মাত্ৰ শ্ল’গানতে সীমাবদ্ধ আছে কেন্দ্ৰৰ অভিনৱ ‘বেটী বচাও, বেটী পঢ়াও’ অভিযান। শাসনলৈ আহিয়েই ‘বেটী বচাও, বেটী পঢ়াও’ শ্ল’গান আওৰাই নাৰী সুৰক্ষা তথা নাৰী শিক্ষাৰ ঢাকঢোল কোবোৱা বিজেপি নেতৃত্বাধীন চৰকাৰখনৰ দিনত পিছে শ্ল’গানৰ ওলোটাহে হ’ল বাস্তৱিক পৰিস্থিতি।
খোদ নেচনেল ক্ৰাইম ৰেকৰ্ডছ ব্যুৰোৰ প্ৰতিবেদনেই ফাদিল কৰিছে দেশত নাৰীৰ ওপৰত হোৱা অত্যাচাৰ ক্ৰমাগতভাৱে বৃদ্ধি পোৱাৰ তথ্য। এই প্ৰতিবেদনেই কেন্দ্ৰৰ ‘বেটী বচাও, বেটী পঢ়াও’ অভিযানৰ চমক অসাৰ প্ৰতিপন্ন কৰিছে।
শেহতীয়াকৈ পোহৰলৈ অহা আন এক ঘটনাই দেশৰ নাৰী সুৰক্ষাৰ ব্যৰ্থতাক সম্পূৰ্ণকৈ উদঙাই দিছে। এইবাৰ যৌতুকৰ দাবীৰে শাৰীৰিক নিৰ্যাতনৰ অভিযোগ তুলিছে খোদ ‘বেটী বচাও, বেটী পঢ়াও’ অভিযানৰ এগৰাকী ব্ৰেণ্ড এম্বেছাদৰে।
‘বেটী বচাও, বেটী পঢ়াও’ৰ ব্ৰেণ্ড এম্বেছাদৰ মধ্যপ্ৰদেশৰ গোৱালিয়ৰ জিলাৰ ৰাণী ৰানা নামৰ এগৰাকী মহিলা মল্লযুঁজাৰুৱে স্বামীগৃহৰ বিৰুদ্ধে তুলিছে যৌতুক দাবী কৰি শাৰীৰিকভাৱে হাৰাশাস্তি কৰাৰ অভিযোগ। ইতিমধ্যে মল্লযুঁজাৰুগৰাকীয়ে স্থানীয় আৰক্ষী থানাত এজাহাৰ দাখিল কৰিছে।
মল্লযুঁজাৰুগৰাকীয়ে অভিযোগ কৰা মতে, যৌতুকৰ বাবে তেওঁক স্বামীৰ পৰিয়ালে প্ৰহাৰ কৰিছে আৰু ইয়াৰ ফলত তেওঁৰ অনুশীলনত বিৰূপ প্ৰভাৱ পৰিছে। কেৱল সিমানেই নহয়, তেওঁক ঘৰৰ পৰা উলিয়াই পঠোৱা বুলিও অভিযোগ উত্থাপন হৈছে।
আৰক্ষীৰ ভাষ্য মতে, ৰাণাৰ স্বামী এটা জিমৰ পৰিচালক। জিম খুলিবলৈ তেওঁ ৰাণাক ধন দাবী কৰি আহিছিল আৰু ধন যোগান নধৰাৰ বাবে ৰাণাক মাৰপিট কৰিছে। এনে নিৰ্যাতনৰ বাবে বৰ্তমান পিতৃগৃহত থাকিবলৈ বাধ্য হৈছে ৰাণা।
এই সন্দৰ্ভত এগৰাকী শীৰ্ষ আৰক্ষী বিষয়াই জানিবলৈ দিয়া মতে, ৰাণী ৰাণাৰ এজাহাৰৰ ভিত্তিত আৰক্ষীয়ে তেওঁৰ স্বামী, শাহুৱেক আৰু শহুৰেকৰ বিৰুদ্ধে বিভিন্ন ধাৰাত গোচৰ ৰুজু কৰি বিষয়টোৰ তদন্ত আৰম্ভ কৰিছে বুলি আৰক্ষী বিষয়াগৰাকীয়ে জানিবলৈ দিয়ে।
লগতে পঢ়কঃ কাজিৰঙাত উদ্ধাৰ গড়ৰ মৃতদেহ, চোৰাং চিকাৰক অস্বীকাৰ বন বিভাগৰ
লগতে পঢ়কঃ প্ৰস্তাৱিত পাম খেতিয়ে অসমত মৰুভূমি সৃষ্টি কৰিবঃ ডি ৱাই এফ আই
লগতে পঢ়কঃ উচ্চতম ন্যায়ালয়ৰ যুক্তিসংগত ৰায়ৰ বাবে অধিক জিলিকি উঠিব নেকি ৰাহুল গান্ধী?
