গুজৰাট নিবাসী বিজেপিৰ জ্যেষ্ঠ নেতা তথা সাংসদ অভয় ভৰদ্বাজৰ মঙলবাৰে চেন্নাইৰ এখন চিকিৎসালয়ত ক’ভিড-১৯ সংক্ৰমণৰ ফলত মৃত্যু হয়।
ৰাজ্যখনৰ উপ মুখ্য মন্ত্ৰী নীতিন পেটেলে জনাইছে এই কথা।
৬৬ বছৰীয়া এজন জনপ্ৰিয় তথা পৰিচিত অধিবক্তা ভৰদ্বাজ চলিত বছৰৰ জুন মাহত ৰাজ্যসভালৈ নিৰ্বাচিত হৈছিল।
যোৱা আগষ্ট মাহত দলীয় সভা আৰু ৰাজকোটত এটা ৰ’ড শ্ব’ত অংশগ্ৰহণ কৰাৰ পিছতে তেওঁ ক’ৰ’না ভাইৰাছত সংক্ৰমিত হৈছিল।
জ্যেষ্ঠ নেতা গৰাকীৰ মৃত্যুত প্ৰধান মন্ত্ৰী নৰেন্দ্ৰ মোদীয়ে শোক প্ৰকাশ কৰি এটা টুইট কৰে।
তেওঁ টুইটত কয়, ‘গুজৰাটৰ ৰাজ্যসভাৰ সাংসদ অভয় ভৰদ্বাজ এগৰাকী প্ৰতিষ্ঠিত অধিবক্তা আছিল আৰু সমাজ সেৱাৰ বাবে সদা তৎপৰ আছিল। অতি দু:খজনক কথা যে, আমি এজন ৰাষ্ট্ৰীয় বিকাশৰ কথা চিন্তা কৰা বিচক্ষণ আৰু ব্যৱহাৰিক ব্যক্তিত্বক হেৰুৱালো। তেওঁৰ পৰিয়াল আৰু বন্ধুবৰ্গৰ প্ৰতি সমবেদনা’।
গুজৰাট কংগ্রেছৰ প্ৰাক্তন সভাপতি অৰ্জুন মোদৱাদিয়াইও ভৰদ্বাজৰ মৃত্যুত গভীৰ শোক প্ৰকাশ কৰে।
তেওঁ টুইট কৰি কয়, ‘গুজৰাটৰ পৰা শেহতীয়াকৈ নিৰ্বাচিত ৰাজ্যসভাৰ সদস্য অভয় ভৰদ্বাজৰ শোক সন্তপ্ত পৰিয়াললৈ সমবেদনা জনাইছো। গুজৰাটৰ জনতাই ৰাজ্যসভাত আৰু এটা কণ্ঠ আৰু প্ৰতিনিধি হেৰুৱাটো সঁচাকৈয়ে দুৰ্ভাগ্যজনক। আত্মাই শান্তি লাভ কৰক’।
উল্লেখ্য যে এসপ্তাহৰ ভিতৰতে গুজৰাটৰ দুখনকৈ ৰাজ্যসভাৰ আসন খালী হৈছে ৷ যোৱা ২৬ নবেম্বৰত ক’ভিড ১৯ৰ বাবেই কংগ্ৰেছত জ্যেষ্ঠ নেতা আহমেদ পেটেলৰ মৃত্যু হৈছিল
