰী/বিচক্ষণ/ৰাজহ অগ্ৰিম ধনৰ বাবে) হৈছে এটা হিচাপ পদ্ধতি যিটো বেংকে নিজৰ বেলেন্স শ্বীট এডজাষ্ট কৰিবলৈ গ্ৰহণ কৰে।
ইয়াৰ পূৰ্বে যোৱা বছৰৰ ডিচেম্বৰ মাহত বিত্ত ৰাজ্য মন্ত্ৰীয়ে কৈছিল যে আৰ বি আইৰ তথ্য অনুসৰি ২০২৫ চনৰ ৩০ ছেপ্টেম্বৰলৈকে যোৱা চাৰে পাঁচ বছৰত ৰাজহুৱা খণ্ডৰ বেংকসমূহে মুঠ ৬,১৫,৬৪৭ কোটি টকা ঋণ তেওঁলোকৰ হিচাপৰ পৰা বাতিল কৰিছে।
