বিশ্বনাথ নগৰৰ উন্নয়ন আৰু সৌন্দৰ্যবৰ্ধনৰ এক অভিলাষী প্ৰকল্প গ্ৰহণ কৰিছে বিশ্বনাথ জিলা প্ৰশাসনে। প্ৰায় ১০ কোটি টকাৰ ব্যয়সাপেক্ষ Signature Project of SOPD-G আঁচনিৰ অধীনত উন্নয়ন আৰু সৌন্দৰ্যবৰ্ধনৰ প্ৰকল্পটো ইতিমধ্যে শুভ উদ্বোধনো কৰা হৈছে।
যোৱা ২৬ আগষ্ট ২০২০ তাৰিখে বিশ্বনাথ সমষ্টিৰ বিধায়ক প্ৰমোদ বৰঠাকুৰ, বিশ্বনাথ জিলা উপায়ুক্ত, বিশ্বনাথ জিলা আৰক্ষী অধীক্ষক, বিশ্বনাথ ৰাজহ চক্ৰ বিষয়াকে আদি কৰি বিশ্বনাথ গড়কাপ্তানি বিভাগসহ আন কেইবাজনো বিষয়াৰ উপস্থিতিত Signature Project of SOPD-G আঁচনিৰ অধীনত শুভ উদ্বোধন কৰা হয় এই ব্যয়বহুল প্ৰকল্পটো।
১০ কোটি টকাৰ ব্যয় সাপেক্ষে বিশ্বনাথ নগৰৰ ১৫ নং ৰাষ্ট্ৰীয় ঘাইপথৰ ২ কিলোমিটাৰ সামৰি সমগ্ৰ নগৰখন সৌন্দৰ্য বৰ্ধনৰ বাবে উন্নয়নমূলক প্ৰকল্পৰ আধাৰশিলা স্থাপন কৰিছিল বিধায়ক গৰাকীয়ে।
বিশ্বনাথ চাৰিআলিৰ মাজমজিয়াত দিনক দিনে বৃদ্ধি পোৱা যানজঁট সমস্যা নিৰ্মূলকৰণৰ লগতে নগৰখনৰ মাজ মজিয়াত যান-বাহন পাৰ্কিং সমস্যা সমাধানৰ বাবে গ্ৰহণ কৰা এই প্ৰকল্পৰ কাম ইতিমধ্যে জোৰদাৰ ভাৱে আৰাম্ভ কৰা হৈছে।
নগৰখনৰ মাজমজিয়াত পাৰ্কিং ব্যৱস্থাকে আদি কৰি সৌন্দৰ্যময়ী কৰি তোলাৰ বাবে গ্ৰহণ কৰা এই পদক্ষেপে আগন্তুক দিনত নগৰখনক উন্নয়নৰ দিশত আৰু এখোজ আগুৱাই নিব যে সেয়া নিশ্চিত ভাৱে কব পাৰি।
