বোকাখাতৰ ৰাজহুৱা খেল পথাৰত আজি দিনজোৰা কাৰ্যসূচীৰে ভাৰতীয় জনতা পাৰ্টীৰ চাহ মৰ্চাৰ কাৰ্যকৰ্তাৰ এখন বিশেষ সন্মিলন অনুষ্ঠিত হয় ৷ সভাত বিজেপিৰ ৰাজ্যিক সভাপতি ৰঞ্জিত দাস আৰু অসমৰ তত্বাৱধায়ক মহেন্দ্ৰ সিঙ, বিত্ত তথা স্বাস্থ্য মন্ত্ৰী হিমন্ত বিশ্ব শৰ্মাৰ লগতে অসমৰ মুখ্য মন্ত্ৰী সৰ্বানন্দ সোনোৱাল উপস্থিত থাকে ৷
আগন্তুক লোকসভা নিৰ্বাচনৰ প্ৰাকক্ষণত চাহ জনগোষ্ঠীৰ মাজত দলীয় প্ৰচাৰ চলোৱাৰ বাবেই আজিৰ এই সভাখন অনুষ্ঠিত কৰা হৈছিল।
চাহ মৰ্চাৰ সভাপতি প্ৰহ্লাদ গোৱালাই আদৰণী ভাষণ দিয়া সভাখনত বিজেপি নেতা মহেন্দ্ৰ সিঙে প্ৰধান মন্ত্ৰী নৰেন্দ্ৰ মোদী আৰু সৰ্বানন্দ সোনোৱালক প্ৰশংসা কৰি বিজেপি চৰকাৰে চাহ জনগোষ্ঠীৰ বাবে কৰা কৰ্ম আঁচনিৰ বৰ্ননা কৰি পুনৰ বাৰ মোদী চৰকাৰ গঠন কৰাৰ সুবিধা প্ৰদান কৰিবৰ বাবে আহ্বান জনায় ৷
নিজৰ ভাষণ প্ৰসংগত সৰ্বানন্দ সোনোৱালেও পুনৰ বাৰ মোদী চৰকাৰৰ গঠনৰ শ্লোগানেৰে উপস্থিত চাহ জনগোষ্ঠীৰ প্ৰতিনিধি সকলক আগন্তুক লোকসভা নিৰ্বাচনত বিজেপিক ভোট দিবৰ বাবে প্ৰকাৰন্তে আহ্বান জনায় ৷ ইয়াৰ উপৰি প্ৰধান মন্ত্ৰী নৰেন্দ্ৰ মোদীৰ আহ্বানত অসমৰ চাহ জনগোষ্ঠীয়ে অতি কম সময়তে ৮ লাখ বেংক একাউন্ট খুলি অভিলেখ স্থাপন কৰাৰ বাবে অসমৰ চাহ জনগোষ্ঠীক ধন্যবাদ জ্ঞাপন কৰে।
ইফালে মুখ্য মন্ত্ৰীৰ সভা ত্যাগৰ পাছতেই হেলিকপ্টাৰেৰে সভাস্থলিত পলমকৈ উপস্থিত হোৱা মন্ত্ৰী হিমন্ত বিশ্ব শৰ্মাই আগন্তুক লোকসভা নিৰ্বাচনত নৰ্থ-ইষ্ট ডেম’ক্ৰেটিক এলায়েঞ্চ আৰু বিজেপিয়ে মিলি উত্তৰ-পূবৰ ২৫ খন আসনৰ ভিতৰত ১৯ ৰ পৰা ২১ খন আসন আৰু অসমত ৯ৰ পৰা ১১ খন আসন বিজেপিয়ে লাভ কৰিব বুলি মন্তব্য কৰে।
আজিৰ এই অনুষ্ঠানতে চাহ মুক্তি সংগ্ৰাম সমিতিৰ গোলাঘাটৰ নেতা সঞ্জয় কৃষ্ণ তাঁতী প্ৰমুখ্যে একাংশ লোকে আনুষ্ঠানিক ভাৱে ভাৰতীয় জনতা পাৰ্টীত যোগদান কৰে।
এই সভাত শক্তি মন্ত্ৰী পল্লৱ লোচন দাস, খুমটাইৰ বিধায়ক মৃনাল শইকীয়া, তিনচুকীয়াৰ বিধায়ক সঞ্জয় কিষাণ, ঢেকিয়াজুলিৰ বিধায়ক অশোক সিংহাল, যোৰহাটৰ সাংসদ কামাখ্যা প্ৰসাদ তাচাৰ লগতে চাহ মৰ্চাৰ সমূহ বিষয় ববীয়া উপস্থিত থাকে ৷
