পশ্চিমবংগৰ নিৰ্বাচন কেৱল নিৰ্বাচন নহয়, এয়া বংগৰ জনতাৰ বাবে আত্মাৰ সুৰক্ষাৰ যুঁজ। এই মন্তব্য কংগ্ৰেছৰ নেতা ৰাহুল গান্ধীৰ।
পশ্চিমবংগত নিজৰ প্ৰথম খন নিৰ্বাচনী সভাত ভাষণ দি ৰাহুল গান্ধীয়ে কয় যে এই নিৰ্বাচনৰ জৰিয়তে বংগবাসীয়ে ভাতৃত্ববোধক জীয়াই ৰখাৰ সুযোগ লাভ কৰিছে।
উত্তৰ দিনাজপুৰৰ নিৰ্বাচনী সভাত অংশগ্ৰহণ কৰি ৰাহুল গান্ধীয়ে কয় যে বিজেপিয়ে পশ্চিমবংগত ঘৃণা বিয়পাই দিছে।
এনে পৰিবেশ সৃষ্টিৰ জৰিয়তে বিজেপিয়ে বংগত বৰ্তি থকা সাতামপুৰুষীয়া ভাতৃত্ব বোধৰ এনাজৰীডাল নিশকতীয়া কৰি তোলাৰ চেষ্টা চলাইছে।
বংগবাসীয়ে বিজেপিৰ এনে কূট-কৌশল ব্যৰ্থ কৰি বংগৰ আত্মাক ৰক্ষা কৰিব লাগিব আৰু ভাতৃত্ববোধৰ এনাজৰীডালো নিকপকপীয়া কৰি ৰাখিব লাগিব বুলি ৰাহুল গান্ধীয়ে মন্তব্য কৰে।
বংগত বিজেপিয়ে জ্বলোৱা হিংসাৰ জুইকুৰাত প্ৰধানমন্ত্ৰী নৰেন্দ্ৰ মোদী অথবা কেন্দ্ৰীয় গৃহ মন্ত্ৰী অমিত শ্বাহ জ্বলি ভষ্মীভূত নহয়, এই জুইত সাধাৰণ মানুহহে জাহ যাব বুলি ৰাহুল গান্ধীয়ে তাৎপৰ্যপূৰ্ণ মন্তব্য কৰে।
ৰাহুল গান্ধীয়ে লগতে কয় যে সোণাৰ বাংলাৰ কথা কোৱা মোদীয়ে উত্তৰ প্ৰদেশ খনকো সুন্দৰ কৰি গঢ়ি তোলাৰ অংগীকাৰ কৰিছিল।
কিন্তু উত্তৰ প্ৰদেশত এতিয়া চিকিৎসালয়ত মানুহেৰে ভৰি পৰিছে, আইন শৃংখলাৰো লক্ষ্যণীয় ভাবে অৱনতি ঘটিছে।
মোদীয়ে কেৱল অসূয়া-অপ্ৰীতি বৃদ্ধি কৰি অহা বুলিও ৰাহুলে কয়।
ৰাহুল গান্ধীয়ে তেওঁৰ ভাষণত মোদীয়ে ঘোষণা কৰা বিমুদ্ৰাকৰণ আৰু লকডাউনে কিদৰে সাধাৰণ মানুহৰ জীৱনলৈ অমানিশা নমাই আনিছে সেয়াও উল্লেখ কৰে।
