যোৰহাট জিলা ক্ৰীড়া সন্থাৰ উদ্যোগত চলা ‘এ’ ডিভিজন ফুটবল লীগৰ খিতাপ দখল কৰিবলৈ সক্ষম হয় বৰভেটা স্প’ৰ্টছ ক্লাবে। ডিফেণ্ডিং চেম্পিয়ন যোৰহাট টাউন ক্লাবক পৰাস্ত কৰি বৰভেটা স্প’ৰ্টছ ক্লাবে এই কৃতিত্বৰ অধিকাৰী হয়।
উল্লেখ্য যে শুকুৰবাৰে যোৰহাট ষ্টেডিয়ামত অনুষ্ঠিত হোৱা লীগৰ চূড়ান্ত খেলত বৰভেটাই টাউন ক্লাবক একমাত্ৰ গ’লৰ ব্যৱধানত পৰাস্ত কৰি চেম্পিয়ন হয়।
তীব্ৰ উত্তেজনাপূৰ্ণ ফাইনেল মেচখনৰ আৰম্ভণিৰ পৰাই দুয়ো দলে আক্ৰমণাত্মক খেল প্ৰদৰ্শন কৰে যদিও প্ৰথম সফলতা লাভ কৰে বৰভেটা স্প’ৰ্টছ ক্লাবে। আৰু মেচখনত এইটোৱে একমাত্ৰ আৰু নিৰ্ণায়ক গ’লৰ ভূমিকা গ্ৰহণ কৰে।
উল্লেখ্য যে বিগত দুখন খেলত হেটট্ৰিক কৰা কুশল শইকীয়াই খেলৰ ৬৪ মিনিটত বৰভেটাৰ হৈ উক্ত বিজয়সূচক গ’লটো দিয়ে। আৰু এইদৰে ডিফেণ্ডিং চেম্পিয়ন টাউন ক্লাবক পৰাস্ত কৰি ২০১৮-১৯ বৰ্ষৰ ‘এ’ ডিভিজনৰ খিতাপৰ অধিকাৰী হয় বৰভেটা স্প’ৰ্টছ ক্লাব।
খেলৰ শেষত বঁটাসমূহ বিতৰণ কৰে ভাস্কৰ বৰুৱা, মৃদুল দত্ত, ননী দত্ত আৰু গুণীন গগৈয়ে। প্ৰতিযোগিতাৰ শ্ৰেষ্ঠ খেলুৱৈ আৰু ফাইনেলৰ শ্ৰেষ্ঠ খেলুৱৈৰ বঁটা লাভ কৰে ক্ৰমে ভিক্টোৰিয়া ক্লাবৰ দেৱজিৎ বৰা আৰু বৰভেটাৰ বুন নেৰিম চৰায়ে।