বৃহস্পতিবাৰে পুৱতি নিশা বিহাৰৰ এখন চিকিৎসালয়ত সংঘটিত এক ভয়াৱহ অগ্নিকাণ্ডৰ সময়ত ৰোগীসকলক সংকটজনক অৱস্থাত এৰি চিকিৎসক আৰু চিকিৎসালয়ৰ কৰ্মচাৰীসকলে পলায়ন কৰাৰ এক গুৰুতৰ অভিযোগ উত্থাপন হৈছে। পুৱতি নিশা প্ৰায় ৩:৫৫ বজাত চিকিৎসালয়খনৰ ষষ্ঠ মহলাত সূত্ৰপাত হোৱা এই অগ্নিকাণ্ডত এগৰাকী ৰোগীৰ অগ্নিদগ্ধ হৈ মৃত্যু হোৱাৰ লগতে বিশগৰাকীতকৈ অধিক ৰোগী গুৰুতৰভাৱে আহত হৈছে।
হঠাৎ চিকিৎসালয়খনৰ ষষ্ঠ মহলাৰ পৰা জুইৰ লেলিহান শিখা আৰু ক’লা ধোঁৱা নিৰ্গত হোৱা দেখি ৰোগীৰ আত্মীয় আৰু স্থানীয় লোকসকলৰ মাজত তীব্ৰ আতংকৰ সৃষ্টি হয়। মুহূৰ্তৰ ভিতৰতে জুই চৌদিশে বিয়পি পৰে আৰু সমগ্ৰ চিকিৎসালয়খন ক’লা ধোঁৱাৰে আবৃত হৈ পৰে। এনে পৰিস্থিতিত নিজৰ আত্মীয়ক বচাবলৈ ৰোগীৰ পৰিয়ালৰ লোক আৰু স্থানীয় ৰাইজে প্ৰাণৰ মমতাক নেওচি চিকিৎসালয়ৰ ভিতৰত প্ৰৱেশ কৰে। কিন্তু তেতিয়ালৈকে ষষ্ঠ মহলাৰ এক বৃহৎ অংশলৈ জুই সম্পূৰ্ণৰূপে বিয়পি পৰিছিল।
প্ৰত্যক্ষদৰ্শীয়ে জানিবলৈ দিয়া মতে, চিকিৎসালয়খনৰ ষষ্ঠ মহলাত থকা আই চি ইউ কক্ষটোত প্ৰথমতে জুই লাগে আৰু সেই সময়ত তাত ১৫ গৰাকী ৰোগী চিকিৎসাধীন হৈ আছিল। ৰোগীৰ আত্মীয়সকলে অভিযোগ কৰা অনুসৰি, অগ্নিকাণ্ডৰ সূত্ৰপাত হোৱাৰ লগে লগে চিকিৎসালয়খনৰ চিকিৎসক বা আন কোনো কৰ্মচাৰীক সেই স্থানত বিচাৰি পোৱা নগ’ল। ৰোগীসকলক ভয়ংকৰ বিপদৰ মুখলৈ ঠেলি দি চিকিৎসালয়ৰ কৰ্মচাৰীসকলে নিজৰ প্ৰাণ ৰক্ষাৰ্থে সেই স্থানৰ পৰা পলায়ন কৰে। এগৰাকী যুৱকে সংবাদ মাধ্যমৰ আগত শোকাকুল হৈ প্ৰকাশ কৰে যে তেওঁৰ পিতৃ আই চি ইউত ভৰ্তি হৈ আছিল আৰু এই অগ্নিকাণ্ডত অগ্নিদগ্ধ হৈ তেওঁৰ পিতৃৰ কৰুণ মৃত্যু ঘটে।
পৰৱৰ্তী সময়ত অগ্নিনিৰ্বাপক বাহিনীৰ লোক ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। অগ্নিনিৰ্বাপক বাহিনীৰ এগৰাকী বিষয়াই জানিবলৈ দিয়া মতে, তেওঁলোক উপস্থিত হোৱাৰ সময়লৈকে চিকিৎসালয়খনৰ অধিকাংশ কৰ্মচাৰীয়েই পলায়ন কৰিছিল। পৰিস্থিতিৰ প্ৰতি লক্ষ্য ৰাখি উদ্ধাৰকাৰী দলে আই চি ইউ আৰু ইয়াৰ কাষৰ কোঠাসমূহৰ খিৰিকী ভাঙি আৱদ্ধ হৈ থকা ৰোগীসকলক বাহিৰলৈ উলিয়াই আনে। বৰ্তমান এই ঘটনাত আহত বিশগৰাকীতকৈ অধিক ৰোগী চিকিৎসাধীন হৈ আছে আৰু তেওঁলোকৰ অৱস্থা অতিশয় সংকটজনক বুলি জানিব পৰা গৈছে।
