পেছাদাৰী টেনিছ জগতত নিজৰ কেৰিয়াৰ গঢ়াৰ উদ্দেশ্যেৰে মহাবিদ্যালয় ত্যাগ কৰাৰ ছটাতকৈও অধিক দশকৰ পাছত অৱশেষত স্নাতক ডিগ্ৰী গ্ৰহণ কৰিলে কিংবদন্তি টেনিছ তাৰকা বিলি জিন কিঙে। সোমবাৰে ৮২ বছৰীয়া এই বিশ্ববিশ্ৰুত খেলুৱৈগৰাকীয়ে কেলিফৰ্ণিয়া ষ্টেট ইউনিভাৰ্চিটি, লছ এঞ্জেলছৰ পৰা ইতিহাস বিষয়ত সন্মানীয় স্নাতক ডিগ্ৰী লাভ কৰে। এই বিশেষ দিনটোত খেলুৱৈগৰাকীয়ে সামাজিক মাধ্যম ‘এক্স’ (X) যোগে প্ৰকাশ কৰে যে কোনো এটা আৰম্ভ কৰা কাম শেষ কৰিবলৈ কেতিয়াও পলম নহয়।
আমেৰিকা যুক্তৰাষ্ট্ৰত মহিলা ক্ৰীড়া আৰু এলজিবিটিকিউ প্লাছ (LGBTQ+) অধিকাৰৰ আন্দোলনত গুৰুত্বপূৰ্ণ ভূমিকা গ্ৰহণ কৰা কিঙৰ বাবে এই মুহূৰ্তটো অত্যন্ত তাৎপৰ্যপূৰ্ণ আছিল। তেওঁ নিজৰ অন্তিম ষাণ্মাসিকত টাইটেল নাইন (Title IX) আৰু সম-অধিকাৰ আন্দোলনৰ দৰে বিষয়সমূহৰ ওপৰত অধ্যয়ন আৰু গৱেষণা কৰিছিল, যিবোৰ আন্দোলনত তেওঁ নিজেই এসময়ত নেতৃত্ব দিছিল। উল্লেখযোগ্য যে, কিঙে প্ৰথমে ১৯৬১ চনত সেই সময়ৰ লছ এঞ্জেলছ ষ্টেট কলেজত নামভৰ্তি কৰিছিল যদিও টেনিছত সম্পূৰ্ণৰূপে মনোনিৱেশ কৰাৰ উদ্দেশ্যে ১৯৬৪ চনত পঢ়া-শুনা আধাতে সামৰে। মহাবিদ্যালয়ত পঢ়ি থকা অৱস্থাতেই তেওঁ নিজৰ প্ৰথমটো উইম্বলডন ডাবলছ খিতাপ দখল কৰি ক্ৰীড়া জগতত খোপনি পুতিবলৈ সক্ষম হৈছিল
পৰৱৰ্তী সময়ত তেওঁ ক্ৰীড়া ইতিহাসৰ অন্যতম প্ৰভাৱশালী কেৰিয়াৰ গঢ়িবলৈ সক্ষম হয়। কিঙে নিজৰ খেলুৱৈ জীৱনত ১২টা ছিংগলছ, ১৬টা মহিলা ডাবলছ আৰু ১১টা মিক্সড ডাবলছ খিতাপসহ মুঠ ৩৯টা গ্ৰেণ্ড শ্লাম খিতাপ দখল কৰিছিল। ইয়াৰ উপৰিও তেওঁ মহিলা টেনিছ সন্থা (Women’s Tennis Association) প্ৰতিষ্ঠা কৰাত গুৰুত্বপূৰ্ণ ভূমিকা গ্ৰহণ কৰাৰ লগতে ক্ৰীড়াক্ষেত্ৰত মহিলাসকলৰ বাবে সমান সুযোগ আৰু সম-দৰমহাৰ দাবীত নিৰন্তৰ সংগ্ৰাম চলাই গৈছিল। তেওঁৰ এই সক্ৰিয়তা আৰু অৱদানৰ বাবে আমেৰিকা যুক্তৰাষ্ট্ৰৰ সৰ্বোচ্চ সন্মান যেনে প্ৰেছিডেন্সিয়েল মেডেল অৱ ফ্ৰিডম, কংগ্ৰেছনেল গ’ল্ড মেডেল আৰু হলিউড ৱাক অৱ ফেমত তাৰকা সন্মানেৰে বিভূষিত কৰা হৈছে।
প্ৰায় এবছৰৰ পূৰ্বে কিঙে জানিব পাৰে যে স্নাতক ডিগ্ৰী লাভ কৰিবলৈ তেওঁক মাত্ৰ এটা বছৰৰ প্ৰয়োজন। ইয়াৰ পাছতেই তেওঁৰ মনত পুনৰ বিশ্ববিদ্যালয়লৈ উভতি যোৱাৰ ইচ্ছা জাগ্ৰত হয়। যোৱা বছৰৰ পৰা তেওঁ বুৰঞ্জীমূলক গৱেষণা আৰু ইতিহাস ৰচনাৰ দৰে বিষয়ত অনলাইন ক্লাছৰ জৰিয়তে পুনৰ পঢ়া-শুনা আৰম্ভ কৰে।
লছ এঞ্জেলছত অনুষ্ঠিত হোৱা এই দীক্ষান্ত সমাৰোহত কিঙে “ষ্টুডেণ্ট এথলিট” আৰু “গোট” (G.O.A.T.) লিখা থকা এখন সোণালী ৰঙৰ উত্তৰীয় পৰিধান কৰিছিল। বিশ্ববিদ্যালয়ৰ অধ্যক্ষা বেৰেনিচিয়া জনছন ইনছৰ হাতৰ পৰা প্ৰমাণপত্ৰ গ্ৰহণ কৰাৰ পাছত তেওঁ মঞ্চৰ পৰা সতীৰ্থ স্নাতকসকলৰ মাজলৈ টেনিছ বল মাৰি এই বিশেষ ক্ষণটো উদযাপন কৰে। বৰ্তমান ৮২ বছৰ বয়সতো তেওঁৰ এই শৈক্ষিক সফলতাই সমগ্ৰ বিশ্বৰ ক্ৰীড়াপ্ৰেমী তথা সাধাৰণ জনতাৰ মাজত এক নতুন প্ৰেৰণাৰ সঞ্চাৰ কৰিছে আৰু এক ইতিবাচক বাৰ্তা প্ৰদান কৰিছে।
