প্ৰধান মন্ত্ৰী নৰেন্দ্ৰ মোদীয়ে লকডাউনৰ সময়সীমা বৃদ্ধি কৰাৰ বাবে বি চি চি আইয়ে আই পি এল ফ্ৰেঞ্চাইজিসকলক অনিৰ্দিষ্ট কাললৈ লীগখন স্থগিত কৰা হ’ল বুলি জনায়।
ক’ৰ’নাৰ ভয়াবহ ৰূপ তথা লকডাউনৰ বৃদ্ধিয়ে এইবাৰ আই পি এল অনুষ্ঠিত কৰাত বাধাৰ সৃষ্টি কৰিলে। অৱশ্যে এই পৰ্যন্ত বি চি চি আইয়ে আই পি এল অনিৰ্দিষ্ট কাললৈ স্থগিত ৰখা বুলি কোনো আনুষ্ঠানিক ঘোষণ কৰা নাই।
ইফালে এটা সূত্ৰৰ পৰা জানিব পৰা মতে বি চি চি আইয়ে প্ৰত্যেক ফ্ৰেঞ্চাইজি, ব্ৰডকাষ্টাৰৰ লগতে আই পি এলৰ লগত জৰিত শ্বেয়াৰহল্ডাৰসকলক এই বিষয়ে অৱগত কৰিছে।
এই সন্দৰ্ভত নিজৰ প্ৰকাশৰ বাবে অনিচ্ছুক এটা ফ্ৰেঞ্চাইজিৰ এগৰাকী বিষয়াই পি টি আইৰ আগত কয়, ‘বৰ্তমান আই পি এল স্থগিত কৰা বুলি বি চি চি আইয়ে আমাক জনাই দিছে। কিন্তু আমি আশা কৰি আছো যে চলিত বছৰৰে শেষৰ ফালে কিবা এটা হ’ব’।
উল্লেখ্য যে আই পি এল অনুষ্ঠছিত কৰাক লৈ বি চি চি আইৰ অধ্যক্ষ সৌৰভ গাংগুলী আৰু সচিব জয় শ্বাহে চৰকাৰৰ নিৰ্ধেশৰ বাবে বাট চাই আছিল। কিন্তু মোদীৰ লকডাউন বৃদ্ধিৰ ঘোষণাই এপ্ৰিল-মে’ত আই পি এল অনুষ্ঠিত হোৱাৰ আশাও নিৰ্বাপিত হ’ল।
উল্লেখ্য যে গাংগুলীয়ে স্পষ্ট কৰি দিছিল যে দেশে যি সংকটৰ সন্মুখীন হৈছে সেই সময়ত খেল ডাঙৰ নহয়।
চলিত বৰ্ষৰ আই পি এ ২৯ মাৰ্চৰ পৰা আৰম্ভ হোৱাৰ কথা আছিল যদিও ক’ৰ’নাৰ ভয়াবহতাৰ প্ৰতি লক্ষ্য ৰাখি প্ৰথন পৰ্যায়ত লীগখন ১৫ এপ্ৰিললৈকে পিছুৱাই দিয়া হৈছিল।
এতিয়া চলিত বছৰৰ আই পি এল অনুষ্ঠিত হোৱাৰ একমাত্ৰ বিকল্প সময় হৈছে ছেপ্তেম্বৰৰ পৰা নবেম্বৰ মাহৰ ভিতৰত, যদিহে অক্টোবৰত অষ্ট্ৰেলিয়াত অনুষ্ঠিত হ’বলগীয়া টি-২০ বিশ্বকাপ পিছুৱাই দিয়া হয়।