ৰাজ্যত সংঘটিত কোটিটকীয়া বীমা কেলেংকাৰিৰ সৈতে জড়িত থকাৰ অভিযোগত বৰপেটাত এজন চৰকাৰী চিকিৎসক আৰু দুজন দালালৰ লগতে মফিদা বেগম নামৰ এগৰাকী মহিলাক গ্ৰেপ্তাৰ কৰাৰ পিছত বৰপেটা আৰক্ষীয়ে বৰপেটাৰ মেধিৰটাৰীৰ আজিজুল হক নামৰ আন এজনক এই কেলেংকাৰিৰ সৈতে জড়িতৰ অভিযোগত গ্ৰেপ্তাৰ কৰিছে।
আৰক্ষীৰ হাতত গ্ৰেপ্তাৰ হোৱা আজিজুল হক স্বাস্থ্য বিভাগৰ এম পি ডব্লিউ কৰ্মী আছিল। শনিবাৰে আবেলি অভিযুক্ত আজিজুলক বৰপেটাৰ আদালতত হাজিৰ কৰোৱাত আদালতে ছদিনৰ বাবে আৰক্ষীৰ জিম্মাত দিয়ে।
ইপিনে, বৰপেটা চিকিৎসা মহাবিদ্যালয় হাস্পাতালৰ জ্যেষ্ঠ চিকিৎসা বিষয়া ডাঃ শ্বহিদুল ইছলাম, দালাল ইছমাইল হুছেইন, একাব্বৰ আলী আৰু মফিদা বেগমক ইতিমধ্যে শুকুৰবাৰে আদালতে সাদিনৰ আৰক্ষীৰ জিম্মাত দিছে।
আৰক্ষীয়ে ইতিমধ্যে ধৃত লোকসকলৰপৰা বেংকৰ পাছবুককে ধৰি বিভিন্ন নথি-পত্ৰ জব্দ কৰিছে।
আনহাতে, বৰপেটা জিলাৰ আৰক্ষী অধীক্ষক ভায়োলেট বৰুৱাই শনিবাৰে বৰপেটা সদৰ আৰক্ষী থানাত আয়োজিত এখন সংবাদমেলত বীমা কেলেংকাৰিৰ বৃহৎ চক্ৰটোৰ সৈতে জড়িতসকলক গ্ৰেপ্তাৰ কৰাৰ বাবে আৰক্ষীয়ে পৰ্যায়ক্ৰমে ব্যৱস্থা গ্ৰহণ কৰাৰ কথা জানিবলৈ দিয়ে।
বৰুৱাই জানিবলৈ দিয়া মতে, বৃহৎসংখ্যক টকাৰ কেলেংকাৰি কৰা চক্ৰটোৱে জীৱন বীমা নিগম, বাজাজ এলায়েঞ্চ, আই চি আই চি প্ৰুডেনচিয়েল, পি এন বি মেক্স লাইফ, এছ বি আই লাইফ, এইছ ডি এফ চি লাইফ, ৰিলায়েন্স, মেক্স লাইফ আদিকে ধৰি বিভিন্ন বীমা কোম্পানীত জড়িত হৈ পৰিছে।
উল্লেখ্য যে, এটা বৃহৎ চক্ৰই ৰাজ্যৰ বিভিন্ন অঞ্চলৰ মৃত ব্যক্তিৰ নামত ভুৱা বীমা প’লিচী খুলি বিভিন্ন বীমা প্ৰতিষ্ঠানৰপৰা কোটি কোটি টকা সৰকাই নিছে। দিনদিয়েক পূৰ্বে গুৱাহাটী উচ্চ ন্যায়ালয়ত দাখিল কৰা এখন ৰাজহুৱা স্বাৰ্থজড়িত আবেদনত ৰাজ্যখনত প্ৰায় ৫০০ কোটি টকাৰ বীমা কেলেংকাৰি সংঘটিত হোৱাৰ তথ্য পোহৰলৈ আহিছিল।
