‘ক’ৰ’ণা ৰোগীক চিকিৎসাৰ খৰচ দিব নোৱাৰা বিজেপি চৰকাৰে পদত্যাগ কৰক। তেওঁলোকে মানে এতিয়া হাত দাঙি দিছে।‘ ৰাজীৱ ভৱনত সম্বোধন কৰা এক সংবাদমেলত এই দাবী জনাইছে প্ৰদেশ কংগ্ৰেছৰ সভাপতি ৰিপুন বৰাই।
উল্লেখযোগ্য যে, কিছুদিন পূৰ্বে মন্ত্ৰী হিমন্ত বিশ্ব শৰ্মাই ৰাজ্যত কিছু বিত্তীয় সংকটে দেখা দিয়াৰ কথা প্ৰকাশ কৰি কোভিড ৰোগীয়ে কিছু খৰচ এতিয়াৰে পৰা নিজে বহন কৰিব লাগিব বুলি সংবাদমেলত উল্লেখ কৰিছিল। তাৰেই আলম লৈ সংবাদমেলত প্ৰতিক্ৰিয়া প্ৰকাশ কৰে প্ৰদেশ কংগ্ৰেছৰ সভাপতিগৰাকীয়ে।
বৰাই লগতে বিজেপি চৰকাৰক উদ্দেশ্যি কয় ‘যদি তোমালোকে চিকিৎসাৰ খৰচ দিব পাৰাই তেতিয়াহ’লে তোমালোকে হোৱাইটপেপাৰ দিয়া যে চৰকাৰৰ বিত্তীয় সংকট হৈছে নে নাই হোৱা। চলিত বৰ্ষত কেন্দ্ৰীয় চৰকাৰৰ পৰা কিমান টকা পাইছা তাৰো হোৱাইট পেপাৰ প্ৰকাশ কৰা।’
ৰিপুন বৰাৰ মতে ‘কেন্দ্ৰীয় চৰকাৰৰ পৰা পইচা অহাই নাই। চৰকাৰে যে আঁচনিবোৰ ৰূপায়ণ কৰিবলৈ গৈছে তেওঁলোকে ক’ৰ পৰা টকা পাব বা টকাৰ উৎস কি ৰাইজৰ সেয়া জনাৰ অধিকাৰ আছে।‘
উচ্চতম ন্যায়ালয়ত এতিয়ালৈকে যিমানকেইটা ৰায়দান হৈছে আটাইকেইটা ৰায়দানতে কোৱা হৈছে যে ক’ৰ’না ৰোগীৰ আটাইবোৰ খৰচ চৰকাৰে বহন কৰিব লাগিব বুলি তেওঁ সংবাদমেলত সদৰী কৰে। আনকি ব্যক্তিগত খণ্ডৰ চিকিৎসালয়সমূহেও বিনামুলীয়াকৈ চিকিৎসা কৰিব লাগে বুলি নিৰ্দেশ দিছে বুলিও তেওঁ কয়।
উক্ত সংবাদমেলতে স্বাস্থ্য মন্ত্ৰী হিমন্ত বিশ্ব শৰ্মাক কটাক্ষ কৰি বৰাই কয় ‘স্বাস্থ্য মন্ত্ৰীগৰাকীয়ে উচ্চতম ন্যায়ালয়ক বুঢ়া আঙুলি দেখুৱাইছে কেন্দ্ৰীয় চৰকাৰকো বুঢ়া আঙুলি দেখুৱাইছে।‘
ইপিনে, ২০২১ ত কংগ্ৰেছৰ লক্ষ্য হৈছে মিছন-৮০ বুলি উল্লেখ কৰি বৰাই লগতে কয় ‘বিজেপিয়ে ১০০ খন আসন পাম বুলি কৈছে। আমি বিজেপিৰ দৰে অবাস্তৱ কোনো কথা আশা নকৰো। বিজেপিৰ ১০০ প্লাছ মিছনটো জানুৱাৰী- ফেব্ৰুৱাৰি মাহত ২০-২৫ হ’বগৈ।‘
‘২০২১ ত কংগ্ৰেছে চৰকাৰ বনাব বুলি বিশ্বাসী। যদি কংগ্ৰেছৰ চৰকাৰ হয় তেন্তে এসপ্তাহৰ ভিতৰত কা আন্দোলনৰ লগত জৰিত ছাত্ৰ নাইবা যিমানবোৰ সংগঠনৰ নেতা-কৰ্মীৰ বিৰুদ্ধে গোচৰ আছে সেইসমূহ উঠাই ল’ম।‘ এইদৰে মন্তব্য কৰি বৰাই ২০২১ ত কংগ্ৰেছে চৰকাৰ গঠন কৰিব বুলি দৃঢ়তাৰে কয়।
