শেহতীয়াভাৱে বিশ্বনাথ কংগ্ৰেছৰ তৃণমূল কৰ্মীসকলৰ মাজত বিদ্ৰোহ আৰম্ভ হৈছে। আজি ১৭ ডিচেম্বৰ সোমাবাৰে দুৰ্নীতিত লিপ্ত থকাৰ অভিযোগত বিশ্বনাথ কংগ্ৰেছৰ তৃণমূল কৰ্মীসকলে জিলা কংগ্ৰেছৰ সভাপতি দিলীপ বৰুৱাৰ নেতৃত্বৰ বিৰুদ্ধে আজিএই বিদ্ৰোহ ঘোষণা কৰে । আজি এক সংবাদমেলযোগে বিশ্বনাথত তৃণমূল কংগ্ৰেছ কৰ্মীসকলে জিলা কংগ্ৰেছৰ সভাপতিগৰাকীৰ বিৰুদ্ধে বিস্ফোৰক অভিযোগ উত্থাপন কৰে। দলীয় কৰ্মীসকলে উত্থাপন কৰা অভিযোগ অনুসৰি, বিশ্বনাথ জিলা কংগ্ৰেছৰ সভাপতি দিলীপ বৰুৱাই সদ্য সমাপ্ত পঞ্চায়ত নিৰ্বাচনত দলীয় টিকট দিয়াৰ বিনিময়ত কংগ্ৰেছ কৰ্মীৰ পৰা বৃহৎ ধন বেংকযোগে লৈছিল ।
যিকোনো পৰিস্থিতিত দিলীপ বৰুৱাক সভাপতিৰ আসনৰ পৰা বহিস্কাৰ কৰাৰ দাবী তুলিছে বিশ্বনাথৰ তৃণমূল কৰ্মীসকলে। অন্যথা সমূহীয়া ভাৱে কংগ্ৰেছ দল ত্যাগ কৰাৰ হুমকি দিছে বিশ্বনাথৰ এই সকল তৃণমূল কংগ্ৰেছ কৰ্মীয়ে।
আজি বিশ্বনাথৰ সাহিত্য সভা ভৱনত বিশ্বনাথৰ এই সকল তৃণমূল কৰ্মীয়ে এক সংবাদমেল যোগে জিলা কংগ্ৰেছৰ সভাপতি দিলীপ বৰুৱাৰ বিৰুদ্ধে বিস্ফোৰক অভিযোগ উত্থাপন কৰি সভাপতি গৰাকীৰ বিৰুদ্ধে দিলীপ বৰুৱা হাটাও কংগ্ৰেছ বাচাও, দিলীপ বৰুৱা মূৰ্দাবাদ ইত্যাদি শ্লোগান দি কৰি এক উত্তাল পৰিৱেশৰ সৃষ্টি কৰে । আনহাতে সভাপতিগৰাকীয়ে পঞ্চায়ত নিৰ্বাচনত দলীয় টিকট প্ৰদান কৰাৰ নামত গোপনভাবে লক্ষ লক্ষ টকা বেংকৰ জৰিয়তে লেন-দেন কৰা তথ্য সাংবাদিকসকলক প্ৰদান কৰে ।
কৰ্মী সকলে স্পষ্ট ভাষাত কয় যে বিশ্বনাথ জিলা কংগ্ৰেছৰ সভাপতি দিলীপ বৰুৱাৰ নেতৃত্বত লোকসভা নিৰ্বাচনত তেজপুৰ লোকসভা সমষ্টিত কংগ্ৰেছ দল কেতিয়াও জয়ী হ’ব নোৱাৰে ।
ইফালে প্ৰাক্তন মন্ত্ৰী নুৰজামাল সৰকাৰক অসম প্ৰদেশ কংগ্ৰেছ কমিটীয়ে কাৰণ দৰ্শোৱাৰ জাননী জাৰি কৰাক লৈ দলীয় কৰ্মীসকলে দুখ প্ৰকাশ কৰে । প্ৰাক্তন মন্ত্ৰীগৰাকীৰ বিৰুদ্ধে জিলা সভাপতি দিলীপ বৰুৱাই ৰাজনৈতিক ষড়যন্ত্ৰ কৰাৰ অভিযোগ তুলি অতিশীঘ্ৰে সভাপতি গৰাকীৰ পদত্যাগৰ দাবী জনায়। অন্যথা বিশ্বনাথৰ এই সকল তৃণমূল কৰ্মীয়ে সমূহীয়া ভাবে কংগ্ৰেছ দল ত্যাগ কৰা হুংকাৰ প্ৰদান কৰে।