২০১৯ৰ লোকসভা নিৰ্বাচনলৈ মাজত মাত্ৰ দুটা মান মাহ বাকী থকাৰ সময়তে নাগৰিকত্ব সংশোধনী বিধেয়কখন অনা বাবেই অগপই মিত্ৰতা ছেদ কৰাত শংকিত হৈ পৰিছে অসম বিজেপি। কাৰণ নাগৰিকত্ব সংশোধনী বিধেয়কখন বাতিলৰ দাৱীত ৰাজ্যখনত বিজেপি-বিৰোধী আন্দোলনে ক্ৰমে তীব্ৰ ৰূপ ধাৰণ কৰিছে।
গতিকে এতিয়া ৰাজ্যত দেখা দিয়া প্ৰতিকূল পৰিস্থিতিৰ পৰিপ্ৰেক্ষিতত অগপৰ সংগ নোহোৱাকৈ নিৰ্বাচনত অৱতীৰ্ণ হ’বলৈ সাহস গোটাব পৰা নাই বিজেপিয়ে।
এই শংকাতে আজি দলটোৰ হেঙেৰাবাৰীৰ ৰাজ্যিক মুখ্য কাৰ্যালয়ত এখন সংবাদমেলত বিজেপিৰ ৰাষ্ট্ৰীয় সাধাৰণ সম্পাদক ৰামমাধৱে অগপক সিদ্ধান্ত পুনৰ বিবেচনাৰ বাবে অনুৰোধ জনায়।
ৰামমাধৱে কয়, “আমি মিত্ৰজোঁট হিচাপে বিগত নিৰ্বাচনত ৰাইজৰ ওচৰলৈ গৈছিলো। ৰাইজে আমাক শাসনৰ দায়িত্ব দিছিল। গতিকে অগপই এই মিত্ৰতা ত্যাগ কৰিছে যদিও তেওঁলোকৰ সিদ্ধান্ত পুনৰ বিচাৰ কৰাৰ বাবে আমি অনুৰোধ জনাওঁ। তেওঁলোকে পুনৰ বিচাৰ কৰি উভতি আহিলে আমি পাঁচ বছৰৰ চৰকাৰখন একেলগে সম্পূৰ্ণ কৰিব পাৰিম”।
ৰামমাধৱৰ এই কথাতেই অগপই মিত্ৰতালৈ পুনৰ উভতি অহাটো যে বিজেপিয়ে মনে-প্ৰাণে বিচাৰি আছে সেই কথাটো প্ৰমাণ হয়।
উল্লেখ্য যে, ৭ জানুৱাৰিত কেন্দ্ৰীয় কেবিনেটে নাগৰিকত্ব সংশোধনী বিধেয়কখনত অনুমোদন জনোৱাৰ পিছ মুহূৰ্ততে পূৰ্বে কৰা সংকল্প মতে বিজেপিৰ সংগ ত্যাগ কৰিছিল অগপই।
ইয়াৰোপৰি সদৌ অসম ছাত্ৰ সন্থা, কৃষক মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদকে ধৰি অসমৰ সকলো খিলঞ্জীয়া জাতীয়-জনগোষ্ঠীয় সংগঠন আৰু অসমৰ ৰাইজে বিধেয়কখনৰ তীব্ৰ বিৰোধিতা কৰি বিজেপিৰ বাবে যি কঠিন পৰিস্থিতিৰ আনিছে তাত অগপয়ো হাত উজান দিয়াৰ বাবে ইতিমধ্যে কাৰ্য্যসূচী ঘোষণা কৰিছে।
ইপিনে আজিৰ সংবাদমেলত বিধেয়ক বিৰোধী আন্দোলন কিছুমানে সঁচাকৈয়ে শংকিত হৈ কৰিছে যদিও বেছিভাগেই ৰাজনৈতিক ইছ্যু হিচাপেহে ইয়াৰ বিৰোধিতা কৰা বুলি কয় বিজেপিৰ ৰাষ্ট্ৰীয় সাধাৰণ সম্পাদকজনে।
ইয়াৰ ভিতৰত অগপই প্ৰকৃততে শংকিত হৈছে বুলি মন্তব্য কৰি দলটোৰ শংকা দূৰীকৰণৰ বাবে তেওঁলোকৰ লগত বিজেপিয়ে আলোচনা কৰাৰো ইচ্ছা প্ৰকাশ কৰে।
প্ৰসংগক্ৰমে উল্লেখ কৰিব পাৰি যে অগপৰ তিনি মন্ত্ৰীয়ে যোৱা ১০ জানুৱাৰিতেই মুখ্য মন্ত্ৰীক সাক্ষাৎ কৰি পদত্যাগ পত্ৰ দিছিল যদিও সেই পদত্যাগ এতিয়াও গৃহীত হোৱা নাই বুলি কালি প্ৰাক্তন মুখ্য মন্ত্ৰী তৰুণ গগৈয়ে প্ৰকাশ কৰিছিল।
এই সন্দৰ্ভত ৰামমাধৱে কয়, “হয়তো মুখ্য মন্ত্ৰীয়ে অগপই নিজৰ সিদ্ধান্ত পুনৰ বিচাৰ কৰিব বুলি আশা কৰিয়েই তেওঁলোকৰ পদত্যাগ পত্ৰ ৰাজ্যপাললৈ প্ৰেৰণ কৰা নাই”।
যদি সেয়ে হয় তেনেহ’লে এই কথা স্পষ্ট যে অগপ আঁতৰি যোৱাটো অসমত বিজেপিৰ কাৰণে চৰম শংকাৰ কাৰণ। দ্বিতীয়তে পঞ্চায়ত নিৰ্বাচনত শাসক দল হিচাপে ভাল ফল দেখুৱাব নোৱৰা বিজেপিয়ে এতিয়া ৰাজ্যৰ নাগৰিকত্ব সংশোধনী বিধেয়ক-বিৰোধী আন্দোলনৰ সময়ত অকলে নিৰ্বাচনত অৱতীৰ্ণ হোৱাটো যে অনুকুল নহ’ব সেই কথা উপলব্ধি কৰিছে।