যোৱা ১ ডিচেম্বৰত কামাখ্য ষ্টেইশ্যনৰ পৰা ডেকাৰগাওঁ অভিমুখে গৈ থকা ১৫৮১৫ নম্বৰৰ ইণ্টাৰচিটি এক্সপ্ৰেছত ঘটা বিস্ফোৰণৰ ঘটনাত জড়িত থকাৰ সন্দেহত আজি আৰক্ষীয়ে এজন লোকক গ্ৰেপ্তাৰ কৰিছে। গ্ৰেপ্তাৰ কৰা যুৱকজন বিনোদ বড়ো আৰু তেওঁ এন ডি এফ বিৰ সদস্য বুলি জানিব পৰা গৈছে।
আজি অসম আৰক্ষীৰ সঞ্চালক প্ৰধান কুলধৰ শইকীয়াই হৰিশিঙাৰ ঘটনাত জড়িত বাবে বিনোদ বড়োক গ্ৰেপ্তাৰ কৰাৰ কথা সংবাদ মাধ্যমক জানিবলৈ দিয়ে। সঞ্চালক প্ৰধানজনৰ মতে, বিনোদে বিস্ফোৰণটোত জড়িত থকাৰ কথা স্বীকাৰ কৰিছে। অৱশ্যে বাক্সা আৰক্ষীয়ে বিনোদক যোৱা ৭ ডিচেম্বৰতেই গ্ৰেপ্তাৰ কৰিছিল।
মন কৰিব লগীয়া যে ৫ ডিচেম্বৰত গোৰেশ্বৰৰে কৈলাশ বড়ো নামৰ ব্যৱসায়ী এজনৰ ঘৰৰ পিছফালে বাৰীত এটা বোমা উদ্ধাৰ হৈছিল, যিটো আৰক্ষীয়ে নিৰাপদে বিস্ফোৰণ ঘটায়। এই বোমাটো সংস্থাপন কৰাৰ সন্দেহতে ৭ ডিচেম্বৰত বাক্সা আৰক্ষীয়ে বিনোদ বড়োক গ্ৰেপ্তাৰ কৰিছিল।
তাৰ পিছতে হৰিশিঙাৰ বিস্ফোৰণটোৰ তদন্ত কৰি থকা অসম আৰক্ষীয়ে দুয়োটা বোমাত ব্যৱহৃত সমলবোৰ পৰীক্ষা কৰি হৰিশিঙাৰ বিস্ফোৰণটোতো বিনোদ বড়ো জড়িত থকাৰ সন্দেহ কৰি তেওঁক জিম্মাত লৈ জেৰা কৰে। জেৰাত বিনোদ বড়োৱে হৰিশিঙাত ৰেইলত বিস্ফোৰণ ঘটোৱাৰ কথা স্বীকাৰ কৰে। ঘটনাটোত এজন লোক গুৰুতৰভাৱে আহত হৈছিল।
আনহাতে ওদালগুৰি আৰক্ষী অধীক্ষকে জনোৱামতে, বিনোদ বড়োৱে তিনিটাকৈ বোমা বনাইছিল। তাৰে এটা ১ ডিচেম্বৰৰ দিনা হৰিশিঙাত উজনিমুৱা ইণ্টাৰচিটি এক্সপ্ৰেছত বিস্ফোৰণ ঘটায় আৰু আন এটা গোৰেশ্বৰৰ কৈলাশ বড়ো নামৰ এজন লোকৰ ঘৰৰ পিছফালে বাৰীত ৰাখিছিল আন এটা হাবিত উদ্ধাৰ হয়। বিনোদ বড়োৱে ইণ্টাৰনেটৰ পৰা বোমা বনোৱাৰ কৌশল শিকিছিল বুলি আৰক্ষীৰ আগত স্বীকাৰ কৰা বুলি আৰক্ষী অধীক্ষকজনে সংবাদ মাধ্যমৰ আগত জানিবলৈ দিয়ে।
