সততে বিতৰ্কিত আৰু অসমীয়া বিৰোধী মন্তব্য কৰি অহা হোজাই সমষ্টিৰ বিজেপি বিধায়ক শিলাদিত্য দেব বহু দিন দলৰ নিৰ্দেশত চুপ হৈ থকাৰ পিছত আজি পুনৰ মুখ খুলিলে সংবাদ মাধ্যমৰ আগত।
আজি মুখ খুলিয়েই পুনৰ বিতৰ্কিত মন্তব্য কৰে স্বভাৱগতভাৱেই ইচলাম-বিদ্বেষী বিধায়কজনে। শিলাদিত্যই আজি সাংবাদিকৰ আগত কয়, “মুছলমানসকলে কংগ্ৰেছক ভোট দিয়াটো স্থায়ী নহয়। মুছলমানসকলৰ প্ৰধান উদ্দেশ্য জনসংখ্যা বৃদ্ধি কৰি চৰকাৰ গঠন কৰা।”
আনহাতে পূৰ্বৰ দৰে এ আই য়ু ডি এফ দলটোৰ প্ৰতি আক্ৰমণাত্মক হৈ শিলাদিত্যই কয়, “এ আই য়ু ডি এফে মুছলমানপ্ৰধান ৰাজ্য গঠনৰ কাম কৰি আছে।”
উল্লেখযোগ্য যে যোৱা ৫ নৱেম্বৰৰ দিনা পঞ্চায়ত নিৰ্বাচনৰ অধিসূচনা জাৰি কৰাৰ পাছৰে পৰা বিতৰ্কিত বিধায়কজনৰ মুখ বন্ধ হৈ পৰিছিল। ভোটৰ অংকত দলৰ নিৰ্দেশতে তেওঁ মুখ বন্ধ কৰিছিল বুলি বিভিন্নজনে মন্তব্য কৰিছিল। পঞ্চায়ত নিৰ্বাচন পাৰ হোৱাৰ পাছতেই বিতৰ্কিত বিধায়কজন পুনৰ সৰৱ হৈ পৰাটোৱে ইয়াক সত্য প্ৰমাণিত কৰে।
আজি কেৱল ইছলামবিদ্বেষী মন্তব্য দিয়াই নহয়, মিত্ৰ দল অগপকো কটাক্ষ কৰিবলৈ নেৰিলে।
“অগপ আগতেও আই চি য়ুত আছিল, এতিয়া পুনৰ আই চি য়ুলৈ গ’ল।” বিধায়কজনৰ কটাক্ষ।
তাৎপৰ্য্যপূৰ্ণ যে, পঞ্চায়ত নিৰ্বাচনত বিজেপিৰ শীৰ্ষ নেতা হিমন্ত বিশ্ব শৰ্মা, মুখ্য মন্ত্ৰী সৰ্বানন্দ সোণোৱালকে ধৰি অন্যান্য নেতাসকলে অগপক কটু ভাষাৰে সমালোচনা কৰিছিল যদিও শিলাদিত্য অগপক সমালোচনা কৰা দেখিবলৈ পোৱা নগৈছিল।
মন কৰিব লগীয়া যে জিলা পৰিষদ গঠনৰ ক্ষেত্ৰত হোজাই সমষ্টিত বিজেপিয়ে সংখ্যাগৰিষ্ঠতা লাভ কৰা নাই। বিজেপিয়ে ৫খন জিলা পৰিষদৰ আসন লাভ কৰাৰ বিপৰীতে কংগ্ৰেছে লাভ কৰিছে ৬খন আসন।
ইপিনে, কংগ্ৰেছ দলে জিলা পৰিষদ গঠনৰ বাবে কুচকাৱাজ চলাই থকাৰ মাজতেই শিলাদিত্যই দাবী কৰি কয়, “বিজেপিয়ে হোজাই জিলা পৰিষদ গঠন কৰিব।” শিলাদিত্যৰ মতে বিজেপিৰ হাতত জিলা পৰিষদ গঠন কৰাৰ অংক আছে।
