সমগ্ৰ বিশ্বৰ ৪৮ লাখৰো অধিক টুইটাৰ হেণ্ডলৰ পৰা আমেৰিকাৰ ৰাষ্ট্ৰপতিক ফল’ কৰা হয়। সেইদৰে আমেৰিকাৰ ৰাষ্ট্ৰপতিৰ একাউন্টে ফল’ কৰে ১২গৰাকীক।
কিন্তু এই ১২ গৰাকীৰ মাজত স্থান লাভ কৰিছে একমাত্ৰ এগৰাকী চেলিব্ৰেটিয়েহে। ইয়াৰ আঁৰত আছে আন এক কাহিনী।
আমেৰিকাৰ ৰাষ্ট্ৰপতিৰ অফিচিয়েল টুইটাৰ হেণ্ডল দ্য প্ৰেছিডেন্ট অফ দ্য য়ুনাইটেড ষ্টেটছ বা চমুকৈ ‘@POTUS’ৰ একাউন্টে এতিয়া যি ১২গৰাকী ব্যক্তিক ফল’ কৰে তাৰ মাজত আছে ৰাষ্ট্ৰপতি জো বিডেনৰ পত্নী জিল বিডেন, উপ ৰাষ্ট্ৰপতি কমলা হেৰিছ আৰু তেওঁৰ কেইগৰাকীমান সহযোগী, হোৱাইট হাউছৰ অফিচিয়েল হেণ্ডল আৰু চেলিব্ৰেটি মডেল ক্ৰিচি টেইজেন।
আচৰিত হ’বলগীয়া এই ফল’ৰ কাৰণ হৈছে ক্ৰিচিৰ সৰৱ মুখৰতা। কিয়নো তেওঁৰ তীব্ৰ সমালোচনাৰ সন্মুখীন হ’বলগীয়া হৈছিল প্ৰাক্তন ৰাষ্ট্ৰপতি ডোনাল্ড ট্ৰাম্প।
ট্ৰাম্পে তেওঁক এবাৰ ‘লেতেৰা মুখৰ মহিলা’ বুলি নিন্দাও কৰিছিল। আনকি ট্ৰাম্পৰ কাৰ্যকালৰ প্ৰায় ৪ বছৰেই তেওঁক ‘@POTUS’ৰ পৰা ব্লক কৰি ৰখা হৈছিল। পিচে, নতুন ৰাষ্ট্ৰপতি অহাৰ পাছত ছবিখন সম্পূৰ্ণ ওলোটা হৈ গ’ল।
নতুন ৰাষ্ট্ৰপতিৰ দায়িত্ব লোৱাৰ পাছতেই ক্ৰিচিয়ে জো বিডেনক সম্বোধন কৰি টুইট কৰে। তেওঁক এবাৰ ‘@POTUS’ৰ একাউন্টৰ পৰা আনব্লক কৰাৰ বাবে আহ্বান জনায়।
hello @joebiden I have been blocked by the president for four years can I get a follow plz
— chrissy teigen (@chrissyteigen) January 20, 2021
ক্ৰিচিৰ আহ্বানে কেবল কাম দিয়াই নহয়, তেওঁ এনেকুৱা এক সন্মান পালে যিটো বিশ্বৰ সকলো চেলিব্ৰেটিৰ বাবে এক ঈৰ্ষণীয় বিষয়। ‘@POTUS’ৰ পৰা ক্ৰিচিৰ ভেৰিফাইড টুইটাৰ হেণ্ডল ফল’ কৰা হয়।
ক্ৰিচিয়ে সেই ছবি প’ষ্ট কৰি নিজৰ আনন্দ প্ৰকাশ কৰিছে।