অগপ-বিজেপিৰ মিত্ৰতাক লৈ অসমৰ ৰাজনৈতিক মহলত ব্যাপক চৰ্চিত হৈ থকাৰ সময়তে মিত্ৰতা সন্দৰ্ভত প্ৰথমবাৰৰ বাবে সংবাদ মাধ্যমৰ আগত স্পষ্টৰূপত মত প্ৰকাশ কৰিছে বিজেপিৰ এগৰাকী প্ৰভাৱশালী নেতা তথা মন্ত্ৰী ড০ হিমন্ত বিশ্ব শৰ্মাই।
১১ মাৰ্চত নেতাগৰাকীয়ে সংবাদ মাধ্যমৰ আগত মত ব্যক্ত কৰি আগন্তুক নিৰ্বাচনত অগপৰ সৈতে মিত্ৰতা অসম্ভৱ বুলি মন্তব্য কৰে। তেওঁ কয়, ‘পঞ্চায়ত নিৰ্বাচনৰ পিছৰ পৰা অগপৰ লগত বিজেপিৰ দূৰত্ব বহু বাঢ়িল। মিত্ৰতা লাগে বুলি মই ভাবো যদিও দুয়ো দলৰ তৃণমূল কৰ্মীৰ মাজত এতিয়া মিত্ৰ হৈ নিৰ্বাচন খেলাৰ মানসিকতা নাই’।
‘আজি যদি মিত্ৰতা হয়, তেন্তে অগপৰ কৰ্মীয়ে বিজেপিক আৰু বিজেপিৰ কৰ্মীয়ে অগপক সহায় কৰিব বুলি মোৰ মনে নধৰে। নাগৰিকত্ব বিধেয়কক লৈ তেওঁলোকে আমাক এৰি গুছি গ’ল। আৰু তেতিয়াৰে পৰা কৰ্মীৰ মাজত ব্যৱধান বহু পৰিমাণে বাঢ়ি গ’ল’। এইদৰে গুৰুত্বপূৰ্ণ মন্তব্য কৰে মন্ত্ৰী হিমন্ত বিশ্ব শৰ্মাই।
আনহাতে বিজেপিৰ কেন্দ্ৰীয় নেতৃত্বই অসমত অগপেৰে মিত্ৰতা বিচাৰি আঞ্চলিক দলটোৰ সৈতে যোগাযোগ কৰি থকা বুলি বিভিন্ন মহলত উত্থাপন হৈ থকা বিষয়টো সন্দৰ্ভতো মন্ত্ৰীগৰাকীয়ে মত প্ৰকাশ কৰে।
তেওঁ কয়, ‘যদিহে অমিত শ্বাহ আৰু নৰেন্দ্ৰ মোদীয়ে অগপৰ লগত মিত্ৰতা কৰিবলৈ কয় তেন্তে মিত্ৰতা নকৰো বুলি ক’বলৈ কোনেও সাহস নকৰে। কিন্তু প্ৰকৃততে ৰাষ্ট্ৰীয় নেতৃত্বয়ো এই পৰ্যন্ত অগপৰ লগত মিত্ৰতা বিচৰা নাই। অগপৰ লগত ৰাষ্ট্ৰীয় নেতৃত্বই মিত্ৰতা বিচৰা বুলি কেবল সংবাদ মাধ্যমতহে প্ৰচাৰিত হৈ আছে’।
