নাগৰিকত্ব বিধেয়কক লৈ শাসকীয় দল বিজেপিৰ নেতা-কৰ্মীয়ে বিভিন্ন প্ৰতিবাদৰ সন্মুখীন হোৱাৰ সময়তে এইবাৰ প্ৰতিবাদকাৰীয়ে খোদ নিজ সমষ্টিতে প্ৰৱেশ নিষিদ্ধ কৰিলে বটদ্ৰৱা সমষ্টিৰ বিজেপি বিধায়িকা আঙুৰলতা ডেকাক।
বহু বিতৰ্কিত বিধেয়কখন বাতিলৰ দাবীত বটদ্ৰৱা সমষ্টিৰ ৰাইদঙীয়াত ৩১ জানুৱাৰিত অনুসূচিত জাতি সংগ্ৰামী যুৱ পৰিষদ, সদৌ অসম ছাত্ৰ সন্থাকে ধৰি কেইবাটাও সংগঠনৰ যৌথ উদ্যোগত কৰা প্ৰতিবাদী কাৰ্যসূচীতে এই সিদ্ধান্ত লোৱা হয়।
প্ৰতিবাদকাৰীসকলে মুখ্য মন্ত্ৰী সৰ্বানন্দ সোণোৱাল মুৰ্দাবাদ ধ্বনি দিয়াৰ লগতে স্থানীয় বিধায়িকা আঙুৰলতা ডেকাক তীব্ৰ সমালোচনা কৰে। বিধেয়কখনৰ বিৰুদ্ধে অসমৰ শিল্পী সমাজে মুকলিকৈ বিৰোধ প্ৰদৰ্শন কৰাৰ পাছতো আঙুৰলতা ডেকা কিয় নিমাত বুলিও প্ৰশ্ন উত্থাপন কৰে প্ৰতিবাদকাৰীসকলে।
তেওঁলোকে আৰু কয় যে বিধায়িকা হোৱাৰ পূৰ্বে আঙুৰলতা ডেকা নিজে এগৰাকী যে শিল্পী আছিল সেই কথা তেওঁ ক্ষমতাৰ লোভত পাহৰি গৈছে। বিধেয়কখন গৃহীত হ’লে অসমৰ ভাষা-সংস্কৃতি, সাহিত্য সকলো নিঃশেষ হৈ যাব বুলি জানিও বিধায়িকাগৰাকীয়ে মনে মনে থকা কাৰ্যক ধিক্কাৰ প্ৰদান কৰাৰ লগতে বিধেয়কখন বাতিল নোহোৱা পৰ্যন্ত সংগঠন কেইটাই বিধায়িকাগৰাকীৰ বটদ্ৰৱা সমষ্টিত প্ৰৱেশ নিষিদ্ধ কৰিছে।
ইফালে প্ৰতিবাদকাৰীসকলে দিনৰ ভাগত শান্তিপূৰ্ণভাৱে নগাঁও-ধিং-মৈৰাবাৰী সংযোগী গড়কাপ্তানী পথৰ ৰাইদঙীয়াত প্ৰতিবাদ সাব্যস্ত কৰি থকাৰ সময়তে ঘটনাস্থলত আৰক্ষীৰ লোক উপস্থিত হৈ অনুসূচিত জাতি সংগ্ৰামী যুৱ পৰিষদৰ কেন্দ্ৰীয় সমিতিৰ সভাপতি সঞ্জীৱ দাস, নগাঁও জিলা সমিতিৰ কাৰ্যকৰী সভাপতি কনকজিৎ দাস আৰু ৰাইদঙীয়া আঞ্চলিক সমিতিৰ সভাপতি ৰুবেল দাসক আটক কৰি থানালৈ লৈ যায় যদিও পাছত আটাইকেইজনকে ব্যক্তিগত জামিনত মুকলি কৰি দিয়ে।