আভ্যন্তৰীণ কন্দল আৰু জনসাধাৰণৰ মাজত ক্ৰমশ: হেৰুৱাই পেলোৱা সমৰ্থনৰ ফলশ্ৰুতিত ভাৰতীয় ৰাজনীতিত আশ্চৰ্যজনকভাৱে দুৰ্বল হৈ পৰা এসময়ৰ প্ৰতিপত্তিশীল ভাৰতীয় জাতীয় কংগ্ৰেছে এই বিপৰ্যয়ৰ পৰা মুক্ত হৈ দেশীয় ৰাজনীতিত পূৰ্ণশক্তিৰে ঠন ধৰি উঠাৰ লক্ষ্যৰে গ্ৰহণ কৰা ‘ভাৰত জোড়ো যাত্ৰা’ শীৰ্ষক জনসম্পৰ্কমুখী অভিযানে প্ৰায় তিনিমাহ সম্পূৰ্ণ কৰিছে।
দলৰ শীৰ্ষ নেতা ৰাহুল গান্ধীৰ নেতৃত্বত অব্যাহত থকা কংগ্ৰেছৰ এই ভাৰত জোড়ো যাত্ৰাই অকুণ্ঠ জনসমৰ্থন লাভ কৰিছে। পদযাত্ৰাৰ সময়ত কংগ্ৰেছ নেতা-কৰ্মীসকলক সহযোগিতা আগবঢ়াই বৃহৎ সংখ্যক জনসাধাৰণে যাত্ৰাত অংশগ্ৰহণ কৰিছে।
বৰ্তমান মধ্য প্ৰদেশৰ মাজেৰে বৰ্তমান যাত্ৰা অব্যাহত ৰাখিছে ৰাহুল গান্ধী নেতৃত্বাধীন পদযাত্ৰাকাৰী দলটোৱে। যাত্ৰাৰ মাজতে আজি কেন্দ্ৰৰ শাসনাধিষ্ঠ বিজেপি চৰকাৰৰ বিৰুদ্ধে সৰৱ হৈ পৰে কংগ্ৰেছ নেতা ৰাহুল গান্ধী।
আজি প্ৰধানমন্ত্ৰী নৰেন্দ্ৰ মোডীক পেট্ৰল, ডিজেল আৰু ৰন্ধন গেছৰ উচ্চ মূল্যক লৈ আক্ৰমণ কৰি গান্ধীয়ে ‘ভাৰত জোড়ো যাত্ৰা’ মোদীৰ “লুট-তন্ত্ৰ”ৰ বিৰুদ্ধে ‘লোকতন্ত্ৰ’ৰ কণ্ঠস্বৰ আখ্যা দিয়ে।
বিশ্বজুৰি খাৰুৱা তেলৰ মূল্য যথেষ্ট হ্ৰাস পোৱাৰ পিছতো দেশত পেট্ৰ’ল-ডিজেলৰ মূল্য হ্ৰাস নকৰাৰ বাবে কংগ্ৰেছে চৰকাৰক আক্ৰমণ চলাই আহিছে। আজি এই বিষয়ত পুনৰ সোচ্চাৰ হৈ পৰে ৰাহুল গান্ধী।
“খাৰুৱা তেলৰ ২৫ শতাংশ মূল্য হ্ৰাস। এল পি জি- ৰ ৪০ শতাংশ মূল্য হ্ৰাস। এয়া আন্তঃৰাষ্ট্ৰীয় মূল্যৰ তথ্য। ইয়াৰ পিছতো পেট্ৰ’ল, ডিজেল আৰু গেছ চিলিণ্ডাৰৰ দাম কিয় দেশত হ্ৰাস হোৱা নাই?” বুলি টুইটযোগে প্ৰশ্ন কৰে গান্ধীয়ে।
এই প্ৰসঙ্গতে ৰাহুল গান্ধীয়ে মোদী নেতৃত্বাধীন বিজেপি চৰকাৰে ‘লুট-তন্ত্ৰ’ চলোৱা বুলি অভিযোগ কৰি কয়, “প্ৰধানমন্ত্ৰী মহোদয়, ভাৰত জোড়ো যাত্ৰা আপোনাৰ ‘লুট-তন্ত্ৰ’ৰ বিৰুদ্ধে ‘লোকতন্ত্ৰ’ৰ কণ্ঠ। আপুনি উত্তৰ দিব লাগিব।”
উল্লেখ্য যে বৃহস্পতিবাৰেও ৰাহুল গান্ধীয়ে ইন্ধনৰ মূল্যৰ বিষয়ক লৈ চৰকাৰক আক্ৰমণ কৰি ‘জনসাধাৰণে মুদ্ৰাস্ফীতিৰ সমস্যাত ভুগি থকাৰ সময়তে প্ৰধানমন্ত্ৰীয়ে কৰৰ পৰা ধন আদায় কৰাত ব্যস্ত’ বুলি অভিযোগ উত্থাপন কৰিছিল।
