কৰ’না মহামাৰী সংক্ৰমণ ৰোধ কৰাৰ উদ্দেশ্যে আজি ঐতিহ্যমণ্ডিত বৰপেটা সত্ৰৰ ভকত আৰু আইসকলক ক’ভিড ভেকচিন প্ৰদান কৰা হয় ৷
বৰপেটা সত্ৰৰ বুঢ়াসত্ৰীয়া বশিষ্ঠ শৰ্মাৰ অনুৰোধ মৰ্মে আজি বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়ৰ অধ্যক্ষ ডাঃ ৰমেন তালুকদাৰ তৎপৰতাত বৰপেটা সত্ৰৰ ভকত আৰু আই সকলক ক’ভিড ভেকচিন প্ৰদান কৰা হয় ৷
আজি সত্ৰৰ ৮৮ গৰাকী ভকত, আই মাতৃক ক’ভিড ভেকচিন প্ৰদান কৰা হয় ৷ একেদৰে শুকুৰবাৰেও সত্ৰৰ ভকত আৰু আইসকলক ক’ভিড ভেকচিন প্ৰদান কৰা হব ৷
মহামাৰী কৰ’নাৰ ভয়াৱহ সংক্ৰমণৰ পৰা হাত সাৰি থাকিবলৈ ৰাজ্যবাসীক মাস্ক পৰিধান কৰিবলৈ আৰু সামাজিক দূৰত্ব মানি চলিবলৈ আহ্বান জনাইছে বৰপেটা সত্ৰৰ বুঢ়াসত্ৰীয়া বশিষ্ঠ শৰ্মাই ৷
উল্লেখ্য যে, ক’ভিড প্ৰ’ট’কল মানি ইতিমধ্যে বৰপেটা সত্ৰ চৌহদত প্ৰবেশৰ ক্ষেত্ৰত ভকত বৈষ্ণৱসকলক মাস্ক পিন্ধাতো বাধ্যতামূলক কৰা হৈছে বুলি বুঢ়াসত্ৰীয়া গৰাকীয়ে উল্লেখ কৰে ৷
