উত্তৰ প্ৰদেশৰ সোণভদ্ৰা জিলাত অৱস্থিত বীণা অপেনকাষ্ট কয়লা খনন প্ৰকল্পৰ প্ৰস্তাৱিত সম্প্ৰসাৰণক লৈ স্থানীয় ৰাইজ আৰু কৰ্তৃপক্ষৰ মাজত তীব্ৰ অসন্তুষ্টিৰ সৃষ্টি হৈছে। কেন্দ্ৰীয় চৰকাৰৰ অধীনস্থ ক‘ল ইণ্ডিয়া লিমিটেডৰ সহযোগী প্ৰতিষ্ঠান নৰ্ডাৰ্ন ক‘লফিল্ডছ লিমিটেডৰ (এনচিএল) উদ্যোগত চলি থকা এই প্ৰকল্পটোৰ সম্প্ৰসাৰণৰ ফলত সমগ্ৰ অঞ্চলটোত প্ৰদূষণ বৃদ্ধি পোৱাৰ লগতে স্থানীয় লোকৰ দৈনন্দিন জীৱনলৈ ভাবুকি নামি অহাৰ অভিযোগ উত্থাপন হৈছে। যোৱা ১৭ মাৰ্চত (মঙলবাৰে) পৰিৱেশ সম্পৰ্কীয় অনুমোদনৰ বাবে সোনভদ্ৰৰ বীণা ষ্টেডিয়ামত আয়োজন কৰা এখন ৰাজহুৱা শুনানিত উপস্থিত থাকি স্থানীয় ৰাইজে প্ৰকল্পটোৰ তীব্ৰ বিৰোধিতা কৰে।
‘দ্য ৱায়াৰ‘ত (The Wire) প্ৰকাশিত প্ৰতিবেদন অনুসৰি, দুদ্ধি তহচিলৰ অন্তৰ্গত এই কয়লা প্ৰকল্পটোৰ মাটিকালি বৰ্তমানৰ ১৭৯০.৩৭৭ হেক্টৰৰ পৰা ২০৭৯.২২১ হেক্টৰলৈ বৃদ্ধি কৰাৰ প্ৰস্তাৱ গ্ৰহণ কৰা হৈছে। এই সম্প্ৰসাৰণৰ বাবে আয়োজন কৰা ৰাজহুৱা শুনানিত ৪০০ তকৈ অধিক লোকে অংশগ্ৰহণ কৰে। চৰকাৰৰ হৈ অতিৰিক্ত জিলা দণ্ডাধীশ (এডিএম) ৰমেশ চন্দ্ৰ আৰু উত্তৰ প্ৰদেশ প্ৰদূষণ নিয়ন্ত্ৰণ ব’ৰ্ডৰ আঞ্চলিক বিষয়া আৰ কে সিং উক্ত অনুষ্ঠানত উপস্থিত থাকে। শুনানিকালত প্ৰায় ৩০০ গৰাকী গাঁৱবাসীয়ে স্বাক্ষৰ কৰা এখন ‘পৰামৰ্শ আৰু আপত্তি পত্ৰ’ অতিৰিক্ত জিলা দণ্ডাধীশগৰাকীক প্ৰদান কৰা হয় যদিও বিষয়াগৰাকীয়ে ইয়াৰ কোনো প্ৰাপ্তিস্বীকাৰ পত্ৰ নিদিয়াৰ অভিযোগ উত্থাপন হৈছে।
প্ৰকল্পটোৰ ফলত ক্ষতিগ্ৰস্ত হোৱা চান্দুৱাৰ গাঁৱৰ বাসিন্দা দীনদয়াল ভাৰতীয়ে সংবাদ মাধ্যমৰ আগত ক্ষোভ উজাৰি কয় যে তেওঁলোকে কোনো কাৰণতে এই খনিৰ সম্প্ৰসাৰণ নিবিচাৰে। তেওঁ জানিবলৈ দিয়া মতে, অঞ্চলটোৰ পানী আৰু বায়ু ইতিমধ্যে দূষিত হৈ পৰিছে আৰু খনিৰ ভিতৰত হোৱা ধাৰাবাহিক বিস্ফোৰণৰ ফলত তেওঁলোকৰ বাসগৃহৰ বেৰসমূহত ফাট মেলিছে। গাঁৱবাসীয়ে দাখিল কৰা আপত্তি পত্ৰখনত কেৱল পৰিৱেশজনিত সমস্যাৰ কথাই উল্লেখ কৰা হোৱা নাই, বৰঞ্চ প্ৰকল্পটোৰ লগত জড়িত স্বচ্ছতা, ক্ষতিপূৰণ আৰু সংস্থাপনৰ বিষয়সমূহো গুৰুত্বসহকাৰে উত্থাপন কৰা হৈছে।
ৰাইজৰ গুৰুতৰ অভিযোগ যে ২০২২ চনত প্ৰকল্পটোক দিয়া পৰিৱেশ অনুমোদনৰ (ইচি) চৰ্তসমূহ এতিয়ালৈকে চৰকাৰ বা প্ৰতিষ্ঠানটোৱে পালন কৰা নাই। সৌৰশক্তি চালিত লাইট, খোৱাপানীৰ পাইপলাইন, পানী বিশুদ্ধকৰণ ব্যৱস্থা স্থাপন আৰু পথ সম্প্ৰসাৰণৰ দৰে প্ৰতিশ্ৰুতিসমূহ এতিয়াও আধৰুৱা হৈ আছে। ইয়াৰ উপৰিও সম্পূৰ্ণ পৰিৱেশ প্ৰভাৱ নিৰ্ধাৰণ (ইআইএ) প্ৰতিবেদন ৰাজহুৱা নকৰাকৈয়ে এই শুনানি অনুষ্ঠিত কৰাক লৈও ৰাইজে প্ৰশ্ন উত্থাপন কৰিছে। বিদ্যালয়সমূহৰ স্থানান্তৰণ, জৈৱ বৈচিত্ৰ্যৰ ওপৰত পৰিব পৰা প্ৰভাৱ, স্থানীয় লোকৰ নিয়োগ আৰু ভূমি অধিগ্ৰহণৰ বিনিময়ত দিয়া ক্ষতিপূৰণৰ ব্যৱস্থাক লৈ ৰাইজৰ মাজত ব্যাপক শংকা বিৰাজ কৰিছে।
