শেহতীয়াকৈ পাঁচখন ৰাজ্যত বিধানসভা নিৰ্বাচন অনুষ্ঠিত হৈ গ’ল। ফলাফলত দেখা গৈছে যে তিনিখন ৰাজ্যত এন ডি এ চৰকাৰ গঠন হ’বলৈ গৈ আছে। ইয়াৰে দুখন ৰাজ্যত পোনপটীয়াকৈ ক্ষমতাত আহিছে বিজেপি। বিজেপিৰ মিত্ৰদল এন আৰ কংগ্ৰেছে কেন্দ্ৰীয় শাসিত অঞ্চলটোত চৰকাৰ গঠন কৰাৰ সম্ভাৱনা আছে। কংগ্ৰেছে আন এখন ৰাজ্যত চৰকাৰ গঠন কৰাৰ আৰু থালাপতি বিজয়ৰ টিভিকেই এখন ৰাজ্যত চৰকাৰ গঠন কৰাৰ সম্ভাৱনা আছে।
এই পাঁচটা বিধানসভা নির্বাচনৰ পাছত ৰাষ্ট্ৰীয় ৰাজনীতিৰ সমীকৰণ বহু পৰিবর্তন হোৱাৰ সম্ভাৱনা আছে৷ ৰাষ্ট্ৰীয় পৰ্যায়ত গেৰুৱা শিবিৰৰ শক্তি বৃদ্ধি পাইছে। কংগ্ৰেছেও কিছু শক্তি লাভ কৰিছে। কিন্তু চিপিএম আৰু বাওঁপন্থীকে ধৰি কেইবাটাও আঞ্চলিক দল পতনৰ পথত। ইয়াৰ প্ৰভাৱ পৰৱৰ্তী ৰাজ্যসভা নিৰ্বাচনতো পৰিব।
ইতিমধ্যে বিজেপিয়ে নিজৰ সদস্য সংখ্যাৰ ফালৰ পৰা বিশ্বৰ সৰ্ববৃহৎ দল বুলি দাবী কৰে। অন্ততঃ সদস্যৰ সংখ্যাৰ ক্ষেত্ৰত। যদিও সেই দাবীক লৈ বহুতে সন্দেহ প্ৰকাশ কৰে। কিন্তু এই মুহূৰ্তত তেওঁলোক যে ভাৰতৰ সৰ্ববৃহৎ দল তাত সন্দেহৰ অৱকাশ নাই। এই মুহূৰ্তত ২২খন ৰাজ্যত বিজেপিৰ চৰকাৰ আছে। যিটো একপ্ৰকাৰ অভূতপূৰ্ব। শ্ৰেষ্ঠ সময়খিনিতো কংগ্ৰেছৰ হাতত ইমান ক্ষমতা নাছিল।
এই মুহূৰ্তত সমগ্ৰ দেশতে বিজেপিৰ ১৬৫৪ জন বিধায়ক আছে। সমগ্ৰ দেশৰ মুঠ বিধায়কৰ ৪০ শতাংশ গেৰুৱা শিৱিৰৰ। তাৎপৰ্যপূৰ্ণভাৱে বিৰোধী শিবিৰৰ বিধায়কৰ মুঠ সংখ্যা বিজেপিৰ সমান হ’বনে নাই তাত সন্দেহ আছে। দৰাচলতে ২০১৪ চনৰ পৰা সমগ্ৰ দেশতে গেৰুৱা শিবিৰৰ শক্তি বৃদ্ধি হৈ আহিছে।
বিজেপিৰ বাহিৰেও কংগ্ৰেছ হৈছে দেশৰ একমাত্ৰ প্ৰকৃত অৰ্থত সৰ্বভাৰতীয় দল। বৰ্তমান ৪ খন ৰাজ্যত (কেৰালাকে ধৰি) কংগ্ৰেছৰ নিজা চৰকাৰ আছে। এখন ৰাজ্যত মিত্ৰজোঁটৰ চৰকাৰ। কংগ্ৰেছত বৰ্তমান ৬৬৪ জন বিধায়ক আছে। যিটো বিজেপিৰ আধাতকৈ বহু কম।
অন্ধ্ৰ প্ৰদেশৰ শাসকীয় দলটো বিধায়কৰ সংখ্যাৰ হিচাপত দেশৰ ভিতৰতে তৃতীয় বৃহত্তম দল। চন্দ্ৰবাবু নাইডুৰ দলত বৰ্তমান ১৩৫ জন বিধায়ক আছে। তাৎপৰ্যপূৰ্ণভাৱে টিডিপিও বিজেপিৰ মিত্ৰ। য’ত বিজেপিৰ উপস্থিতি কম তেনে এখন ৰাজ্য অন্ধ্ৰ প্ৰদেশ।
