লিবাৰেল ডেমক্রেতিক পাৰ্টি, অসমে ৰাজ্যখনৰ সম্পদ সমূহৰ ব্যক্তিগতকৰণ অসম চৰকাৰে দিয়া সমৰ্থক তীব্ৰ ভাষাৰে সমালোচনা কৰে।
এল. ডি. পিৰ ৰাজ্যিক অধ্যক্ষ শ্ৰী হলিৰাম টেৰাঙে সংবাদ মাধ্যমলৈ প্ৰেৰণ কৰা এক বিবৃতিত কয় যে কেন্দ্ৰৰ বিজেপি চৰকাৰে দেশৰ সম্পদসমূহ এফালৰ পৰা ব্যক্তিগত ব্যৱসায়িক গোষ্ঠীৰ হাতত গতাই আছে আৰু দুৰ্ভাগ্যজনক কথা যে ৰাজ্যৰ চৰকাৰখনে কাঠৰ পুতলাৰ দৰে সমৰ্থন কৰি আহিছে।
অলপতে কেবিনেটত গুৱাহাটী, তিৰুৱানন্তপুৰম আৰু জয়পুৰৰ বিমানবন্দৰ কেইটা ব্যক্তিগত খণ্ডৰ হাতত গতাই দিয়াৰ সিদ্ধান্ত গ্ৰহণ কৰিছে। কেন্দ্ৰ চৰকাৰৰ এই সিদ্ধান্তৰ বিৰুদ্ধে কেৰেলা চৰকাৰে হাইকৰ্টৰ দৰাস্থ হৈছে কিন্তু অসম চৰকাৰৰ কোনো মন্ত্রী অথবা ৰাজ্যিক বিজেপিৰ নেতৃবৰ্গই এই সিদ্ধান্তৰ বিৰুদ্ধে একো নক’লে বুলি কয় টেৰাঙে।
টেৰাঙে বিবৃতিটোত লগতে কয় যে ২০১৬ চনত সোণোৱাল চৰকাৰে বাৰখন তৈল ক্ষেত্র ব্যক্তিগতখণ্ডৰ হাতত গতাই দিছিল। ১৯৯৮ৰ পৰা ২০১২ লৈ ২৫৭ খন তৈল ক্ষেত্র ব্যক্তিগত খণ্ডৰ হাতলৈ যায়। অসমৰ ৰাজ্যিক চিৰিয়াখানাও ব্যক্তিগতকৰণৰ খবৰ শুনিব পোৱা গৈছে। বিজেপি কাৰ বিকাশ কৰাত আগ্ৰহী? ৰাজ্যৰ জনতাৰ নে ব্যৱসায়িক গোষ্ঠীৰ? এই প্ৰশ্ন কৰিছে টেৰাঙে।
২৬ নৱেম্বৰ তাৰিখে দেশৰ শীৰ্ষ ১০ টা ট্ৰেড ইউনিয়নে আহ্বান কৰা দেশব্যাপী ধৰ্মঘটক সমৰ্থন জনাই এলডিপিৰ সভাপতি গুণ গগৈয়ে কয়,”আমি ইয়াক সমৰ্থন জনাইছোঁ। চৰকাৰে ‘প্ৰফিট বিফৰ পিপ’ল’ নীতিত কাম কৰি আছে। ব্যক্তিগতকৰণৰ সিদ্ধান্তসমূহ ডাঙৰ কৰ্পৰেচনসমূহৰ স্বাৰ্থলৈ লক্ষ্য ৰাখি লোৱা হৈছে। চৰকাৰে ‘প্ৰ-বিজনেছ’ আৰু ‘প্ৰ-মাৰ্কেট’ -এই দুটাৰ মাজৰ পাৰ্থক্য বুজা উচিত। যেতিয়াই ডাঙৰ কৰ্পৰেচনসমূহৰ স্বাৰ্থ ৰক্ষ্যাৰ্থে প্ৰ-বিজনেছ নীতি লোৱা যায় তেতিয়া ই বেলেগ একো নহয় কিন্তু ক্ৰনি কেপিতেলিজম্ হে মাথোঁ“