“অসম গণ পৰিষদ দলৰ ক্ৰমাগত উত্থানত বিজেপি দল শংকিত হৈছে ৷ অগপৰ উত্থানকলৈ শংকিত হোৱাৰ বাবেই পঞ্চায়ত নিৰ্বাচনত বিজেপি দলে অগপৰ বিৰুদ্ধে বিভিন্ন অপপ্ৰচাৰ চলাইছে ৷” এই মন্তব্য অগপৰ সভাপতি তথা কৃষিমন্ত্ৰী অতুল বৰাৰ ৷
বৰপেটা জিলাৰ দংৰাত বৃহস্পতিবাৰে বিয়লি প্ৰায় ৩-৩০ বজাত অনুষ্ঠিত অগপৰ নিৰ্বাচনী সভাত বিজেপি সন্দৰ্ভত এই মন্তব্য আগবঢ়ায় মন্ত্ৰীগৰাকীয়ে ৷ মন্ত্ৰীগৰাকীয়ে লগতে কয় যে, অসম গণ পৰিষদ দল ধৰ্মনিৰপেক্ষ দল ৷ এই দলটো ধৰ্মনিৰপেক্ষ হোৱা বাবে ধৰ্মৰ নামত বিদেশী চিনাক্তকৰণৰ পক্ষপাতী নহয়।
কংগ্ৰেছ চৰকাৰৰ অপশাসন ওৰ পেলাবৰ বাবেই ৰাইজে বিচৰা ধৰণে অগপ দলে বিজেপি, বিপিএফৰ লগত ৰামধেনু সদৃশ মিত্ৰতাৰে চৰকাৰ গঠন কৰিবলৈ সক্ষম হোৱা বুলি তেওঁ কয় ৷ কিন্তু বিজেপি দলে অসমীয়া জাতিধ্বংসী নাগৰিকত্ব সংশোধনী বিধেয়কক সমৰ্থন কৰাৰ পাছৰে পৰাই অগপই ৰাইজৰ সহযোগত এই বিধেয়কৰ প্ৰবল বিৰোধিতা কৰি অহা বুলিও মন্ত্ৰীগৰাকীয়ে মন্তব্য কৰে ৷
অগপ দলে ৰাজনৈতিক সংস্থাপন দিয়া নেতাসকলে এতিয়া অইন দলত গৈ অগপক সমালোচনা কৰাটো লজ্জাজনক বুলিও মন্ত্ৰীগৰাকীয়ে মন্তব্য কৰে ৷
বৰপেটা জিলা অগপৰ সম্পাদক ধনজিৎ পাঠকৰ সভাপতিত্বত অনুষ্ঠিত সভাখনত মন্ত্ৰী বৰাই কংগ্ৰেছ আৰু এ আই য়ু ডি এফৰ বিৰুদ্ধেও মন্তব্য প্ৰদান কৰে ৷ অসম গণ পৰিষদ দলৰ বাহিৰে কোনো ৰাষ্ট্ৰীয় দলে যে অসমৰ সমস্যা সমাধান কৰিব নোৱাৰে সেই কথা অসমৰ ৰাইজে ইতিমধ্যে বুজি পোৱা বুলিও মন্ত্ৰীগৰাকীয়ে উল্লেখ কৰে ৷
তদুপৰি, নিকা পঞ্চায়ত গঠন কৰাৰ স্বাৰ্থত অগপ প্ৰাৰ্থীক ভোট দিবলৈ মন্ত্ৰীগৰাকীয়ে ৰাইজক আহ্বান জনায় ৷ মন্ত্ৰীগৰাকীয়ে জিলাখনৰ আন কেইবাখনো নিৰ্বাচনী সভাতো অংশ গ্ৰহণ কৰে ৷
