জেফ্ৰি এপষ্টেইন ফাইলক লৈ সমগ্ৰ বিশ্বতে চৰ্চা চলি থকাৰ মাজতে বিল গেটছে ভাৰতত অনুষ্ঠিত হ’বলগীয়া ইণ্ডিয়া এ আই ইমপেক্ট ছামিট ২০২৬ৰ পৰা নিজৰ নাম প্ৰত্যাহাৰ কৰিছে। গেটছ ফাউণ্ডেচনে মাত্ৰ এদিন আগতেহে জনাইছিল যে বিল গেটছে এই সন্মিলনত অংশ লৈ মূল ভাষণ প্ৰদান কৰিব। কিন্তু বৃহস্পতিবাৰে হঠাতে সংস্থাটোৱে নিজৰ সিদ্ধান্ত সলনি কৰে আৰু জনায় যে বিবেচনাৰ অন্তত বিল গেটছে এই অনুষ্ঠানত অংশগ্ৰহণ নকৰাৰ সিদ্ধান্ত লৈছে। ফাউণ্ডেচনে স্পষ্ট কৰি দিছে যে সন্মিলনৰ মূল লক্ষ্যসমূহ যাতে বিঘ্নিত নহয়, তাৰ বাবেহে তেওঁ এই সিদ্ধান্ত লৈছে। বিল গেটছৰ সলনি গেটছ ফাউণ্ডেচনৰ আফ্ৰিকা আৰু ভাৰত শাখাৰ সভাপতি অংকুৰ ভোৰাই এই সন্মিলনত ভাষণ দিব।
বিল গেটছৰ এই হঠাত্ লোৱা সিদ্ধান্তৰ আঁৰত জেফ্ৰি এপষ্টেইনৰ সৈতে থকা তেওঁৰ কথিত সম্পৰ্কৰ বিতৰ্কই মূল কাৰণ বুলি ধাৰণা কৰা হৈছে। উল্লেখ্য যে যৌন অপৰাধৰ দৰে গুৰুতৰ গোচৰত অভিযুক্ত এপষ্টেইনৰ ফাইলত বিল গেটছৰ নাম কেইবাবাৰো উল্লেখ হোৱাক লৈ ছ’চিয়েল মিডিয়াত তীব্ৰ প্ৰতিক্ৰিয়াৰ সৃষ্টি হৈছিল। ইয়াৰ পূৰ্বে গেটছ ফাউণ্ডেচনে তেওঁৰ উপস্থিতিৰ সন্দৰ্ভত চলি থকা জল্পনা-কল্পনাক অস্বীকাৰ কৰিছিল যদিও শেষত তেওঁ আঁতৰি আহিবলগীয়া হ’ল। এই বিতৰ্কৰ বাবেই অনলাইন মাধ্যমসমূহতো টেক বিলিয়নাৰগৰাকীয়ে তীব্ৰ সমালোচনাৰ সন্মুখীন হৈছে।
চলিত সপ্তাহৰ আৰম্ভণিতে বিল গেটছ ভাৰতত উপস্থিত হোৱাৰ সময়ত অন্ধ্ৰ প্ৰদেশ চৰকাৰে তেওঁক উষ্ম আদৰণি জনাইছিল। গন্নাৱৰাম বিমানবন্দৰত নাৰা লোকেশসহ কেইবাজনো কেবিনেট মন্ত্ৰীয়ে তেওঁক ৰেড কাৰ্পেট আদৰণি জনাইছিল আৰু এই ভ্ৰমণক লৈ চৰকাৰে উৎসাহ প্ৰকাশ কৰিছিল। কিন্তু ইয়াৰ বিপৰীতে ছ’চিয়েল মিডিয়াত একাংশ লোকে বিল গেটছৰ ভাৰত ভ্ৰমণক লৈ তীব্ৰ আপত্তি দৰ্শাইছিল। বহুতৰে মতে তেওঁ ভাৰতক নিজৰ সামগ্ৰীৰ পৰীক্ষাগাৰ হিচাপে ব্যৱহাৰ কৰিব বিচাৰিছে। অৱশ্যে গেটছে তেওঁৰ বিৰুদ্ধে উঠা এপষ্টেইন ফাইলৰ সকলো অভিযোগ ভিত্তিহীন আৰু মিছা বুলি ইতিমধ্যে ঘোষণা কৰিছে।
ভাৰতত চলি থকা এই এআই সন্মিলনৰ চতুৰ্থ দিনটো অতি গুৰুত্বপূৰ্ণ আছিল কাৰণ ইয়াত প্ৰধানমন্ত্ৰী নৰেন্দ্ৰ মোদী, ফ্ৰান্সৰ ৰাষ্ট্ৰপতি ইমানুৱেল মেক্ৰন আৰু ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে ভাষণ দিয়াৰ কথা আছিল। ইয়াৰ উপৰি ছেম অল্টমেন আৰু মুকেশ আম্বানীৰ দৰে উদ্যোগপতিসকলেও ইয়াত অংশ ল’ব। এনে এখন গুৰুত্বপূৰ্ণ মঞ্চৰ পৰা শেষ মুহূৰ্তত বিল গেটছ আঁতৰি যোৱা ঘটনাই এতিয়া সকলোৰে দৃষ্টি আকৰ্ষণ কৰিছে। গেটছ ফাউণ্ডেচনে অৱশ্যে জানিবলৈ দিছে যে তেওঁলোক ভাৰতৰ স্বাস্থ্য আৰু উন্নয়নমূলক কামৰ বাবে সদায় দায়বদ্ধ হৈ থাকিব।
