ভুটানৰ জনপ্ৰিয় টিকটকাৰ ডৰ্জী ছ’মোক শাৰীৰিক আক্ৰমণৰ দুটা গোচৰত দোষী সাব্যস্ত কৰি থিম্ফু জিলা আদালতে ২৫ ডিচেম্বৰত দুবছৰ আঠ মাহৰ কাৰাদণ্ড বিহে। আদালতে ভুটান দণ্ডবিধিৰ ১৫৮ নং ধাৰাৰ অধীনত তেওঁক দোষী সাব্যস্ত কৰিছে। আদালতৰ নিৰ্দেশত কৰা মানসিক স্বাস্থ্যৰ মূল্যায়নত তেওঁৰ কোনো মানসিক বিকাৰ ধৰা নপৰিল, যাৰ ফলত মানসিক অসুস্থতাৰ দোহাই দি ৰেহাই বিচৰা তেওঁৰ দাবী আদালতে খাৰিজ কৰে।
এই ঘটনা ২০২৫ চনৰ ২৪ জুনত কুয়েনচেলফড্ৰাঙত (Kuenselphodrang) সংঘটিত হৈছিল। পূজ্য জে খেনপোৰ (Je Khenpo) উদ্যোগত অনুষ্ঠিত ১৪ দিনীয়া ‘ম’নলাম চেনমো’ৰ (Monlam Chenmo) অন্তিম দিনা ভক্ত আৰু ‘দেশুং’ (Desuung) জোৱানসকলে আশীৰ্বাদ ল’বলৈ শাৰী পাতি আছিল। সেই সময়তে ডৰ্জী ছ’মোৱে নিৰাপত্তা ব্যৱস্থা ভংগ কৰি প্ৰাৰ্থনা গৃহত জোৰকৈ প্ৰৱেশ কৰিবলৈ চেষ্টা কৰে। কৰ্তব্যৰত আৰক্ষী আৰু দেশুং জোৱানে তেওঁক বাধা দিবলৈ চেষ্টা কৰোঁতে অভিযুক্তই শাৰীৰিক বল প্ৰয়োগ কৰে, যাৰ ফলত দুজন দেশুং জোৱানৰ শৰীৰত আঁচোৰ আৰু নখৰ আঘাত লাগে।
প্ৰত্যক্ষদৰ্শীৰ ভাষ্য আৰু জিগমে ডৰ্জী ৱাংচুক নেচনেল ৰেফাৰেল চিকিৎসালয়ৰ চিকিৎসা প্ৰতিবেদনে এই আঘাতসমূহ নিশ্চিত কৰিছে। আদালতে চিচিটিভি (CCTV) ফুটেজ পৰ্যালোচনা কৰি জানিব পাৰে যে আৰক্ষী আৰু দেশুং কৰ্মীসকলে দণ্ডবিধিৰ ৯৫(গ) ধাৰাৰ অধীনতহে বল ব্যৱহাৰ কৰিছিল আৰু তেওঁলোকে কোনো ধৰণৰ অতিৰিক্ত বল প্ৰয়োগ বা আক্ৰমণ কৰা নাছিল।
ডৰ্জী ছ’মোৱে আৰক্ষীয়েহে তেওঁক আক্ৰমণ কৰা বুলি ওলোটা অভিযোগ উত্থাপন কৰিছিল আৰু মানসিক ৰোগৰ দোহাই দি ৰেহাই বিচাৰিছিল। কিন্তু স্বাস্থ্য পৰীক্ষাত তেওঁৰ মানসিক অৱস্থা স্বাভাৱিক বুলি প্ৰমাণিত হয়। উল্লেখযোগ্য যে, তেওঁ পূৰ্বেও আন অপৰাধত দোষী সাব্যস্ত হোৱাৰ পৰিপ্ৰেক্ষিতত আদালতে দণ্ডবিধিৰ ১৫৯(খ) আৰু ২৪(ক) ধাৰা প্ৰয়োগ কৰি শাস্তিৰ ম্যাদ বৃদ্ধি কৰে। ইতিমধ্যে ২৮ দিন জিম্মাত থকাৰ বাবে এতিয়া তেওঁ বাকী দুবছৰ সাত মাহ দুদিনৰ কাৰাদণ্ড ভোগ কৰিব লাগিব বুলি আদালতে ৰায় দান কৰিছে।
