এপলৰ গ্ৰাহকক ডাঙৰ মাধমাৰ: ভাৰতত ১ লাখ টকালৈকে বৃদ্ধি পালে মেকবুক আৰু আইপেডৰ দাম

ভাৰতৰ এপল গ্ৰাহকসকলৰ বাবে এটা অতি বেয়া খবৰ আহি পৰিছে। এপল কোম্পানীয়ে ভাৰতত নিজৰ মেকবুক আৰু আইপেডৰ দাম এক বুজন পৰিমাণে বৃদ্ধি কৰিছে। বজাৰত কিছুমান মডেলৰ দাম ১ লাখ টকালৈকে বৃদ্ধি পাইছে। কোম্পানীৰ মুখ্য কাৰ্যবাহী বিষয়া টিম কুকে অলপতে জানিবলৈ দিছিল যে বিশ্ব বজাৰত মেমৰী কাৰ্ড বা মডিউলৰ দাম অস্বাভাৱিকভাৱে বৃদ্ধি হোৱাৰ বাবে সামগ্ৰীসমূহৰ মূল্য বৃদ্ধি কৰাটো অনিবাৰ্য হৈ পৰিছিল। এপলৰ ভাৰতীয় ৱেবছাইটত ইতিমেধ্যে এই নতুন মূল্য দেখিবলৈ পোৱা গৈছে। এই মূল্য বৃদ্ধিয়ে মেকবুক এয়াৰ, মেকবুক প্ৰ’ আৰু শেহতীয়াকৈ মুকলি কৰা বাজেট লেপটপসমূহৰ ওপৰত প্ৰভাৱ পেলাইছে।

নতুন মূল্য অনুসৰি এম ৫ চিপ থকা ১৩ ইঞ্চিৰ মেকবুক এয়াৰৰ দাম ১,১৯,৯০০ টকাৰ পৰা বাঢ়ি এতিয়া ১,৪৯,৯০০ টকা হৈছে, অৰ্থাৎ ইয়াৰ দাম ৩০,০০০ টকা বৃদ্ধি পাইছে। একেদৰে ১৫ ইঞ্চিৰ মেকবুক এয়াৰৰ দাম ১,৪৪,৯০০ টকাৰ পৰা ১,৭৯,৯০০ টকালৈ বৃদ্ধি পাইছে। আনকি ছাত্ৰ-ছাত্ৰী আৰু নতুন ক্ৰেতাসকলৰ বাবে কম দামত মুকলি কৰা মেকবুক নিঅ’ লেপটপটোৰ দামো ১০,০০০ টকা বৃদ্ধি পাইছে। পূৰ্বে ৬৯,৯০০ টকাত পোৱা এই বাজেট লেপটপটোৰ নতুন দাম এতিয়া ৭৯,৯০০ টকা হৈছে।

মেকবুক প্ৰ’ লাইনআপত মূল্য বৃদ্ধি আটাইতকৈ বেছি হোৱা দেখা গৈছে। এম ৫ চিপ আৰু ১৬ জিবি ৰেম থকা বেছ ১৪ ইঞ্চিৰ মেকবুক প্ৰ’ৰ দাম আগতে ১,৬৯,৯০০ টকা আছিল, কিন্তু এতিয়া ইয়াৰ বাবে ক্ৰেতাই ২,৩৯,৯০০ টকা ভৰিব লাগিব। ইয়াৰ অৰ্থ হ’ল এই মডেলটোৰ দাম পোনপাটাকৈ ৭০,০০০ টকা বৃদ্ধি পালে। আনহাতে আটাইতকৈ শক্তিশালী এম ৫ মেক্স চিপ থকা ১৪ ইঞ্চিৰ মেকবুক প্ৰ’ৰ দাম ১,০০,০০০ টকা পৰ্যন্ত বৃদ্ধি কৰা হৈছে।

কেৱল লেপটপেই নহয়, এপলৰ আইপেডসমূহো এতিয়া যথেষ্ট ব্যয়বহুল হৈ পৰিছে। এম ৪ প্ৰচেছৰ থকা ১১ ইঞ্চিৰ আইপেড এয়াৰৰ দাম ২৫,০০০ টকা বৃদ্ধি পাইছে। আগতে ৬৪,৯০০ টকাত পোৱা এই টেবলেটখনৰ নতুন দাম এতিয়া ৮৯,৯০০ টকা হৈছে। একেদৰে এম ৫ চিপ আৰু ২৫৬ জিবি ষ্ট’ৰেজ থকা আইপেড প্ৰ’ৰ দাম ৯৯,৯৯০ টকাৰ পৰা বৃদ্ধি পাই ১,৩৯,৯০০ টকা হৈছে, অৰ্থাৎ ইয়াৰ দাম প্ৰায় ৩৯,৯idx টকা বাঢ়িছে। ভাৰতৰ লগতে আমেৰিকাৰ বজাৰতো এপলে নিজৰ সামগ্ৰীসমূহৰ দাম বৃদ্ধি কৰিছে। আমেৰিকাত আইপেড এয়াৰৰ দাম ৫৯৯ ডলাৰৰ পৰা ৭৪৯ ডলাৰলৈ বৃদ্ধি পাইছে।

এই সন্দৰ্ভত এপল কোম্পানীয়ে সংবাদ মাধ্যমক জনাইছে যে তেওঁলোকে ইয়াৰ পূৰ্বে কেতিয়াও ইমান কম সময়ৰ ভিতৰত কোনো যন্ত্ৰাংশৰ দাম ইমান বেছি বৃদ্ধি পোৱা দেখা নাছিল। ইমান দিনে গ্ৰাহকক এই বোজাৰ পৰা বচাই ৰখা হৈছিল যদিও এতিয়া মূল্য বৃদ্ধি কৰাটো জৰুৰী হৈ পৰিল। চাইবাৰমিডিয়া ৰিচাৰ্ছৰ উপ-সভাপতি প্ৰভু ৰামে এই বিষয়ে কয় যে এপলৰ দৰে শক্তিশালী যোগান শৃংখল থকা কোম্পানীয়েও যেতিয়া দাম বৃদ্ধি কৰিবলগীয়া হৈছে, তাৰ পৰা বুজা যায় যে বজাৰত এতিয়া উপাদানসমূহৰ উৎপাদন ব্যয় অতিমাত্ৰা বৃদ্ধি পাইছে। ইয়াৰ ফলত বিশেষকৈ ছাত্ৰ-ছাত্ৰী আৰু পুৰণি মেক সলনি কৰিব খোজা পেচাদাৰী লোকসকলৰ ক্ৰয় ক্ষমতাৰ ওপৰত গভীৰ প্ৰভাৱ পৰিব।