ৰাজ্যখনৰ প্ৰধান আঞ্চলিক ৰাজনৈতিক দল অসম গণ পৰিষদৰ সভাপতি, প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, বৰ্তমানৰ বিধায়ক কেইগৰাকীৰ উপৰি দলটোৰ কাৰ্যকৰী সভাপতি তথা মিত্ৰজোঁটৰ চৰকাৰৰ জলসম্পদ মন্ত্ৰী কেশৱ মহন্তৰ গৃহ সমষ্টি কলিয়াবৰত অতি শোচনীয়ভাৱে পৰাস্ত হল অগপৰ বহু কেইজন পঞ্চায়ত প্ৰাৰ্থী।
জানিব পৰা মতে অগপই কলিয়াবৰত ১৮খন গাঁও পঞ্চায়তৰ ৭গৰাকী সভাপতি বিজয়ী হোৱাৰ বিপৰীতে বিজেপিয়ে ৯খন আৰু কংগ্ৰেছ দলে পালে ৩খন। ঠিক সেইদৰে আঞ্চলিক সদস্যতো অগপতকৈ বেছি পালে বিজেপিয়ে। আঞ্চলিক সদস্য পদত অগপই ৭, বিজেপিয়ে ৮ আৰু কংগ্ৰেছে ৩খন আসন লাভ কৰে।
কিন্তু মন কৰিবলগীয়া কথা হ’ল সমষ্টিটোৰ চাৰিখন জিলা পৰিষদৰ আসনত অগপৰ এজনো সদস্য জয়ী হ’ব নোৱাৰিলে। কেশৱ মহন্তই প্ৰতিনিধিত্ব কৰা সমষ্টিটোৰ আটাইকেইখন জিলা পৰিষদে বিজেপিয়ে দখল কৰিবলৈ সক্ষম হয়।
উল্লেখ্য যে আঞ্চলিকতাবাদৰ ধ্বজাবাহক কেশৱ মহন্তই কলিয়াবৰত বহু বছৰ ধৰি অগপক প্ৰতিনিধিত্ব কৰি আহিছিল। কিন্তু এই পঞ্চায়ত নিৰ্বাচনত বিজেপিৰ ওচৰত সেও মনা পৰিলক্ষিত হয় কেশৱ মহন্তক। আনকি নিজ কুঁৱৰীটোল গাঁও পঞ্চায়তৰ সভাপতি তথা জিলা পৰিষদত বিজেপিৰ প্ৰাৰ্থী জয়ী হোৱাটো অগপ দলৰ বাবে এক মোক্ষম আঘাত হিচাপে পৰিগণিত হৈছে।
আনহাতে বিজেপিৰ ফলাফলত সন্তুষ্টি লাভ কৰিছে বিজেপিৰ কৰ্মকতা তথা শুভাকাংশীসকল। জিলা পৰিষদৰ ৪টাকৈ পদত বিজয়ী হোৱা বিজেপি দলৰ ২৯নং দ্বাৰ বাগৰি পঞ্চায়তৰ জিলা পৰিষদৰ প্ৰাৰ্থী জিতেন গৌড়ই আমাক কয় যে দলীয় কৰ্মী, ৰাইজ, অনুৰাগী ,আৰু বিজেপিৰ ৰাজ্যিক সম্পাদক দীপলু ৰঞ্জন শর্মা আৰু মন্ত্ৰী হিমন্ত বিশ্ব শৰ্মাৰ যথেষ্ট সাহস সহায় সহযোগিতা পৰামৰ্শ আৰু আশীৰ্বাদত এই বৃহৎ ভোটত জয়লাভ কৰে বুলি উল্লেখ কৰে।
এক সূত্ৰৰ পৰা জানিব পৰা মতে ভোটগণনা কক্ষত বিজেপিৰ প্ৰাৰ্থী জয়যুক্ত হোৱাৰ পাছতো গণনাত খেলি মেলি কৰি অগপ দলৰ প্ৰাৰ্থীক জয়যুক্ত কৰাৰ চেষ্টা চলায়। ইয়াৰ উপৰি বিজেপি দলৰো এজন সদস্যই গণনা কক্ষত কিছু খেলিমেলি কৰি গণনা কক্ষৰ পৰিবেশ বিনষ্ট কৰা জানিব পৰা গৈছে।