উত্তৰ কাছাৰ পাৰ্বত্য স্বায়ত্ত শাসিত পৰিষদৰ সাধাৰণ নিৰ্বাচন অহা নৱেম্বৰ মাহত অনুষ্ঠিত হ’ব। নিৰ্বাচন অনুষ্ঠিত কৰাৰ কাৰণে ৰাজ্যিক বিজেপিৰ সভাপতি ৰঞ্জিত কুমাৰ দাসে ৰাজ্যিক নিৰ্বাচন আয়োগক আহ্বান জনাইছে। বৃহস্পতিবাৰে হাফলং এন এল ডি ইনড’ৰ ষ্টেডিয়ামত অনুষ্ঠিত দলীয় কৰ্মী সভাত ভাগ লৈ ৰাজ্যিক সভাপতিগৰাকীয়ে দলীয় নেতাকৰ্মী সকলকো নিৰ্বাচনৰ কাৰণে সাজু হোৱাৰ আহ্বান জনায়।
সভাপতি দাসে কয় যে পাৰ্বত্য পৰিষদৰ ২৮ খন আসনৰ ২৮ খনেই বিজেপি দলৰ দখলত থাকিব। কাৰ্বি আংলং স্বায়ত্ত শাসিত পৰিষদৰ নিৰ্বাচনত যেনেকৈ কংগ্ৰেছ দলৰ নাম-ঠিকনা নাইকিয়া হৈছে ঠিক তেনে ধৰণে উত্তৰ কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচনতো কংগ্ৰেছ দলৰ অস্তিত্ব সংকটত পৰিব।
বৃহস্পতিবাৰে কৰ্মী সভাত আগন্তুক লোকসভা নিৰ্বাচনৰ কাৰণে পৃষ্ঠা প্ৰমুখ নিযুক্তি দিয়া হয়। এজন পৃষ্ঠা প্ৰমুখৰ দায়িত্ব হ’ব ভোটাৰ তালিকাৰ এটা পৃষ্ঠাত যিমান জন ভোটাৰ থাকিব তেওঁলোকৰ ঘৰে ঘৰে উপস্থিত হৈ বিজেপি দলৰ বিভিন্ন উন্নয়নমূলক আঁচনিৰ বিষয়ে ভোটাৰসকলক অৱগত কৰা হ’ব। সভাত জিলাৰ মুঠ দশটা মণ্ডলৰ সভাপতি সকলক পৃষ্ঠা প্ৰমুখ হিচাপে নিযুক্তি দিয়া হয়।
বিজেপি সভাপতিগৰাকীয়ে কয় যে ডিমা হাচাওত গণতান্ত্ৰিক ব্যৱস্থা অটুট ৰখাৰ কাৰণে নৱেম্বৰৰ ভিতৰত নিৰ্বাচন হোৱাটো বিজেপি দলে বিচাৰে। কৰ্মী সভাত জিলাৰ বিভিন্ন প্ৰান্তৰ পৰা সহস্ৰাধিক নেতাকৰ্মী উপস্থিত থাকে।
আনহাতে, সাংবাদিকৰ প্ৰশ্নৰ উত্তৰত ৰাজ্যিক সভাপতিগৰাকীয়ে কয় যে উত্তৰ কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচনত অগপ দলৰ সৈতে বিজেপিৰ মিত্ৰতা প্ৰসংগটো পৃথক বিষয়। এই বিষয়ে ডিমা হাচাও জিলা বিজেপিয়ে সিদ্ধান্ত ল’ব। অবশ্যে লোকসভা নিৰ্বাচনত অগপ-বিজেপিৰ মিত্ৰতা থাকিব।
দাসে লগতে কয় যে নিৰ্বাচনত বিজেপি দলৰ প্ৰধান ইছ্যু হ’ব উন্নয়ন। কাৰণ বিজেপি দলে উন্নয়নত অধিক গুৰুত্ব দিছে। আনহাতে প্ৰধানমন্ত্ৰী নৰেন্দ্ৰ মোদীয়েও পাহাৰৰ উন্নয়ন বিচাৰে। উন্নয়নৰ প্ৰসংগত তেওঁ কয় যে কংগ্ৰেছ চৰকাৰে আঁচনি প্ৰদানৰ ক্ষেত্ৰত বিভিন্ন শ্ৰেণীক গুৰুত্ব দিছিল। কিন্তু বিজেপি চৰকাৰে সমাজৰ প্ৰতিটো শ্ৰেণীক এনে আঁচনিত সামৰি লোৱাৰ ব্যৱস্থা লৈছে। অহা ২ অক্টোবৰৰ পৰা দেশৰ মুঠ ষাঠি লাখ বৃদ্ধ-বৃদ্ধাক বৃদ্ধ পেনশ্যন দিয়া হ’ব।
বৃহস্পতিবাৰৰ কৰ্মী সভাত ৰাজ্যিক বিজেপিৰ সাধাৰণ সম্পাদক (সাংগঠনিক) ফনীন্দ্ৰনাথ শৰ্মা, ৰাজ্যিক বিজেপিৰ মুখপাত্ৰ তথা ডিমা হাচাও বিজেপিৰ তত্ত্বাৱধায়ক ৰামকৃষ্ণ ঘোষ, ৰাজ্যিক উপ সভাপতি লংকি ফাংচু, পাৰ্বত্য পৰিষদৰ চিইএম দেবলাল গাৰ্লচা, ডিমা হাচাও জিলা বিজেপি সভাপতি নিপোলাল হোজাই আদি উপস্থিত থাকে।