ৰাজ্যিক বিজেপিৰ সভাপতি ৰঞ্জিত কুমাৰ দাসে দেওবাৰে দৃঢ়তা প্ৰকাশ কৰি কয় যে বিজেপি আৰু ইয়াৰ মিত্ৰজোঁটে অসমৰ ১৪খন আসনৰ ভিতৰত ১৩ খনতে জয়লাভ কৰিব। দাসে দাবী কৰে যে অসমত এতিয়াও এক ‘বিজেপি ঢৌ’ আছে আৰু দলটোৱে ইয়াৰ মিত্ৰজোঁটৰ সৈতে ‘’ৰাজ্যখনৰ ১৪খনৰ ভিতৰত ১৩খন আসনেই লাভ কৰিব।‘’
অসমৰ মুঠ ১৪ খন আসনৰ ভিতৰত বিজেপিয়ে ১০ খনত প্ৰাৰ্থিত্ব আগবঢ়াইছে আৰু ইয়াৰ মিত্ৰ দল অসম গণ পৰিষদক ৩খন আৰু আনটো মিত্ৰ দল বড়োলেণ্ড পিপুলছ ফ্ৰন্টক ১খন আসন এৰি দিছে।
‘’মোৰ সমীকৰণত ২০১৪ৰ তুলনাত আমি ভাল ফল লাভ কৰিম আৰু অগপ তথা বিপিএফৰ সৈতে আমাৰ প্ৰাক্ নিৰ্বাচনী বুজাবুজিৰ বাবে আমাৰ পক্ষত ভোটৰ হাৰ বৃদ্ধি পাব,’’- দাসে সদৰী কৰে।
ৰাজ্যিক সভাপতিগৰাকীয়ে কয় যে নৰেন্দ্ৰ মোদী নেতৃত্বাধীন বিজেপি চৰকাৰখনৰ সপক্ষে সমগ্ৰ দেশতে এক বতাহ বলিছে দেশৰ জনসাধাৰণে মোদীক দেশৰ প্ৰধান মন্ত্ৰী হিচাপে আকৌ এবাৰ ক্ষমতা প্ৰদানৰ সিদ্ধান্ত ইতিমধ্যে লৈছে।
‘’এই মোদী চৰকাৰখনে সন্ত্ৰাসবাদৰ বিৰুদ্ধে পদক্ষেপ লৈছে আৰু দেশক এক শক্তিশালী নেতৃত্ব প্ৰদান কৰিছে। নৰেন্দ্ৰ মোদীয়ে দেশৰ দৰিদ্ৰ জনসাধাৰণৰ বিকাশৰ বাবে উজ্জলা, আয়ুষ্মান ভাৰত, স্বচ্ছ ভাৰত আৰু কিষান সমৃদ্ধি যোজনাকে ধৰি বহু সংখ্যক উন্নয়নমূলক আঁচনি গ্ৰহণ কৰিছে। সাধাৰণ ৰাইজে ইয়াৰ পৰা উপকৃত হৈছে,’’-দাসে কয়।
ৰঞ্জিত দাসে দেওবাৰে ধুবুৰী জিলাৰ গৌৰীপুৰৰ মহামায়া খেলপথাৰত ধুবুৰী লোকসভা সমষ্টিৰ পৰা প্ৰাৰ্থিত্ব আগবঢ়োৱা অগপ প্ৰাৰ্থী জাৱেদ ইছলামৰ নিৰ্বাচনী প্ৰচাৰ সভাত ভাষণ দিছিল।
দাসে কয় যে তেওঁ ৰাজ্যখনৰ বেছিভাগ লোকসভা সমষ্টিতে ভ্ৰমণ কৰিছে আৰু দেখা পাইছে যে ২০১৪ৰ লোকসভা নিৰ্বাচনৰ তুলনাত,’’ ২০১৯ত প্ৰধানমন্ত্ৰী নৰেন্দ্ৰ মোদীৰ প্ৰতি ৰাইজৰ মৰম বৃদ্ধি পাইছে।‘’
‘’গোটেই দেশতে আমি ৩০০ তকৈয়ো অধিক লোকসভা আসনত জয়লাভ কৰিম,’’-তেওঁ লগতে দাবী কৰে।
দাসে দাবী কৰি কয়, ‘’ অসমৰ ৰাইজে কংগ্ৰেছ আৰু এআইয়ুডিএফৰ মাজত হোৱা গোপন বুজাবুজিৰ কথা জানিব পাৰিছে যিটোৱে প্ৰত্যক্ষভাৱে বিজেপিক উপকৃত কৰিব।‘’
ৰাজ্যিক বিজেপিৰ সভাপতিগৰাকীয়ে অভিযোগ কৰি কয় যে বিগত ১০ বছৰ ধৰি ধুবুৰী লোকসভা সমষ্টিৰ সাংসদ হিচাপে থকাৰ পাছতো এআইয়ুডিএফৰ মুৰব্বী বদৰুদ্দিন আজমলে সমষ্টিটোৰ বাবে একো নকৰিলে যাৰ বাবে ধুবুৰী জিলাখন আটাইতকৈ পিছ পৰি আছে।
তেওঁ লগতে অসমৰ পূৰ্বৰ কংগ্ৰেছ নেতৃত্বাধীন চৰকাৰখনকো সমালোচনা কৰি কয় যে বিগত ১৫ বছৰ শাসন কৰা চৰকাৰখনে সাধাৰণ ৰাইজৰ বুনিয়াদী প্ৰয়োজন পূৰণ কৰাত ব্যৰ্থ হৈছে।
দেওবাৰৰ সভাখনত ৰঞ্জিত দাসৰ উপৰি ভাষণ ৰাখে ৰাজ্যসভাৰ সাংসদ বিশ্বজিৎ দৈমাৰী, মন্ত্ৰী ৰঞ্জিত দত্ত, গোলকগঞ্জ সমষ্টিৰ বিধায়ক অশ্বিনী ৰায় সৰকাৰ তথা বিপিএফৰ প্ৰাক্তন বিধায়ক বলেন্দ্ৰ মোছাহাৰীয়ে।