পশ্চিমবংগ বিধানসভা নিৰ্বাচনৰ পূৰ্বে দলসমূহৰ ভিতৰত তৃতীয় সৰ্বাধিক বিধায়ক আছিল তৃণমূলৰ। কিন্তু এইবাৰ বিধানসভাৰ নিৰ্বাচনত ৰাজ্যৰ বিদায়ী শাসকীয় দলটোৰ শক্তিৰ বৃহৎ ক্ষতি হৈছে। তৃণমূলত বৰ্তমান দুখন ৰাজ্যৰ মিলি ৮১ জন বিধায়ক আছে। বংগত ৮০ জন আৰু অসমত ১ জন। এইবাৰ অসমতো এখন আসন লাভ কৰিছে তৃণমূলে।
এই মুহূৰ্তত কংগ্ৰেছৰ বাহিৰে বিৰোধী শিবিৰৰ সৰ্ববৃহৎ দলটো হৈছে আম আদমী পাৰ্টি। অৰবিন্দ কেজৰিৱালৰ দল এখন ৰাজ্যৰ শাসক দল। এখন ৰাজ্যৰ প্ৰধান বিৰোধী দল। আৰু আন এখন ৰাজ্যতো বিধায়ক আছে। আপৰ মুঠ বিধায়কৰ সংখ্যা ১২১ জন।
তামিল ৰাজনীতিত উল্কাপিণ্ডৰ দৰে গতিৰে উত্থান ঘটিছে থালাপতি বিজয়ৰ। তেওঁৰ দল টিভিকেই অকলে ১০৮খন আসন লাভ কৰিছে। যদিও সংখ্যাগৰিষ্ঠতা নাপালে, বিজয়ৰ বিধায়কৰ সংখ্যা আকৰ্ষণীয়। তামিলনাডুৰ পূৰ্বৰ শাসকীয় দল ডি এম কেত বৰ্তমান ৬১ জন বিধায়ক আছে।
আন এটা আঞ্চলিক দলত এশজনৰো অধিক বিধায়ক আছে। সেইটোৱেই হৈছে সমাজবাদী পাৰ্টি। অখিলেশ যাদৱৰ দলত আছে ১০৩ জন বিধায়ক। উত্তৰ প্ৰদেশৰ নিৰ্বাচন অহা বছৰ। অখিলেশে বিধায়কৰ সেই সংখ্যা বৃদ্ধিৰে ৰাজ্যৰ ক্ষমতা দখলৰ যুঁজত অৱতীৰ্ণ হ’ব।
এটা সময়ত সমগ্ৰ দেশতে বাওঁপন্থী দলসমূহৰ কম বেছি পৰিমাণে অস্তিত্ব আছিল। দীৰ্ঘদিন ধৰি পশ্চিমবংগ আৰু ত্ৰিপুৰাত বাওপন্থী ক্ষমতাত আছিল। দীৰ্ঘদিন ধৰি কেৰালাতো বাওঁপন্থীয়ে ক্ষমতাত আছিল। এই মুহূৰ্তত সমগ্ৰ দেশতে বাওঁপন্থীৰ মুঠ ৭৯ জন বিধায়ক আছে।
আন বিৰোধী সৰ্বভাৰতীয় দলসমূহৰ ভিতৰত বহুজন সমাজ পাৰ্টিৰ অৱস্থা আটাইতকৈ বেয়া। মুঠতে মায়াৱতীৰ দলত মাত্ৰ ৫ জন বিধায়ক আছে। সেইটোও একাধিক ৰাজ্যত। ২০২২ চনত মায়াৱতীয়ে নিজৰ ৰাজ্য উত্তৰ প্ৰদেশত মাত্ৰ দুজন বিধায়কহে লাভ কৰে। তাৰ তুলনাত কনৰাড চাংমাৰ এন পি পিৰ অৱস্থা ভাল। এই ৰাষ্ট্ৰীয় দলটোত ৫০ জন বিধায়ক আছে।
