অসম চৰকাৰে বৰপেটাত অৱস্থিত ফখৰুদ্দিন আলি আহমেদ চিকিৎসা মহাবিদ্যালয় আৰু হাস্পতালৰ নাম সলনি কৰাৰ এক গুৰুত্বপূৰ্ণ সিদ্ধান্ত গ্ৰহণ কৰিছে। মঙলবাৰে অনুষ্ঠিত ৰাজ্যিক কেবিনেট বৈঠকত এই নাম সলনিৰ প্ৰস্তাৱত মোহৰ মৰা হয়। নতুন সিদ্ধান্ত অনুসৰি এই চিকিৎসা প্ৰতিষ্ঠানখনৰ নাম এতিয়াৰে পৰা বৰপেটা চিকিৎসা মহাবিদ্যালয় আৰু হাস্পতাল হিচাপে জনাজাত হ’ব। ইয়াৰ ফলত দেশৰ প্ৰাক্তন ৰাষ্ট্ৰপতি ফখৰুদ্দিন আলি আহমেদৰ নাম এই চৰকাৰী প্ৰতিষ্ঠানখনৰ পৰা বিলুপ্ত হ’ব।
মুখ্যমন্ত্ৰী হিমন্ত বিশ্ব শৰ্মাই এই সিদ্ধান্তৰ সন্দৰ্ভত যুক্তি আগবঢ়াই কয় যে ৰাজ্যৰ বাকী থকা ১৫খন চিকিৎসা মহাবিদ্যালয়ৰ নাম সেই নিৰ্দিষ্ট অঞ্চলটোৰ নামেৰে নামাকৰণ কৰা হৈছে। কেৱল বৰপেটাৰ এই চিকিৎসা মহাবিদ্যালয়খনৰ নাম এজন ব্যক্তিৰ নামত থকাৰ বাবে প্ৰশাসনিক কাম-কাজত কিছু খেলিমেলিৰ সৃষ্টি হয়।
তেওঁ লগতে উল্লেখ কৰে যে বহু লোকে ফখৰুদ্দিন আলি আহমেদৰ নাম থকাৰ বাবে ইয়াক এখন ব্যক্তিগত খণ্ডৰ চিকিৎসা মহাবিদ্যালয় বুলি ভুল কৰে। সেয়েহে সকলোৰে সুবিধাৰ্থে আৰু একতা বজাই ৰাখিবলৈ এই নামটো সলনি কৰাৰ প্ৰয়োজন হৈ পৰিছে।
চৰকাৰৰ এই যুক্তিক লৈ ৰাজ্যৰ বিভিন্ন মহলত মিশ্ৰিত প্ৰতিক্ৰিয়াৰ সৃষ্টি হৈছে। একাংশই মত প্ৰকাশ কৰিছে যে যদি নামটোক লৈ বিভ্ৰান্তি হৈছিল, তেন্তে নামৰ আগত চৰকাৰী শব্দটো লিখি দিলেই সমস্যাৰ সমাধান হ’লহেঁতেন। প্ৰাক্তন ৰাষ্ট্ৰপতিগৰাকীৰ নাম সম্পূৰ্ণৰূপে মচি পেলোৱা কাৰ্যৰ অন্তৰালত অন্য ৰাজনৈতিক উদ্দেশ্য থাকিব পাৰে বুলিও বহুতৰ মনত সন্দেহ উপজিছে। ফখৰুদ্দিন আলি আহমেদ আছিল অসমৰ পৰা নিৰ্বাচিত হোৱা একমাত্ৰ ভাৰতীয় ৰাষ্ট্ৰপতি। দেশৰ পঞ্চমগৰাকী ৰাষ্ট্ৰপতি হিচাপে তেওঁ কাৰ্যনিৰ্বাহ কৰিছিল।
অৱশ্যে ফখৰুদ্দিন আলি আহমেদৰ কাৰ্যকালত ১৯৭৫ চনৰ জৰুৰীকালীন অৱস্থা জাৰি কৰাৰ বিষয়টোৱে বিভিন্ন সময়ত বিতৰ্কৰ সৃষ্টি কৰি আহিছে। তদুপৰি কেইবছৰমান পূৰ্বে অসমৰ ৰাষ্ট্ৰীয় নাগৰিক পঞ্জীত তেওঁৰ পৰিয়ালৰ সদস্যৰ নাম বাদ পৰাক লৈও দেশজুৰি চৰ্চা হৈছিল। যদিও পাছলৈ সেই তালিকা সংশোধন কৰা হৈছিল, তথাপিও বিজেপি চৰকাৰে বিভিন্ন সময়ত জৰুৰীকালীন অৱস্থাৰ প্ৰসংগ টানি আনি প্ৰাক্তন ৰাষ্ট্ৰপতিগৰাকীৰ ভূমিকাৰ সমালোচনা কৰি আহিছে। এতিয়া চিকিৎসা মহাবিদ্যালয়ৰ পৰা তেওঁৰ নাম আঁতৰাই দিয়া কাৰ্যই ৰাজ্যিক ৰাজনীতিত পুনৰ নতুন বিতৰ্কৰ জন্ম দিছে।
