ৰাজনীতিৰ মলিনতাত একেটা কাৰ্যৰে দুই ভিন্ন পৰিণতি! এপিনে কংগ্ৰেছ সাংসদ ৰাহুল গান্ধীক অপৰাধমূলক গোচৰত দোষী সাব্যস্ত হোৱাৰ লগে লগে বজ্ৰ গতিৰে সাংসদ হিচাপে অযোগ্য ঘোষণা কৰা হয়। কিন্তু গুজৰাটৰ এজন বিজেপি সাংসদৰ বিৰুদ্ধে কোনো ব্যৱস্থা গ্ৰহণ কৰা নহ’ল।
২০১৬ চনৰ ১৩ এপ্ৰিলত আমৰেলিৰ পৰা বিজেপিৰ সাংসদ নাৰানভাই ভিখাভাই কছাৰিয়াক স্থানীয় আদালতে তিনি বছৰৰ কাৰাদণ্ডৰ শাস্তি প্ৰদান কৰে।১৬ দিনৰ পাছত তেওঁ দোষী সাব্যস্ত হোৱা সন্দৰ্ভত স্থগিতাদেশ লাভ কৰে। কিন্তু তেতিয়া অধ্যক্ষ সুমিত্ৰা মহাজনৰ কাৰ্যালয়ে আমৰেলিৰ বিজেপি সাংসদগৰাকীক ‘অযোগ্য’ কৰাৰ কোনো চেষ্টা নকৰিলে।
লগতে পঢ়ক: চিবিআইৰ ৰোষত মোডীৰ শাসনত ভাৰতৰ আৰ্থিক বৈষম্যৰ প্ৰতিবেদন দিয়া অক্সফাম!
কেৱল সেয়াই নহয়, ২০১৯ চনৰ লোকসভা নিৰ্বাচনত বিজেপিৰ টিকটত আমৰেলিৰ পৰা পুনৰ সাংসদ হিচাপে নিৰ্বাচিত হৈছিল ৬৮ বছৰীয়া নাৰানভাই ভিখাভাই কাছাড়িয়া। গুজৰাটৰ পাটিদাৰ সম্প্ৰদায় তথা কৃষক নেতা কাছাড়িয়াই ২০০৯ চনৰ পৰা সংসদীয় নিৰ্বাচনত জয়লাভ কৰি আহিছে।
কিন্তু মানহানিৰ গোচৰত দুবছৰৰ বাবে দোষী সাব্যস্ত হোৱাৰ এদিন পিছতে ৰাহুল গান্ধীক লোকসভাৰ সাংসদ হোৱাৰ পৰা অযোগ্য ঘোষণা কৰা হয়। যিহেতু তেওঁ দুবছৰৰ কাৰাদণ্ড লাভ কৰিছে, সেয়েহে তেওঁক সাংসদ হিচাপে অপসাৰণৰ সূচনা স্বয়ংক্ৰিয়ভাৱে আৰম্ভ হৈছে।
মঙলবাৰে লোকসভা কংগ্ৰেছৰ নেতা অধিৰঞ্জন চৌধুৰীয়ে অধ্যক্ষ ওম বিৰলালৈ পত্ৰ লিখি কাছাড়িয়াৰ গোচৰৰ উদ্ধৃতি দি ৰাহুলৰ অযোগ্য ঘোষণা সন্দৰ্ভত আলোচনা বিচাৰিছিল।
লগতে পঢ়ক:কিয় ড’নাল্ড ট্ৰাম্প জেললৈ যোৱাটো ঠিক নহ’ব বুলি ক’লে পৰ্ণ তাৰকা ষ্টৰ্মি ডেনিয়েলছে?
চৰকাৰী চিকিৎসালয়ত কৰ্তব্যৰত দলিত চিকিৎসকক আক্ৰমণ কৰাৰ অপৰাধত দোষী সাব্যস্ত হয় কছাড়িয়া। আদালতে তেওঁক এই শাস্তিৰ বিৰুদ্ধে উচ্চ ন্যায়ালয়ত আবেদন কৰিবলৈ ৩০ দিনৰ সময় দিয়ে। আমৰেলিৰ সাংসদগৰাকীয়ে প্ৰথমে গুজৰাট উচ্চ ন্যায়ালয়ৰ কাষ চাপিছিল। কিন্তু, গুজৰাট উচ্চ ন্যায়ালয়ে কাছাড়িয়াৰ শাস্তি স্থগিত ৰাখে।
তেওঁৰ দোষী সাব্যস্ত হোৱাৰ পিছতো তেওঁক নিলম্বন কৰা হোৱা নাছিল। ইয়াৰ পিছত কাছাড়িয়াক সাংসদ পদৰ পৰা বৰ্খাস্ত কৰিব লাগিছিল। কিন্তু, কৰা নহ’ল। অৱশেষত ২০১৬ চনৰ ২৯ এপ্ৰিলত উচ্চতম ন্যায়ালয়লৈ গৈ সকাহ পালে কাছাড়িয়াই।
লগতে পঢ়ক: জাপানৰ টহলদাৰী সামৰিক হেলিকপ্টাৰ বিধ্বস্ত
২০১৬ চনত গুজৰাটৰ সাংসদ কাছাড়িয়াক অযোগ্য ঘোষণা কৰা অধিসূচনা জাৰি কৰাত পলম হোৱা বুলি স্বীকাৰ কৰিছে লোকসভা সচিবালয়ে। কিন্তু গুজৰাটৰ কংগ্ৰেছ নেতাসকলে দোষী সাব্যস্ত হোৱাৰ পিছত কাছাড়িয়াক অযোগ্য ঘোষণা কৰিবলৈ ৰাষ্ট্ৰপতি ৰামনাথ কোবিন্দ, অধ্যক্ষ সুমিত্ৰা মহাজন আৰু নিৰ্বাচন আয়োগৰ কাষ চাপিছিল। কিন্তু, তাতো একো নহ’ল।
