জু–ৰ’ডৰ বিস্ফোৰণৰ মূল অভিযুক্ত বিজয় অসমক ৰাতিয়েই তিনিচুকীয়াৰ পৰা গুৱাহাটীলৈ অনা হ’ল। আলফাৰ কেডাৰজনক ২১ মে’ত ডুমডুমাত গ্ৰেপ্তাৰ কৰা হৈছিল।
বৰ্তমান গুৱাহাটীৰ লতাশিল থানাত ৰখা বিজয়ক আজি তদন্তকাৰী শীৰ্ষ বিষয়াই জেৰা কৰাৰ কথা। কেডাৰজনৰ পৰা একেটা ঘটনাৰ বাবে বৰ্তমান আৰক্ষীৰ জিম্মাত থকা আলোচনাপন্থী আলফা নেতা প্ৰাণময় ৰাজগুৰু আৰু সমৰ্থক জাহ্নৱী শইকীয়া সন্দৰ্ভত বহু ন ন তথ্য পোহৰলৈ অহাৰ সম্ভাৱনা আছে।
লগতে পঢ়ক বিজয় অসমক গ্ৰেপ্তাৰ; সহায় কৰিলে চিকিৎসা লোৱা চিকিৎসালয়ৰ ভিডিঅ’ ফুটেইজে
ইতিমধ্যে ডাউন টাউন চিকিৎসালয়ৰ ভিডিঅ’ ফুটেইজৰ পৰা বিজয়ক প্ৰাণময় ৰাজগুৰু আৰু জাহ্নৱী শইকীয়াই গুৱাহাটীত বিভিন্ন প্ৰকাৰে সহায় কৰাৰ তথ্য পোহৰলৈ আহিছে।
আৰক্ষীৰ সূত্ৰই জনোৱা মতে, বিজয় পূৰ্বৰ এটা হত্যাকাণ্ডৰ গোচৰতো অভিযুক্ত। ২০১১ চনত গুৱাহাটীত ৰূপালী ৰংপি নামৰ এগৰাকী মহিলাক হত্যাৰ অভিযোগত কাৰাবাস খাটিব লগীয়া হৈছিল বিজয়।
১৫ মে’ৰ বিস্ফোৰণটোত বিজয় অসমেই গ্ৰেনেডটো দলিয়াইছিল বুলি অসম আৰক্ষীয়ে সন্দেহ কৰি আহিছে, যাৰ ফলত প্ৰায় এক ডজন লোক আহত হৈছিল।
ঘটনাটোত ইতিপূৰ্বে ৫জন লোকক আৰক্ষীয়ে গ্ৰেপ্তাৰ কৰিছে। তেওঁলোক আছিল, আলফা নেতা প্ৰাণময় ৰাজগুৰু, সহায়কাৰী তথা সমৰ্থক জাহ্নৱী শইকীয়া, প্ৰাক্তন আলফা গোলাঘাটৰ অমিত বল্লভ গোস্বামী, নগাঁৱৰ ইন্দ্ৰমোহন বৰা আৰু গুৱাহাটীৰ চিন্ময় লহকৰ।