‘আমিনুল ইছলামক শত্ৰু হিচাপে গণ্য কৰি পাকিস্তানলৈ পঠিয়াই দিয়াৰ একান্ত প্ৰয়োজন।‘ জন্মু-কাশ্মীৰৰ পুলৱামাত সন্ত্ৰাসবাদীৰ বৰ্বৰোচিত কাৰ্য্যৰ প্ৰতিবাদত ভাৰতীয় জনতা পাৰ্টীৰ গুৱাহাটী মহানগৰ জিলা সমিতিয়ে অনুষ্ঠিত কৰা ধৰ্ণা কাৰ্য্যসূচীত অংশগ্ৰহণ কৰি আমিনুল ইছলামক কটাক্ষ কৰি এইদৰে কয় গুৱাহাটী লোকসভা সমষ্টিৰ সাংসদ বিজয়া চক্ৰৱৰ্তীয়ে। ১৫ ফেব্ৰুৱাৰিত ধিং সমষ্টিৰ বিধায়কজনে কাশ্মীৰৰ ঘটনাটোক লৈ দিয়া এটা বিতৰ্কিত ফেচবুক প’ষ্টৰ প্ৰতিক্ৰিয়াত এইকদৰে কয় বৰ্ষীয়ান নেত্ৰীগৰাকীয়ে।
প’ষ্টটোত ইছলামে কৈছিল ‘পাকিস্তানৰ সাধাৰণ নিৰ্বাচনৰ পূৰ্বে সেনাৰ গুলীয়াগুলী আৰু সদায় ভাৰতৰ সাধাৰণ নিৰ্বাচনৰ পূৰ্বে কাশ্মীৰত সন্ত্ৰাসবাদী আক্ৰমণ কিয় হয়?’
এই সন্দৰ্ভত সাংবাদিকে প্ৰতিক্ৰিয়া জানিব বিচৰাত গুৱাহাটী সমষ্টিৰ বৰ্তমানৰ সাংসদ চক্ৰৱৰ্তীয়ে কয়, ‘তেনেকুৱা মানুহক ধৰি আনি ৰাস্তাত গোটা বেতৰে কোবাব লাগে যাতে থিয় হ’ব নোৱাৰে।‘
‘আমিনুল ইছলামে এই হত্যাকাণ্ড সংঘটিত কৰিছে নেকি? আমাৰ যি ৪২ জন শ্বহীদ হ’ল ইয়াত বিধায়ক আমিনুল ইছলামৰ হাত আছে নেকি?’ এইদৰেও বিধায়কজনক প্ৰশ্ন কৰে চক্ৰৱৰ্তীয়ে?
ইয়াৰোপৰি, ‘কোনে কৰিছে বুলি তেওঁ ভাবিছে?’ বুলি চক্ৰৱৰ্তীয়ে আমিনুলক লগতে প্ৰশ্ন কৰি কয় যে এনেকুৱা ধৰণৰ মন্তব্য যি কৰিছে তেওঁ বিধায়ক হোৱাৰ যোগ্যতা নাই।
ইপিনে, ভাৰতবৰ্ষত এইটোৱেই এই ধৰণৰ আটাইতকৈ জঘন্যতম সন্ত্ৰাসবাদীৰ ঘটনা বুলিও উল্লেখ কৰে গুৱাহাটীৰ সাংসদগৰাকীয়ে।
চক্ৰৱৰ্তীৰ মতে ‘ভাৰতক যুদ্ধত বলে নোৱাৰি এতিয়া পাকিস্তানে ছায়া যুদ্ধৰ জৰিয়তে ভাৰতীয় সেনাবাহিনীক আক্ৰমণ কৰাৰ ষড়যন্ত্ৰ কৰিছে।‘
তদুপৰি সাংসদগৰাকীয়ে পাকিস্তানক ‘বিষাক্ত কাঠফুলা’ আৰু ‘বিহ মেটেকা’ৰ সৈতে তুলনা কৰি কয় যে এই বিহ মেটেকাক যদি জীয়াই ৰাখে তেন্তে পৃথিৱীত কেতিয়াও শান্তি নহয়, গতিকে ভাৰতে পাকিস্তানক ধ্বংস কৰি দিব লাগে।
প্ৰসংগক্ৰমে উল্লেখ কৰিব পাৰি যে ধিং সমষ্টিৰ বিধায়কগৰাকী এই প্ৰশ্নক তীব্ৰ গৰিহণা দিছিল প্ৰাক্তন মুখ্য মন্ত্ৰী তৰুণ গগৈ আৰু ৰাজ্যিক বিজেপিৰ সাধাৰণ সম্পাদক দিলীপ শইকীয়ায়ো।
