নাগৰিকত্ব সংশোধনী বিধেয়ক বাতিলৰ দাবীত সমগ্ৰ ৰাজ্যত উত্তাল প্ৰতিবাদ সাব্যস্ত কৰি থকাৰ মাজতে আজি শিৱসাগৰত বিভিন্ন দল সংগঠনে প্ৰতিবাদ কৰাৰ লগতে বীৰ লাচিত সেনা অসমে শিৱসাগৰৰ বিজেপিৰ কাৰ্য্যালয় ঘেৰাও কৰে।
নগৰখনৰ বি জি ৰোডত থকা শিৱসাগৰ বিজেপিৰ মুখ্য কাৰ্যালয়ত বীৰ লাচিত সেনাৰ শতাধিক নেতা কৰ্মীয়ে ঘেৰাও কৰি ক’লা পতাকা প্ৰদৰ্শন কৰে। বিজেপি গো বেক, সৰ্বানন্দ সোনোৱাল লেই লেই, ধ্বনিৰে উত্তল প্ৰতিবাদ কৰাৰ লগতে সংগঠনটোৰ সদস্য সকলে ৰাজ্যিক নেত্ৰী সুৰভি ৰাজকুমাৰী, সংসদ কামাখ্যা প্ৰসাদ তাচা আৰু জিলা বিজেপিৰ সভাপতি ভবেন্দ্ৰ নাথ মহনকো তীব্ৰ সমালোচলা কৰে।
সংগঠনটোৰ সদস্যসকলে জিলা বিজেপিৰ কাৰ্যালয়লৈ গেলা কণী আৰু ক’লা ৰং দলিয়াই প্ৰতিবাদ সাব্যস্ত কৰে।
ইপিনে, আজি শিৱসাগৰ জিলাৰ এনএচইউআইয়েও নাগৰিকত্ব সংশোধনী বিধেয়ক বাতিলৰ দাবীত নগৰৰ মাজেৰে এক প্ৰতিবাদী সমদল বাহিৰ কৰে। চৰকাৰ বিৰোধী বিভিন্ন শ্ল’গানেৰে নগৰৰ মাজেদি উত্তাল প্ৰতিবাদ সাব্যস্ত কৰে এন এচ ইউ আইৰ শতাধিক নেতা কৰ্মীয়ে।
