চুবুৰীয়া লখিমপুৰৰ আনকি ৰঙাপৰাৰ কেঁচা চাহ পাতত কেজিয়ে প্ৰতি ২৫ টকাকৈ দিয়াৰ বিপৰীতে বিশ্বনাথৰে চাহ ফেক্তৰিয়ে স্থানীয় পাতত উচিত মূল্য নিদি ১৩ টকা পৰ্য্যন্তলৈকৈ দিয়া বুলি অভিযোগ তুলি পাতৰ মূল্য আৰু হ্ৰাস নকৰিবলৈ ফেক্তৰিসমূহক সকীয়াই দিছে বিশ্বনাথ জিলা ক্ষুদ্ৰ চাহ খেতিয়ক সন্থাই।
বিশ্বনাথ চাৰিআলিৰ হিমালয় ভৱনত দেওবাৰে অনুষ্ঠিত বিশেষ সাধাৰণ সভাৰ পিছতে ফেক্তৰিসমূহক এই সকীয়নি দিছে ক্ষুদ্ৰ চাহ খেতিয়ক সন্থাই।
‘বিশ্বনাথ জিলাৰ কাষৰীয়া লখিমপুৰ আৰু ৰঙাপৰাত কেঁচা পাতৰ মূল্য ২৩-২৫ টকা প্ৰতি কি. গ্ৰা.ত দি থকা অৱস্থাত বিশ্বনাথত ১৪-১৫ আৰু কোনো বাগিচাই ১৩ টকা পৰ্যন্ত কৰিছে। কেঁচাপাতৰ মূল্য আৰু অধিক হ্ৰাস নকৰিবলৈ চাহ ফেক্তৰিসমূহক আমি সকীয়াই দিছো,’ বিশেষ সভাৰ পিছতে এই মন্তব্য সন্থাৰ সভাপতি প্ৰবীন হাজৰিকাৰ।
সন্থাই লগতে অভিযোগ কৰে যে টি মনিতৰিং কমিটিৰ নিৰ্দেশনা মতে চাহ ফেক্টৰিসমূহে কেঁচাপাতৰ মূল্য দিয়া নাই। ফলত জিলাখনৰ ক্ষুদ্ৰ চাহ খেতিয়কসকলৰ অৱস্থা শোচনীয় হৈ পৰিছে বুলি সংবাদ মাধ্যমৰ আগত সদৰী কৰিছে সন্থাৰ সভাপতি, সম্পাদক ক্ৰমে প্ৰবীন হাজৰিকা আৰু ৰঞ্জন গগৈয়ে।
আনহাতে ৰাসায়নিক সাৰৰ ক্ষেত্ৰত খেতিয়কসকলে চৰকাৰৰ পৰা ৰাজ সাহায্যৰো দাবী কৰিছে।
কেঁচাপাতৰ উৎপাদন বৃদ্ধিৰ সময়তে পাত ক্ৰয়ৰ পৰিমাণ হ্ৰাস নকৰিবলয়ো ফেক্তৰিসমূহক আহ্বান জনাইছে সন্থাটোৱে।
সভাত সহকাৰী সাধাৰণ সম্পাদক দেৱব্ৰত মেধি আৰু পৰেশ বৰকাকতি, উপদেষ্টা দ্বিজেন শইকীয়া আৰু নিৰঞ্জন মেধি, উপ সভাপতি তিকাৰাম উপাধ্যায়, ভবেন শইকীয়া আৰু কুমুদ শইকীয়া আৰু কেন্দ্ৰীয় কাৰ্য্য নিৰ্বাহক সদস্য জিতু শইকীয়াকে ধৰি বহুসংখ্যক ক্ষুদ্ৰ চাহ খেতিয়কে নিজৰ মত প্ৰকাশ কৰে।