‘’বহু প্ৰত্যাশিত বগীবিল দলংখন কাইলৈ প্ৰধানমন্ত্ৰী নৰেন্দ্ৰ মোডীয়ে শুভ উদ্বোধন কৰিব আৰু ব্ৰহ্মপুত্ৰৰ উত্তৰ পাৰ আৰু দক্ষিণ পাৰৰ মাজত সংযোগ স্থাপন হোৱাত গুৰুত্বপূৰ্ণ ভূমিকা পালন কৰিব।‘’
বগীবিল দলঙৰ শুভ উদ্বোধনী অনুষ্ঠানত অংশগ্ৰহণ কৰিবলৈ যোৱা অসমৰ বিত্ত আৰু স্বাস্থ্য বিভাগৰ মন্ত্ৰী ড০ হিমন্ত বিশ্ব শৰ্মাই আজি নগাঁও আবৰ্ত ভৱনত কিছু সময় জিৰণি লোৱাৰ সময়তে নগঞা সাংবাদিকৰ লগত দলঙৰ উদ্বোধন সন্দৰ্ভত মত-বিনিময় কৰে।
তেওঁ কয় যে ভাৰতীয় জনতা পাৰ্টিৰ চৰকাৰখনে কেন্দ্ৰতে হওক বা ৰাজ্যতে হওক কথা ৰাখিছে। অসমৰ কেইবাটাও প্ৰকল্প চৰকাৰখনে সম্পূৰ্ণ কৰি তুলিছে। শৰাইঘাটৰ দ্বিতীয় দলং, ধলা-শদিয়া দলং আৰু বগীবিল দলং অসম্পূৰ্ণ হৈ আছিল। আমাৰ নিৰ্বাচনী ইস্তাহাৰত এই দলং কেইখন সম্পূৰ্ণ কৰাৰ প্ৰতিশ্ৰুতি দিছিলো। ইতিমধ্যে শৰাইঘাটৰ দ্বিতীয় দলং আৰু ধলা-শদিয়া দলং সম্পূৰ্ণ হ’ল। কাইলৈ বগীবিল দলঙৰ শুভ উদ্বোধন হোৱাৰ লগে লগে অসমৰ আধা হৈ থকা প্ৰকল্পখিনি সুন্দৰ সমাপ্ত হ’ব বা সুন্দৰ আৰম্ভণি হ’ব, য’ত ৰাইজে ব্যৱহাৰ কৰিব পাৰিব।
মন্ত্ৰী শৰ্মাই লগতে কয়, ‘’আমি আশা কৰিম, ইয়াৰ লগে লগে অসমত অনাগত দিনত আৰু কেইবাটাও প্ৰকল্প লাভ কৰিবলৈ সক্ষম হ’ম। ইয়াৰ উপৰি ব্ৰহ্মপুত্ৰৰ ওপৰত আৰু কেইবাখনো দলঙৰ পৰিকল্পনা কৰিছো, সেইবোৰো অনাগত দিনত দেখা পাম বুলি আশা কৰিছো।‘’
আনহাতে, সাংবাদিকে সোধা এক প্ৰশ্নৰ উত্তৰত মন্ত্ৰীগৰাকীয়ে কয়, ‘’এতিয়া যদি এইবোৰ কাম শেষ হোৱাৰ পিছত কোনোবাই প্ৰশ্ন কৰে যে এই কামবোৰ বিজেপি চৰকাৰে মাত্ৰ দুবছৰতে শেষ কৰিব পাৰিলে আপোনালোকে ২৩ বছৰে কিয় পৰা নাছিল। যিমানে কৃতিত্ব ল’ব চেষ্টা কৰিব আচলতে মানুহৰ মনত সিমানে জাগি উঠিব আপোনালোকে কামবোৰ আৰম্ভ কৰিছিল যদিও শেষ হ’বলৈ কিয় ১০ বছৰ লাগিল।‘’
তেওঁ কয়, ‘’আচলতে এইটো বুজা যায় যে, তেওঁলোকৰ কামবোৰত আস্থা আৰু নিষ্ঠা নাছিল। আমাৰ চৰকাৰে দুই-আঢ়ৈ বছৰত তিনিখনকৈ দলঙৰ কাম সম্পূৰ্ণ কৰি তোলাটোৱে কাৰ কাম কৰাৰ আস্থা আৰু নিষ্ঠা আছে সেয়া প্ৰমাণ কৰিছে।‘’
তদুপৰি সাংবাদিকে নগাঁও জিলা পৰিষদ গঠন সন্দৰ্ভত সোধা প্ৰশ্নৰ সম্পৰ্কত মন্ত্ৰীগৰাকীয়ে কোনোধৰণৰ মন্তব্য নিদি জিলা বিজেপিয়ে ইয়াৰ সকলো কাম কৰিব বুলি কয়।
