কালি ঘোষণা হ’লে উত্তৰ-পূবৰ তিনি ৰাজ্যৰ নিৰ্বাচনী ফলাফল। ঘোষিত ফলাফল অনুসৰি ত্ৰিপুৰাত বিজেপিয়ে নিৰকুংশ সংখ্যাগৰিষ্ঠতা লাভ কৰাৰ বিপৰীতে নাগালেণ্ডত মিত্রজোঁটৰ চৰকাৰ গঠনৰ পথ মুকলি হয়।
আনহাতে মেঘালয়ত নিৰ্বাচনৰ পূৰ্বে এন পি পিৰ সৈতে মিত্ৰতা ভংগ কৰিলেও কালি ফলাফলৰ পিছত পুনৰ মিত্ৰজোঁটৰ চৰকাৰ গঠনৰ বাবে সাজু হৈছে বিজেপি। তিনি ৰাজ্যৰ ফলাফলত লৈ বিজেপিৰ আত্মসন্তুষ্টিৰ মাজতে অসম জাতীয় পৰিষদে সমালোচনা কৰিছে ৰাষ্ট্ৰীয় দলটোক।
অসম জাতীয় পৰিষদৰ মতে, উত্তৰ-পূৰ্বাঞ্চলৰ তিনিখন ৰাজ্যৰ আঞ্চলিক দলৰ বিজয়ৰ কৃতিত্ব লৈছে বিজেপিয়ে। বিজেপিয়ে নিজ দলৰ জয়ৰ ভুৱা অপপ্ৰচাৰ চলাইছে বুলি দাবী কৰিছে জাতীয় পৰিষদে।
এজেপিৰ অভিযোগ- ত্ৰিপুৰা, মেঘালয় আৰু নাগালেণ্ড ৰাজ্যত নতুন চৰকাৰ সফলতাৰে গঠন কৰা বুলি বিজেপিয়ে কৰা দাবী সম্পূৰ্ণ সঠিক নহয়।
জাতীয় পৰিষদে কয় যে নাগালেণ্ডত বিজেপিয়ে ২০ খন আসনত প্ৰতিদ্বন্দ্বিতা কৰিছিল যদিও মাত্ৰ ১২ খন আসনতহে জয়লাভ কৰিছিল। আনহাতে ৰাজ্যখনৰ আঞ্চলিক ৰাজনৈতিক দল এন ডি পি পি- এ ২৫ খন আসন লাভ কৰিছে।
প্ৰকৃততে এন ডি পি পি- এ ২৫খন আসনত জয়েৰে মিত্ৰজোঁটক সংখ্যাগৰিষ্ঠতাৰ সংখ্যা দিবলৈ সক্ষম হৈছে বুলি দাবী কৰে এজেপিয়ে। গতিকে এন ডি পি পিৰহে ৰাজ্যত প্ৰকৃত প্ৰভাৱ আছে আৰু বিজেপিৰ কোনো প্ৰভাৱ নাই বুলি এজেপিয়ে লগতে দাবী কৰে।
আনহাতে মেঘালয়ত নিৰ্বাচনৰ পূৰ্বে বিজেপিয়ে কনৰাড চাংমা নেতৃত্বাধীন চৰকাৰখনৰ ওপৰত দুৰ্নীতিৰ গুৰুতৰ অভিযোগ উত্থাপন কৰি অকলে যুঁজ দিয়াৰ সিদ্ধান্ত লয় আৰু মাত্ৰ ২ খন আসন জয় কৰিবলৈ সক্ষম হ’ল বুলি আঙুলিয়াই দিয়ে এজেপিয়ে।