বাংলাদেশ চৰকাৰে প্ৰতি বছৰে ৫গৰাকী ব্যক্তি অথবা অনুষ্ঠানক মাডাৰ অব হিউমেনিটী এৱাৰ্ড’ প্ৰদান কৰিব। আজি বাংলাদেশৰ কেবিনেটৰ এখন নিয়মীয়া বৈঠকত ‘মাডাৰ অব হিউমেনিটী ছচিয়েল ৱেলফেয়াৰ পলিচী’ৰ খচৰাখনত অনুমোদন জনোৱা হয়।
কেবিনেটৰ সচিব মহম্মদ ছাইফুল আলমে সাংবাদিকৰ আগত প্ৰকাশ কৰিছে যে মাডাৰ অব হিউমেনিটী শিৰোনামাই প্ৰধান মন্ত্ৰী শ্বেইখ হাছিনাক বুজায়।
প্ৰতি বছৰে এই বঁটাটো ৫টা বিভিন্ন শাখাত সমাজৰ কল্যাণৰ হকে আগবঢ়োৱা অসামান্য অৱদানৰ বাবে ৫গৰাকী ব্যক্তি অথবা অনুষ্ঠানলৈ এই বঁটা আগবঢ়োৱা হ’ব।
প্ৰত্যেকগৰাকী বঁটা বিজেতাক এটা সোণৰ পদক, এটা বঁটাটোৰ স্মাৰক প্ৰতিলিপি, এখন মানপত্ৰ আৰু ২লাখ ‘টাকা’ প্ৰদান কৰা হ’ব। প্ৰতি বছৰ জানুৱাৰি মাহৰ ২ তাৰিখ অৰ্থাৎ বাংলাদেশৰ ৰাষ্ট্ৰীয় সমাজ কল্যাণ দিৱসৰ দিনা এই বঁটা প্ৰদান কৰা হ’ব।
উল্লেখ্য যে ম্যানমাৰৰ পৰা প্ৰাণ লৈ পলায়ন কৰি বাংলাদেশলৈ অহা লাখ লাখ ৰহিঙীয়া শৰণাৰ্থীক আশ্ৰয় দিয়াৰ পাছত প্ৰধান মন্ত্ৰীগৰাকীক তেওঁৰ দেশত ‘মাডাৰ অব হিউমেনিটী’ আখ্যা দিয়া হৈছে।
