উত্তৰ কাছাৰ পাৰ্বত্য স্বায়ত্তশাসিত পৰিষদ পুনৰ শাসকীয় দল বিজেপিৰ দখলত

নাগৰিকত্ব সংশোধনী বিধেয়কৰ বিৰোধিতা আৰু বিজেপি বিৰোধী ঢৌ ৰাজ্যখনৰ সৰ্বত্ৰে চলি থকা সত্ত্বেও উত্তৰ কাছাৰ পাৰ্বত্য স্বায়ত্তশাসিত পৰিষদৰ নিৰ্বাচনত শাসকীয় দল বিজেপিয়ে দখল কৰাই নহয়, বিৰোধীক একেবাৰে নিশ্চিহ্ন প্ৰায় কৰি পেলায়। আজি সম্পূৰ্ণ ফলাফল পোৱাৰ পিছত ২৮ খন আসনৰ ১৯খনেই বিজেপিয়ে দখল কৰা দেখা গ’ল।

আনহাতে কংগ্ৰেছে মাত্ৰ ২খন আৰু অগপই ১খন মাত্ৰ আসন পালে। দুয়োটা দলে পোৱা আসনৰ যোগফল নিৰ্দলীয়ই পোৱা আসনতকৈ কম। মুঠ ৬জন নিৰ্দলীয় প্ৰাৰ্থী জয়ী হয় পৰিষদলৈ।

উল্লেখযোগ্য যে, যোৱা ১৯ জানুৱাৰিত ডিমা হাছাও পাৰ্বত্য জিলাখনৰ স্বায়ত্তশাসিত পৰিষদখনৰ নিৰ্বাচন অনুষ্ঠিত হৈছিল। ২২-ত ভোট গণনা চলিছিল যদিও ৰাতিলৈকে গণনা সম্পূৰ্ণ নোহোৱাত সম্পূৰ্ণ ফলাফল ২৩ জানুৱাৰিতহে পাব পৰা যায়।

এই ফলাফলৰ পিছত নিৰ্বাচনৰ পূৰ্বে বিজেপিৰ দখলত থকা স্বায়ত্ত পৰিষদখন পুনৰ একেটা দলেই গঠন কৰাটো নিশ্চিত হয়। বৰ্তমান মুখ্য কাৰ্য্যবাহী এম দেবলাল গাৰ্লোছাও বৃহৎ ভোটত জয়ী হোৱাক চাই পুনৰ তেৱেঁ পৰিষদৰ মুখ্য কাৰ্য্যবাহী হোৱাৰ সম্ভাৱনা প্ৰৱল।

জয়ী হোৱা প্ৰাৰ্থীসকলৰ সম্পূৰ্ণ তালিকাখন তলত দিয়া হ’ল-

১। ২৫ নম্বৰ ল’ৱাৰ খাৰতং সমষ্টিত বিজেপিৰ নাম্ৰথাং মাৰ

২। ২৪ নম্বৰ হাম্ৰি সমষ্টিত বিজেপিৰ মনজিৎ নাইদিং

৩। ২১ নম্বৰ হাদিংমাত বিজেপিৰ দেৱজিত বাথাৰী

৪। ২৭ নম্বৰ দিগাৰ সমষ্টিত বিজেপিৰ ছেমুৱেল চাংচন

৫। ২৮ নম্বৰ ছেমখোৰত বিজেপিৰ ৰাণু লাংথাছা

৬। ১৩ নম্বৰ হাজাদিচাত বিজেপি প্ৰাৰ্থী প্ৰজিত হোজাই

৭।২৬ নম্বৰ দলং সমষ্টিত নিৰ্দলীয় প্ৰাৰ্থী এছ টি জেম ৰাংখল

৮। ২২ নম্বৰ দিহামলাইত নিৰ্দলীয় প্ৰাৰ্থী ৰামগালুম্বে জেমে

৯। ১৮ নম্বৰ খাৰতঙত বিজেপি প্ৰাৰ্থী লালৰেমচিৱামে দাৰ্নে

১০। ১০ নম্বৰ মাইবাঙ পশ্চিমত নিৰ্দলীয় প্ৰাৰ্থী বিজিত লাঙঠাচা

১১। ৭ নম্বৰ লাইচংত বিজেপি প্ৰাৰ্থী পাওদামিঙ নৃয়ামে

১২। ২০ নম্বৰ গুনজুঙত বিজেপি প্ৰাৰ্থী নজিত কেম্প্ৰাই

১৩। ১৬ নম্বৰ দিয়ুঙব্ৰাত বিজেপি প্ৰাৰ্থী নবজিত হোজাই

১৪। ১৫ নম্বৰ হাতীখালীত নিৰ্দল প্ৰাৰ্থী বিমল হোজাই

১৫। ১৭ গৰমপানী সমষ্টিত কংগ্ৰেছ প্ৰাৰ্থী জয়সিঙ দ্ৰুং

১৬।  ৪ নম্বৰ মাহুৰত বিজেপি প্ৰাৰ্থী ৰাহুল নাইডিং

১৭। ১ নম্বৰ হাফলঙত কংগ্ৰেছ প্ৰাৰ্থী ডেনিয়েল লাংথাচা

১৮। ৩ নম্বৰ বৰাইলত অগপ প্ৰাৰ্থী গুলৰিনলাল চাংচন

১৯। ১১ নম্বৰ কালাচান্দত বিজেপি প্ৰাৰ্থী ৰতন জাৰাম্বুছা

২০। ২ নম্বৰ জাতিংগাত নিৰ্দলয়ী প্ৰাৰ্থী ফ্লেমিং ৰূপছি ছাইলা

২১। হাংগ্ৰুমত নিৰ্দলীয় প্ৰাৰ্থী নোৱা দাইমে

২২। ৯ নম্বৰ মাইবাং পূৰ্ব আসনত বিজেপি প্ৰাৰ্থী নন্দিতা গাৰ্লোচা

২৩। ১৭ নম্বৰ দেহাংগীত বিজেপি প্ৰাৰ্থী তথা বৰ্তমান চি ই এম দেবলাল গাৰ্লোচা

২৪। ৮ নম্বৰ ডাওট’হাজাত বিজেপি প্ৰাৰ্থী নীপ’লাল হোজাই

২৫। ১২ নম্বৰ ৱাজো আসনত বিজেপি প্ৰাৰ্থী বিশ্বজিত দাউলাগুপু

২৬। ৫ নম্বৰ জিনামত বিজেপি প্ৰাৰ্থী জছুমথাং মাৰ

২৭। ১৪ নম্বৰ লাংটিঙত বিজেপি প্ৰাৰ্থী গলঞ্জয় থাউচেন

২৮। ২৩ নম্বৰ হাৰাংগাজাওত বিজেপি প্ৰাৰ্থী অমেন্দু হোজাই।