নিৰ্বাচনৰ আগতে তেওঁ ঘোষণা কৰিছিল যে গোমাংস খোৱা স্বত্বেও তেওঁ বিজেপিত আছে। যদি দলটো শাসনলৈ আহে চৰকাৰে কাৰো খাদ্যাভ্যাসত হস্তক্ষেপ নকৰে। কিন্তু নিৰ্বাচনৰ পিছত দেখা গ’ল যে তেওঁ নিজৰ সমষ্টিত মাত্ৰ ২০ শতাংশ ভোটহে লাভ কৰিছে। সেইদৰে প্ৰতিদ্বন্দ্বিতাত মেঘালয় বিজেপিৰ সভাপতি আৰ্নেষ্ট মাওৰি তৃতীয় স্থানত আছে।
বিজেপিয়ে খ্ৰীষ্টান অধ্যুষিত ৰাজ্য মেঘালয়ত অকলে প্ৰতিদ্বন্দিতা কৰিছিল। ৰাজ্যিক বিজেপিৰ মুৰব্বী মাওৰিয়ে কৈছিল, “ক্ষমতালৈ আহিলে ৰাজ্যখনৰ খ্ৰীষ্টান লোকসকলক সুৰক্ষা দিব চৰকাৰে। গোমাংস খোৱাৰ ওপৰতো কোনো নিষেধাজ্ঞা নাথাকিব। মই নিজেই বিজেপিত থাকিও গোমাংস খাওঁ। মই আন ৰাজ্যৰ নিয়মবোৰৰ বিষয়ে একো ক’ব নিবিচাৰো। মেঘালয়ত কোনো প্ৰতিবন্ধকতা নাথাকিব, কিয়নো ভাৰতত তেনে কোনো আইন নাই।”
তেওঁৰ এই মন্তব্যৰ বাবে বিজেপি তীব্ৰ সমালোচনাৰ সন্মুখীন হয়। উদ্ধৱ ঠাকৰেই বিজেপিক অ-হিন্দু জনতাৰ হৃদয় জয় কৰিবলৈ হিন্দুত্বক প্ৰায় অস্বীকাৰ কৰাৰ অভিযোগ উত্থাপন কৰিছিল।
তেওঁ কৈছিল,”বিজেপিয়ে নিজৰ ৰাজনৈতিক স্বাৰ্থ পূৰণৰ বাবে হিন্দুত্বৰ ৰং সলনি কৰিছে। কিন্তু আন ৰাজনৈতিক দলবোৰে তেনে কৰিলে গেৰুৱা শিবিৰ ক্ষুব্ধ হয়।”
ৰাইজৰ মন আকৰ্ষণ কৰিবলৈ সকলো প্ৰচেষ্টা চলোৱা স্বত্বেও গেৰুৱা শিবিৰে মেঘালয়ত ভাল প্ৰদৰ্শন কৰিব নোৱাৰিলে। দলৰ সভাপতিগৰাকীয়ে মাত্ৰ ২০ শতাংশ ভোট পাই পৰাজিত হৈছে। গেৰুৱা দলটোৱে ৰাজ্যখনত মাত্ৰ দুখন আসনহে জিকিছে।
তথাপি, বিজেপিয়ে পুনৰ চৰকাৰত স্থান পাব। কিয়নো বিজেপিৰ শীৰ্ষ নেতৃত্বই এনপিপি নেতা কনৰাড চাংমালৈ সমৰ্থন আগবঢ়াইছে।
