চলচ্চিত্ৰ প্ৰেমীসকলৰ বাবে এক সুখৱৰ। কিংবদন্তি শিল্পী, অসমীয়াৰ হিয়াৰ আমঠু ড০ ভূপেন হাজৰিকা পৰিচালিত আৰু এক কালজয়ী কাহিনীৰ আধাৰত নিৰ্মিত চলচ্চিত্ৰ ‘ছিৰাজ’ শুকুৰবাৰে গুৱাহাটী প্ৰেছ ক্লাৱত প্ৰদৰ্শন কৰা হ’ব।
আবেলি ৩-৩০ বজাৰ পৰা চলচ্চিত্ৰখনৰ প্ৰদৰ্শন কৰা হ’ব। ১৯৮৮ চনত মুক্তিপ্ৰাপ্ত এই ছবিখন প্ৰযোজনা কৰিছিল ৰমান বি মেহতাই। পৰিচলনাৰ উপৰি ড০ ভুপেন হাজৰিকাই সংগীত পৰিচালনা কৰা ছবিখনত আন এগৰাকী কিংবদন্তি কণ্ঠশিল্পী কোকিলকণ্ঠী লতা মংগেশকাৰেও এটা গানত কণ্ঠদান কৰিছিল।
চলচ্চিত্ৰখনৰ মুখ্য চৰিত্ৰত অভিনয় কৰিছে প্ৰসিদ্ধ অভিনেতা নিপন গোস্বামীয়ে। ছবিখনৰ আন চৰিত্ৰত অভিনয় কৰা শিল্পীসকলৰ ভিতৰত আছে মৃদুলা বৰুৱা, পূৰবী শৰ্মা আৰু ৰূপক বৰুৱা।
ইয়াৰ পূৰ্বে প্ৰথম ক’লা-বগা ছিৰাজ চলচ্চিত্ৰখন যুটীয়াভাৱে পৰিচালনা কৰিছিল বিষ্ণু ৰাভা আৰু ফনী শৰ্মাই। এইখন ১৯৪৮ চনত মুক্তি লাভ কৰিছিল আৰু ছবিখনৰ মুখ্য চৰিত্ৰত অভিনয় কৰিছিল ফনী শৰ্মাই।
প্ৰথমখন ক’লা-বগা চলচ্চিত্ৰ ছিৰাজৰ সংগীত পৰিচালনা কৰিছিল বিষ্ণু ৰাভাই। তদুপৰি, ছবিখনত অভিনয় কৰিছিল ফনী শৰ্মা, মোহিনী, নিশান আদি শিল্পীসকলে। শিল্পী অজিত সিংহই ১৯৪৮ চনত মুক্তি ‘ছিৰাজ’ৰ ৰফিকৰ চৰিত্ৰটোত অভিনয় কৰিছিল।
উল্লেখযোগ্য যে লক্ষীধৰ শৰ্মাৰ এটা কালজয়ী চুটিগল্প ‘ছিৰাজ’ৰ প্ৰথমতে নাট্যৰূপ দিছিল ফনী শৰ্মাই। বিভিন্ন নাট্যমঞ্চত নাটকখন মঞ্চস্থ কৰা হৈছিল আৰু দৰ্শকৰ বিপুল সমাদৰ লাভ কৰিছিল।
