এক সীমিত অভাৰৰ শৃংখলাৰ বাবে আয়াৰলেণ্ড ভ্ৰমণ কৰিব ভাৰতীয় ক্ৰিকেট দলে। আগন্তুক ৱেষ্ট ইণ্ডিজ ভ্ৰমণ সামৰিয়েই ভাৰতীয় দলটো এই টি-২০ শৃংখলাটোৰ বাবে আয়াৰলেণ্ডত উপস্থিত হ’ব। আন্ত:ৰাষ্ট্ৰীয় ক্ৰিকেট কাউন্সিল, চমুকৈ আইচিচিয়ে কালি এই সূচী সদৰী কৰিছে।
১৮ আগষ্টৰ পৰা ২৩ আগষ্টৰ ভিতৰত তিনিখন মেচৰ শৃংখলাটো অনুষ্ঠিত হ’ব। শৃংখলাটোৰ আটাইকেইখন মেচ মালাহাইডত আয়োজন কৰা হ’ব। ভাৰতীয় ক্ৰিকেট দলক এই ভ্ৰমণৰ বাবে আদৰণি জনাইছে ক্ৰিকেট আয়াৰলেণ্ডে।
ক্ৰিকেট আয়াৰলেণ্ডৰ মুখ্য কাৰ্যবাহী ৱাৰেন ডুট্ৰমে এক বিবৃতি যোগে ১২ মাহৰ ভিতৰত দ্বিতীয়বাৰৰ বাবে ভাৰতীয় দলক আয়াৰলেণ্ডলৈ আদৰিবলৈ পাই ক্ৰিকেট আয়াৰলেণ্ড আনন্দিত হোৱা বুলি উল্লেখ কৰে।
বিগত বৰ্ষতো দুখন মেচৰ শৃংখলাৰ বাবে আয়াৰলেণ্ড ভ্ৰমণ কৰিছিল ভাৰতে। উক্ত শৃংখলাৰ কথা সুঁৱৰি ডুট্ৰমে কয় যে বিগত বৰ্ষৰ দুইখন মেচৰে সম্পূৰ্ণ টিকট ক্ৰয় কৰি অনুৰাগীয়ে খেল উপভোগ কৰিছিল।
গতিকে এই বছৰ তিনিখন মেচৰ শৃংখলাটো অধিক অনুৰাগীয়ে উপভোগ কৰাৰ সুযোগ পাব বুলি তেওঁ মন্তব্য কৰে। ডুট্ৰমে লগতে ভাৰতীয় দলৰ ব্যস্ত ভ্ৰমণসূচীত আয়াৰলেণ্ডকো অন্তৰ্ভুক্ত কৰাৰ বাবে বিচিচিআইক ধন্যবাদ জনায়।
এই শৃংখলাৰ ঘোষিত সূচী অনুসৰি ১৮ আগষ্টত শৃংখলাৰ প্ৰথমখন মেচ অনুষ্ঠিত হ’ব। আনহাতে দ্বিতীয় আৰু তৃতীয় তথা অন্তিম মেচ ক্ৰমে ২০ আৰু ২৩ আগষ্টত অনুষ্ঠিত হ’ব।
উল্লেখ্য যে, এমাহৰ বিৰতিৰ অন্তত অহা ১২ জুলাইৰ পৰা ৱেষ্ট ইণ্ডিজ ভ্ৰমণ আৰম্ভ কৰিব ভাৰতীয় দলে। এমাহ যোৰা এই ভ্ৰমণত ভাৰতে ঘৰুৱা দলটোৰ বিপক্ষে দুখন টেষ্ট, তিনিখন এদিনীয়া আৰু ৫ খন টি-২০ মেচত অৱতীৰ্ণ হ’ব।
১৩ আগষ্টত এই ভ্ৰমণৰ অন্ত পৰাৰ পিছতে ১৮ আগষ্টৰ পৰা আৰম্ভ হ’বলগীয়া শৃংখলাৰ বাবে আয়াৰলেণ্ডলৈ ৰাওনা হ’ব ভাৰতীয় দল।
লক্ষণীয়ভাৱে, সেই ভ্ৰমণৰ পিছতে ৩১ আগষ্টৰ পৰা আৰম্ভ হ’ব এছিয়া কাপ। আৰু তাৰ পিছতে ৫ অক্টোবৰৰ পৰা আৰম্ভ হ’ব এদিনীয়া বিশ্বকাপ। এনে পৰিস্থিতিত আয়াৰলেণ্ড ভ্ৰমণৰ বাবে ভাৰতীয় দলৰ জ্যেষ্ঠ খেলুৱৈসকলক বিশ্ৰাম দিয়াৰ সম্ভাৱনা আছে।
